Read Tshiluba Matayi 22 Bible Online

Matayi 22 - Tshiluba bible

Matayi 22

¹Yezu uvua ulongesha tshiakabidi bantu mu nsumuinu, ubambila ne:

²— Bukalenga bua mu diulu mbufuanangane ne mukalenga wa ditunga, uvua mulongoluele muanende wa balume didia dinene dia dibaka.

³Kutumaye bena mudimu bende bua kuvuluija bantu muvuaye mubabikile mu didia edi. Kadi bavuaye mubikile kubengabu.

⁴Pashishe kutumaye bena mudimu bakuabu, ubambila ne: “Ambilayi bamvua mubikile ne: mpindiewu nkadi mumane kulongolola didia dianyi. Ndi mushipe ngombe milume, ne nyama mikuabu mimpe ya mafuta. Bionsu biakumbanyi! Vuayi mu didia dia dibaka!”

⁵Kadi bavuaye mubikile kabavua bangata dibikila diende ne mushinga. Kuyabu ku midimu yabu, ewu ku budimi buende, munga ku mishinga yende.

⁶Bakuabu kukuata bena mudimu, kubakengesha, kubashipa mene.

⁷Mukalenga kufika munda bikole. Kutumaye tshiluilu tshiende, bua kushipa bashipianganyi aba, ne kuosha tshimenga tshiabu.

⁸Pashishe kuambilaye bena mudimu bende ne: “Tukadi balongolole didia dia dibaka. Kadi bantu bamvua mubikile, kabatua badikumbanyine to.

⁹Nenku nuye mu misesu minene ku biibi biatshimenga. Nubikile bonsu banuasangana, bua bafike mu didia.”

¹⁰Bena mudimu abu kuya mu misesu minene, kusangisha bonsu bavuabu basangane, babi ne balenga. Nzubu wa didia dia dibaka kuwula bantu tente.

¹¹Mukalenga kubuela bua kumona bavua ku mesa. Kumonayemu muntu uvua kayi ne tshilamba tshia dibaka.

¹²Kumukonkaye ne: “Mulunda wanyi, muudi mubuele apa nunku, kuyi ne tshilamba tshia dibaka, mbishi?” Kadi muntu awu nansha kuandamuna kalu to.

¹³Nenku mukalenga kuambila bena mudimu ne: “Musuikayi ku makasa ne ku bianza. Numuimanshe pambelu mu midima, bua aye kudidilapu, asumakajilapu menu.”

¹⁴Bualu badibu babikile badi bavule, kadi badibu basungule badi bakese.

¹⁵Diba adi Baparushe kubuela mu tshipangu, kushindika mua kukuata Yezu mu buteyi ku miaku yende.

¹⁶Kutumabu balongi babu bakuabu, ne bamue ba bena Erode,[148] bua kuambila Yezu ne: — Mulongeshi, tudi bamanye ne: wewe udi wamba malu malelela. Udi ulongesha amu patoke tshidi Mvidi Mukulu musue bua muntu enze. Kuena utshina bidi bantu bela meji, bualu kuena ukakala muntu. Kuena utshina buneme bua muntu.

¹⁷Nanku anji kutuambila pebe muudi mumone: bilondeshile mikenji yetu, tudi mua kufuta tshitadi kudi mukalenga wa bakalenga muena Rome anyi katufutshi?

¹⁸Kadi Yezu uvua mujingulule meji abu mabi. Kubambilaye ne: — Nuenu bena mpala ibidi, nudi nunteya bua tshinyi?

¹⁹Ndejayi makuta anudi nuteta nawu tshitadi. Kumulejabu makuta.

²⁰Yezu kubakonka ne: — Mpala ewu ne dina, bidibu bafunde apa, mbia nganyi?

²¹Kuandamunabu ne: — Bia mukalenga wa bakalenga. Ke Yezu kubambila ne: — Nunku futayi mukalenga wa bakalenga bintu bidi bunutangila, kadi lambulayi Mvidi Mukulu pende bidi bimutangila.

²²Bamane kumvua muvua Yezu muandamune, kukemabu bikole. Kumushiyabu, kuya.

²³Dituku adi mene, Basaduke bakuabu kufika kudi Yezu. (Ke bantu badi bamba ne: bafue kabena babika[149]). Kukonkabu Yezu ne:

²⁴— Mulongeshi, Moshe uvua muambe ne: “Muntu mufue, kayi mulele muana, muanabu angate mukaji mukamba, bua asanguile muanabu udi mufue.[150]

²⁵Kuetu eku kuvua bana ba muntu muanda mutekete. Wa kumpala kusela mukaji. Kufuaye, kayi mulele nende muana. Nanku kushilaye muanabu mukaji awu.

²⁶Muanabu kabidi nansha kulela nende; pashishe muisatu, amu nanku, too ne ku wa muanda mutekete.

²⁷Bonsu aba bamane kufua, mukaji kubalonda.

²⁸Nanku dituku diabika bantu bafue, mukaji neikale wa nganyi ku bonsu aba muanda mutekete? Bualu buonsu buabu bavua anu babayende.

²⁹Yezu kubandamuna ne: — Nudi batupakane bikole! Bualu kanuena bajingulule tshidibu bafunde mu Mukanda wa tshijila. Kanuena nansha bamanye bukole budi Mvidi Mukulu nabu.

³⁰Bualu pabika bantu ku bafue, nebikale bafuanangane ne batumibue ba Mvidi Mukulu badi mu diulu, kabayi baselangana kabidi to.

³¹Kadi bua dibika dia bafue, kanuena babale bivua Mvidi Mukulu munujadikile ne:

³²“Meme ndi Mvidi Mukulu wa Abrahame, Mvidi Mukulu wa Izake, ne Mvidi Mukulu wa Yakobe.[151]” Nanku Mvidi Mukulu udi Mvidi Mukulu wa bantu badi ne muoyi, ki ngwa bafue to.

³³Bantu bavule bavua bamuteleja, kukemabu bikole bua bivuaye mulongeshe.

³⁴Baparushe bumvue ne: Yezu mmushikije Basaduke, kudisangishabu pabu.

³⁵Umue wabu, mulongeshi wa mikenji, uvua musue kuteta Yezu. Kumukonkaye ne:

³⁶— Mulongeshi, mukenji udi munene, mupite mikuabu yonsu, mmukenji kaayi?

³⁷Yezu kumuandamuna ne: — “Unange Maweja-Nangila Mvidi Mukulu webe ne muoyi webe mujima, ne bukole buebe buonsu, ne lungenyi luebe lujima.[152]”

³⁸Awu ke mukenji mupite bunene, ne wa kumpala.

³⁹Mukenji muibidi, wa bunene bua momumue, udi nunku: “Unange mukuebe, bu muudi mudinange wewe.[153]”

⁴⁰Mikenji yonsu ya Moshe, ne bionsu bidi bambi balongesha, bidi amu mu mikenji eyi ibidi.

⁴¹Baparushe bavua basangile kaba kamue. Yezu kubakonka ne:

⁴²— Bua Kristu nudi nuela meji munyi? Udi wa ku ndelanganyi ya nganyi? Bobu kumuandamuna ne: — Udi wa ku ndelanganyi ya Davide.

⁴³Yezu kubebeja ne: — Kadi mmunyi muvua Davide, uvuabu balombola kudi Mueyelu wa tshijila, umubikila ne: “Mfumu?” Bualu Davide uvua wamba ne:

⁴⁴“Maweja-Nangila Mvidi Mukulu uvua wamba Mfumu wanyi ne: Somba ku dianyi dia balume, too ne pangateka bena lukuna bebe muinshi mua makasa ebe.[154]”

⁴⁵Pikala Davide umubikila “Mfumu,” mudi Kristu mua kuikala wa ku ndelanganyi ya Davide mmunyi?

⁴⁶Muntu nansha umue kavua mua kuandamuna ku lukonku alu. Kutuadija ku dituku adi, muntu nansha umue kavua ukimina kabidi kumuebeja bualu.