Read Tshiluba Matayi 23 Bible Online

Matayi 23 - Tshiluba bible

Matayi 23

¹Ke Yezu kuambila bantu ne balongi bende pamue ne:

²— Balongeshi ba mikenji ne Baparushe badi ne bumfumu bua kumvuija bantu mikenji ya Moshe.

³Nanku nudi ne bua kubatumikila, kukumbaja bionsu bidibu banulongesha. Kadi kanuidikiji mudibu benza to. Bualu kabena benza mudibu balongesha.

⁴Badi basuika mabuki a bujitu, baambuisha bantu pa makaya abu. Kadi bobu kabena mua kualenga nansha ne munu bua kuambula.

⁵Badi benza midimu yabu yonsu bua bantu babamone. mBafunde miaku ya tshijila pa mikaba minene, idibu basuika pa mpala nansha ku maboku. Binkutu biabu bidi ne nzemba minene kabidi.[155]

⁶Mu bibilu bia didia, mbasue kusomba miaba ya bantu baneme. Mu nzubu ya ditendelela ya bena Yuda, badi bajinga kusomba miaba mimpe kumpala kua bantu bakuabu.

⁷Badi bananga bua bantu bahele muoyi ne kanemu, miaba idi bantu bakungila, kabidi bua bababikile ne: “Mulongeshi.”

⁸Kadi nuenu kabanubikidi ne: “Mulongeshi.” Bualu nudi bonsu bantu bamue. Mulongeshi wenu udi amu umue.

⁹Pa buloba kanubikidi muntu ne: “Tatu.” Bualu Tatu wenu udi amu umue, wa mu diulu.

¹⁰Kabanubikidi kabidi ne: “Muludiki,” bualu nudi ne muludiki amu umue, ke Kristu.

¹¹Udi munene kunudi, adienze muena mudimu wenu.

¹²Wadibandisha, nebamupuekeshe; wadipuekesha, nebamubandishe.

¹³— Nuenu balongeshi ba mikenji ne Baparushe, nudi bena diakabi, bualu nudi bena mpala ibidi! Nudi nupangisha bantu, bua kababuedi mu Bukalenga bua mu diulu. Nuenu mene kanuena numubuela. Kanuena nansha banyishe bua babuelemu kudi badi bakeba kubuela. [

¹⁴Nuenu balongeshi ba mikenji ne Baparushe, nudi bena diakabi, bualu nudi bena mpala ibidi! Nudi nutendelela mutantshi mule, bua bantu banumone bu bantu bimpe. Kadi nudi nunyenga bakaji bakamba bionsu bidibu nabi. Nanku nebanunyoke bikole bipite![156]]

¹⁵Nuenu balongeshi ba mikenji ne Baparushe, nudi bena diakabi, bualu nudi bena mpala ibidi! Nudi nutambakana pa buloba bujima, ne pa mayi manene, bua kupeta muntu udi mua kukudimuna mutshima wende. Kadi panudi bamane kumupeta, nudi numupisha tshibawu tshia kapia ka tshinyangu, tshipite tshienu misangu ibidi.

¹⁶Nudi bena diakabi, bualu nudi basue kulombola bakuabu, kadi nudi bampofu! Nudi nuamba ne: “Muntu udi uditshipa, utela nzubu wa Mvidi Mukulu, mutshipu kawena umukuata. Kadi muntu udi uditshipa, utela tshiamu tshia mpawungi tshidi mu nzubu wa Mvidi Mukulu, mutshipu udi umukuata.”

¹⁷Nudi bantu batshimbakane, bampofu! Tshidi ne mushinga mupite ntshinyi? Tshiamu tshia mpawungi, peshi nzubu wa Mvidi Mukulu, udi uvuija tshiamu tshia mpawungi etshi tshia tshijila?

¹⁸Nudi nuamba kabidi ne: “Muntu udi uditshipa, utela tshilambuilu, mutshipu kawena umukuata. Kadi bu yeye uditshipa, utela mulambu udi pa tshilambuilu, mutshipu udi umukuata.”

¹⁹Nudi bampofu! Tshidi ne mushinga mupite ntshinyi? Mulambu anyi, peshi tshilambuilu tshidi tshivuija mulambu awu wa tshijila?

²⁰Udi uditshipa, utela tshilambuilu, udi uditshipa, utela tshilambuilu ne bionsu bidipu.

²¹Udi uditshipa, utela nzubu wa Mvidi Mukulu, udi uditshipa, utela nzubu wa Mvidi Mukulu, ne Mvidi Mukulu mene udi usombamu.

²²Udi uditshipa, utela diulu, udi uditshipa, utela nkuasa wa Mvidi Mukulu, ne Mvidi Mukulu mene udi usombapu.[157]

²³Nuenu balongeshi ba mikenji ne Baparushe, nudi bena diakabi, bualu nudi bena mpala ibidi! Nudi nulambula Mvidi Mukulu tshia dikumi tshia biakudia bienu, nansha tshia luenyi, tshia tshidibi a luenyi, ne tshia tshikote.[158] Kadi nudi nulengulula malu mapite bunene adi mikenji itulongesha, bu mudi kuenzela bantu bimpe, kufuilangana luse, ne kuitaba Mvidi Mukulu. Kadi ke malu anuvua ne bua kuenza, kanuyi nulengulula makuabu.

²⁴Nuenu nudi basue kulombola bakuabu, kadi nudi bampofu! Nudi nutata maluvu enu, numusha kishi. Kadi kamelu, nudi nukumina!

²⁵Nuenu balongeshi ba mikenji ne Baparushe, nudi bena diakabi, bualu nudi bena mpala ibidi! Nudi nusukula panyima pa dikopu ne pa dilonga. Kadi munda muabi mudi amu biakudia binuvua bibe, nansha bapete ku lukuka.

²⁶Wewe Parushe, udi mpofu! Usukule bangabanga munda mua dikopu. Nanku panyima padi, nepikale pimpe kabidi.

²⁷Nuenu balongeshi ba mikenji ne Baparushe, nudi bena diakabi, bualu nudi bena mpala ibidi! Nudi bafuanangane ne nkita milaba lupemba bimpe.[159] Idi imueneka mimpe ku mesu. Kadi munda muayi mudi muwule tente ne mifuba ya bantu bafue, kabidi ne bintu bibole bia mishindu yonsu.

²⁸Nuenu kabidi nudi numueneka bu bimpe kudi bantu, kadi munda muenu nudi amu bena mpala ibidi, ne bena malu mabi.

²⁹— Nuenu balongeshi ba mikenji ne Baparushe, nudi bena diakabi, bualu nudi bena mpala ibidi. Nudi nuibakila bambi nkita mimpe. Nudi nulengeja nkita ya bantu bavua bitaba Mvidi Mukulu.

³⁰Nudi nuamba ne: “Bu tuetu bikalepu pavua bankambua betu ne muoyi, katuvua mua kudisangisha nabu bua kushipa bambi nansha!”

³¹Nanku nudi nuitaba munudi ndelanganyi ya bavua bashipa bambi.

³²Ee, tungunukayi! Numane mudimu uvua bankambua benu babange!

³³Nudi nyoka, kabidi bana ba nyoka! Nudi nuela meji ne: nenupanduke ku kapia ka tshinyangu anyi?

³⁴Nanku telejayi: nennutumine bambi, bena meji, ne balongeshi ba bushuwa ba mikenji. Nenushipe bamue. Nenupopele bakuabu ba mitshi mitshiamakane. Nenutute banga mikaba mu nzubu yenu ya kutendelela. Nenubalondakaje ku tshimenga ne ku tshimenga.

³⁵Nanku nenupie tshibawu tshia bantu bonsu ba pa buloba, bavuabu bashipe kapayi bualu, bituadije ku Abele, muntu muimpe uvua muitabe Mvidi Mukulu, too ne ku Zekarya, muana wa Barakiya, unuvua bashipele pankatshi pa muaba wa tshijila ne tshilambuilu.[160]

³⁶Ndi nnujadikila bulelela ne: nebanyoke bena lelu bibi, bua lufu lua bantu bonsu aba.

³⁷— Yerushalayime, Yerushalayime, wewe udi ushipa bambi, wasa badi Mvidi Mukulu ukutumina mabue, ubashipa! Misangu bungi munyi imvua mujinge kusangisha bantu bebe pandi, bu mudi nzolu usangisha tuana tuende mu mapuapua. Kadi kanuvua basue to!

³⁸Nanku, nzubu wa Mvidi Mukulu wenu awu neashale munda mutupu![161]

³⁹Ndi nnujadikila ne: kutuadija ku mpindiewu, kanuakummona kabidi, too ne panuela mbila ne: “Udi uvua mu dina dia Maweja-Nangila, Mvidi Mukulu amuele lupemba![162]”