Read Tshiluba Matayi 24 Bible Online

Matayi 24 - Tshiluba bible

Matayi 24

¹Yezu uvua upatuka mu nzubu wa Mvidi Mukulu. Pavuaye wenda uya, balongi bende kusemena kudiye bua kumuleja mushindu uvuabu bibake nzubu wa Mvidi Mukulu.

²Kadi Yezu kubandamuna ne: — Nudi nukema bionsu ebi! Kadi ndi nnujadikila bulelela ne: ku nzubu ewu kakuakushala dibue diambata pa dikuabu to. Bionsu nebiupuke!

³Yezu uvua musombe ku mukuna wa mitshi ya Olive. Ke balongi bende kusemena kudiye bobu nkayabu, bamukonka ne: — Utuambile: malu awu neenzeke diba kaayi? Nebimanye bishi ne: ukadi pa kufika, kabidi ne: ndekelu wa buloba ukadi ukumbana?

⁴Yezu kubandamuna ne: — Nuadimukayi! Muntu kanushimi!

⁵Bualu bantu bavule nebafike, bangata dina dianyi, banuambila ne: “Meme ndi Kristu!” Nebashime bantu ba bungi.

⁶Nenumvue mutoyi wa myita ya pabuipi, ne ngumu ya myita ya kule. Kadi kanutshinyi to. Ebi bionsu bidi ne bua kuenzeka; kadi ki nshikidilu wa buloba to!

⁷Tshisamba netshiluishe tshikuabu. Bukalenga nebuluishe bukuabu. Biyole bia nzala nebienzeke. Buloba nebuzakale miaba mishilangane.

⁸Malu onsu awu neikale bu makenga a kumpala adi akuata mukaji pa lulelu.

⁹Nanku bantu nebanukuate, nebanufile bua banukengeshe. Nebanushipe. Bisamba bionsu nebinukine, bualu nudi nungitaba.

¹⁰Tshikondu atshi bavule nebavile ditaba. Nebelelangane tshitungu, bakinangane.

¹¹Bambi ba dishima ba bungi nebamueneke. Nebadinge bantu bavule.

¹²Bubi nebuvulangane. Nanku dinanga dia bantu ba bungi nedituye.

¹³Kadi wananukila too ne ku ndekelu, nebamusungidile.

¹⁴Lumu lua Disanka, nebalumanyishe mu buloba bujima, bua kujadikila bisamba bionsu ne: Mvidi Mukulu udi unubikila ku Bukalenga buende. Diba adi, nshikidilu wa buloba neafike.

¹⁵— Nenumone tshidibu binyike ne: “Tshinyangu tshipite bubi”, tshivua muambi Danyele mutele.[163] Nebatshiteke muaba wa tshijila. (Udi ubala bualu ebu, abujingulule bimpe!)

¹⁶Diba adi, badi mu Yudeya, baye kusokoma mu mikuna.

¹⁷Wikala ku musonga wa nzubu, katuluki bua kuangata bidi mu nzubu.

¹⁸Wikala mu madimi, kapinganyi kuende bua kuangata tshinkutu tshiende.

¹⁹Matuku awu, nangananga bamamu badi ne mafu, ne badi bamusha bana, nebakenge!

²⁰Nutendelele Mvidi Mukulu, bua kanunyemi tshikondu tshibi, nansha dituku dia Dikisha!

²¹Bualu tshikondu atshi, dikenga nedikale dikole, dipite makenga onsu avua menzeke ku ntuadijilu wa bukua bantu, too ne mpindiewu. Makenga a nanku kaakuenzeka kabidi to.[164]

²²Bu Mvidi Mukulu kayi mukepeshe bungi bua matuku awu, muntu nansha umue kavua mua kupanda. Kadi mmuakepeshe, bualu bua bantu badiye musungule.

²³Nanku pikala muntu unuambila ne: “Tangila, Kristu udi apa,” nansha ne: “Udi kuaka,” kanumuitabi to.

²⁴Bualu baKristu ba dishima ne bambi ba dishima nebamueneke. Nebenze bishima binene, ne malu a dikema, bifuane mua kudinga bantu mene badi Mvidi Mukulu musungule, bu biobi mua kuenzeka.

²⁵Ke meme awu nnumanyisha malu aa, kaayi manji kuenzeka!

²⁶Nanku pikalabu banuambila ne: “Nyewu mu tshipela!” kanuyi to. Nansha banuambila ne: “Udi musokome apa!” kanuitabi to.

²⁷Bu mudi muele wa mvula upenya, umuka kudi diba dipatukila, umueneka diakamue ne kudidi dibuelela, ke muafika Muana wa muntu nanku.

²⁸Padi tshitalu, ke padi nyunyi ya mikanku idisangisha.

²⁹— Pajika matuku a dikenga awu, diakamue diba kadiakumueneka kabidi, ngondu kakukenka, mitotu neituke mulu, makole a mulu neanyungakane.[165]

³⁰Tshimanyinu tshia Muana wa muntu netshimueneke mulu. Bisamba bionsu bia pa buloba nebidile miadi. Nebimone Muana wa muntu utuluka mu mavuba, ne bukole bua bungi, kabidi ne butumbi buonsu.[166]

³¹Mpungi munene neadile. Muana wa muntu neafume batumibue bende ku ntengu inayi ya buloba. Nebasangishe badiye musungule, bafume ku ntengu ne ntengu ya buloba ayi.[167]

³²— Nujingulule tshidi mutshi wa mfiku unuleja. Patshidi ntonga mitekete, matamba asasa, nudi bamanye ne: tshikondu tshia luya tshikadi pabuipi.

³³Momumue kabidi, panuamona bionsu abi, numanye ne: bualu bunene abu budi pabuipi, bukadi ku tshiibi.[168]

³⁴Ndi nnujadikila bulelela ne: bantu ba tshikondu etshi kabakusa bonsu, bualu bujima abu kabuyi buanji kuenzeka.

³⁵Diulu ne buloba nebijimine. Kadi miaku yanyi kashidi kayena ijimina to.

³⁶— Kadi dituku adi, nansha diba adi, muntu nansha umue kena mubimanye, nansha batumibue ba mu diulu, nansha Muana.[169] Anu Tatu nkayende ke udi mubimanye.

³⁷Muvuabi bienzeka mu matuku a Nowa, ke muikalabi kabidi dituku didi Muana wa muntu ufika.

³⁸Mvula mukole awu kayi muanji kuloka, bantu bavua badia, banua, baselangana, baselesha bana babu ba bakaji, too ne ku dituku divua Nowa mubuele mu buatu.[170]

³⁹Bantu kabavua bajingulule bivua bienzeka. Kupapukilabu amu pasua mvula mukole mupite ubanga kuloka, ubabutula bonsu.[171] Ke muafika Muana wa muntu.

⁴⁰Diba adi, pikala bantu babidi mu budimi, nebangate umue, bashiye mukuabu.

⁴¹Pikala bakaji babidi bapela ntete ku dibue, nebangate umue, balekele mukuabu.

⁴²Dimukayi, bualu kanuena bamanye dituku diafika Mfumuenu.

⁴³Numanye bimpe ne: bu muena nzubu mudianze kumanya diba didi muivi mua kufika butuku, neashale mutabale. Kakumulekela upanda nzubu wende to.

⁴⁴Ke panudi ne bua kuikala bamane kudilongolola, bualu Muana wa muntu neafike diba dinudi kanuyi belele meji.

⁴⁵— Muena mudimu muimpe, wa meji, nnganyi? Ngewu udi mfumuende mupeshe mudimu wa kukuba bena mudimu bende, ne wa kubapesha biakudia diba dimpe.

⁴⁶Muena mudimu assu udi ne diakalenga, pikala mfumuende upingana ku nzubu kuende, umusangana wenza mudimu assu.

⁴⁷Ndi nnujadikila bulelela ne: mfumuende neamupeshe bumfumu bua bintu biende bionsu.

⁴⁸Kadi pikala muena mudimu essu muntu mubi, neadiambile mundamunda ne: “Mfumuanyi nyessu ujingakana ku luendu.”

⁴⁹Nanku neatuadije kuluisha bena mudimu nende. Neadie, anue, pamue ne bakuatshiki ba maluvu.

⁵⁰Kadi mfumuende neafike dituku didi muena mudimu asvu kayi mumutekemene, ne diba didiye kayi mumanye.

⁵¹Neanyoke muena mudimu assu bikole.[172] Neamuteke muaba udibu banyoke bena mpala ibidi. Muaba awu neadile muadi, usumakaja menu.