Read Tshiluba Matayi 28 Bible Online

Matayi 28 - Tshiluba bible

Matayi 28

¹Dituku dia Dikisha dimane kupita, patshiatshia dituku dia kumpala dia lumingu, Mariya wa mu Magdala, ne Mariya mukuabu,[212] kufikabu bua kumona lukita.

²Diakamue buloba kuzakala bikole. Mutumibue wa Maweja-Nangila kutuluka mu diulu, kubunguluja dibue divua ku lukita ku luseke, kusombapu.

³Mutumibue awu uvua ukenka bu muele wa mvula. Bilamba biende bivua bitoke too bu ndanda.

⁴Basolayi bavua balama lukita, kukuatshikabu bowa, kuzakala, kufua tshipuka.

⁵Ke mutumibue awu kuambila bakaji ne: — Kanutshinyi to. Ndi mumanye ne: nudi nukeba Yezu, uvuabu bapopele pa mutshi mutshiamakane.

⁶Kena apa to. Ukadi mubike ku bafue muvuaye muambe. Kanumonayi muaba uvua tshitalu tshiende.

⁷Nanku nuye lukasa. Nuambile balongi bende ne: “Ukadi mubike ku bafue. Udi unudianjidila mu Ngalileya.[213] Ke muaba unuaya kumumuena.” Ke tshimvua ne bua kunuambila.

⁸Bakumuka lukasa lukasa ku lukita, ne disanka dinene, kabidi ne bowa munda tente. Kuyabu lubilu bua kumanyisha balongi ba Yezu bualu abu.

⁹Diakamue Yezu kusambakena nabu, wamba ne: — Bupole buikale nenu. Kusemenabu pabuipi nende, kumupukila ku makasa, kumukukuila.

¹⁰Yezu kubambila ne: — Kanutshinyi to. Nuye, nuambile bana betu bua kuyabu mu Ngalileya. Ke muayabu kummuena.

¹¹Patshivua bakaji baya mu njila, basolayi bakuabu balami ba lukita, kufikabu mu tshimenga, balondela bamfumu ba batuangaji bionsu bivua bienzeka.

¹²Nanku bamfumu ba batuangaji ne bakulu kudisangisha. Kupungabu diyi bua kubuejila basolayi. Kubapeshabu makuta a bungi,

¹³babambile ne: — Nenujadike ne: balongi bende mbafike mundankulu. Kuibabu tshitalu tshiende patu-vua balale tulu.[214]

¹⁴Kadi pikala mulombodi wa ditunga mumvue bualu abu, netuyukile nende bua kantatshishi.

¹⁵Basolayi bavua bangata makuta, kuenzabu muvuabu babambile. Bena Yuda badi balondelangana bualu ebu nanku too ne ku lelu.

¹⁶Balongi ba Yezu dikumi ne umue kuya mu Ngalileya, pa mukuna uvuaye mubambile.[215]

¹⁷Pavuabu bamumone, bavua bamukukuila. Kadi bamue ba kudibu batshivua belakana.

¹⁸Ke Yezu kusemena pabuipi nabu, ubambila ne: — Mvidi Mukulu mmumpeshe bumfumu buonsu mu diulu ne pa buloba.

¹⁹Nenku nuye kudi bantu ba bisamba bionsu. Nubenze balongi banyi.[216] Nubatue mu mayi mu dina dia Tatu, dia Muana, ne dia Mueyelu wa Tshijila.

²⁰Nubalongesha kabidi mua kukumbaja bionsu bimvua munuambile. Manyayi ne: Meme nengikale nenu matuku onsu, too ne ku ndekelu kua bidimu.