Read Tshiluba Matayi 5 Bible Online

Matayi 5 - Tshiluba bible

Matayi 5

¹Yezu umona bantu bonsu aba, kubandaye pa mukuna, kusomba. Balongi bende kusemena kudiye.

³— Bantu badi batekemena amu kudi Mvidi Mukulu, ke bena diakalenga, bualu nebikale nende mu Bukalenga bua mu diulu!

⁴Bantu badi banyingalala, ke bena diakalenga, bualu Mvidi Mukulu neabasambe!

⁵Bantu badi ne bupole, ke bena diakalenga, bualu nebapiane buloba buvua Mvidi Mukulu mubalaye!

⁶Bantu badi bajinga muabu muonsu mua kukumbaja bidi Mvidi Mukulu musue, ke bena diakalenga, bualu Mvidi Mukulu neabakumbajile bionsu bidibu bajinga!

⁷Bantu badi bafuila bakuabu luse, ke bena diakalenga, bualu Mvidi Mukulu neabafuile luse!

⁸Bantu badi ne muoyi munonoke, ke bena diakalenga, bualu nebamone Mvidi Mukulu!

⁹Bantu badi basombesha bantu nabu mu bupole, ke bena diakalenga, bualu Mvidi Mukulu neabinyike ne: mbana banyi!

¹⁰Bantu badibu bakengesha bua padibu benza tshidi Mvidi Mukulu musue, ke bena diakalenga, bualu Bukalenga bua mu diulu budi buabu!

¹¹Padi bantu banupenda, banukengesha, nansha babenga bionsu binudi nuenza, amu bualu nudi balongi banyi, nudi bena diakalenga.

¹²Sankayi, sangalayi, bualu Mvidi Mukulu neanusankishe bikole mu diulu. Bambi bavua banudianjidile, bavua babakengesha amu mushindu ewu.[27]

¹³— Bu mudi luepu mu biseki, ke munudi nuenu mu bantu. Kadi pikala luepu lutshipale, tshidi mua kulutuisha kabidi ntshinyi? Kaluena ne diambuluisha kabidi to. Badi baluimansha, bantu baludiata.

¹⁴— Nuenu nudi butoke budi bukenkela bantu pa buloba. Kabena mua kusokoka tshimenga tshiasa pa mukuna.

¹⁵Kabena batemesha muendu bua kuubuikila mu kapanza. Kadi badi bauteka pa tshitekelu tshiawu, bua ukenkele bantu bonsu badi mu nzubu.[28]

¹⁶Ke mudi butoke buenu ne bua kukenkela bantu, bua bamone malu mimpe anudi nuenza, batumbishe Tatu wenu udi mu diulu.

¹⁷— Kanuedi meji ne: ndi mulue bua kubenga mikenji ya Moshe, nansha dilongesha dia bambi. Tshiena mulue kubibenga, kadi kubikolesha.

¹⁸Ndi nnujadikila bulelela ne: too ne muajimina diulu ne buloba, kabena mua kukupula dileta nansha dikese, kalu nansha kamue ka mu mikenji. Bionsu bidi mikenji yamba, nebikumbane.[29]

¹⁹Padi muntu ubenga mukenji, nansha wowu mukese ku yonsu, ulongesha bakuabu mua kuubenga, mu Bukalenga bua mu diulu neikale mukese ku bantu bonsu. Kadi muntu udi utumikila ku mukenji, ulongesha bakuabu mua kuukumbaja, nebamuangate ne mushinga mu Bukalenga bua mu diulu.

²⁰Ndi nnujadikila ne: nenubuele mu Bukalenga bua mu diulu, amu panudi nutumikila ku mikenji ya Mvidi Mukulu, bapite balongeshi ba mikenji, ne Baparushe.

²¹— Nudi bamanye muvuabu bakandike bankambua betu ne: “Kanushipi muntu.[30] Muntu yonsu udi ushipa mukuabu, nebaye nende kudi ndumbulula.”

²²Kadi meme ndi nnuambila ne: muntu yonsu udi ufikila muanabu munda, nebaye nende kudi ndumbulula. Yonsu udi upenda muanabu ne: “Tshidingidingi,” nebaye nende ku Tshipangu tshikulu. Yonsu udi upenda muanabu ne: “Mupale,” nebamuele mu kapia ka mu kandondu.

²³Nanku paudi uya bua kulambula Mvidi Mukulu mulambu webe pa tshilambuilu, wewe muvuluke ne: muanetu udi nanyi bualu,

²⁴shiya mulambu webe awu kumpala kua tshilambuilu, upingane bua wanji kunua tshibalu ne muanenu; pashishe upingane, ulambule Mvidi Mukulu mulambu webe.

²⁵Pikala muntu mukufunde, kabidi nuye nende pamue kudi ndumbulula, keba mua kumvuangana nende lukasa, panutshidi mu njila apu. Kuyi mumvuangane nende, neakukuatshishe kudi mulumbuluishi. Awu pende neakufile kudi mulami wa bena lukanu, bua bakuele mu nzubu wa lukanu.

²⁶Ndi nkujadikila bulelela ne: kuena upatukamu, too ne pawajikija dibanza dionsu.

²⁷— Nudi bamanye muvuabu bakandike ne: “Kanubueledi mukaji wa bende mu nzubu.[31]”

²⁸Kadi meme ndi nnuambila ne: muntu yonsu udi utangila mukaji wa bende, umualakana, mmumane kuenda nende tshiendenda mu muoyi wende.

²⁹Pikala disu diebe dia ku dia balume dikufikisha ku bubi, uditonkone, udimanshe kule. Bualu mbimpe kujimija tshitupa tshimue tshia mubidi webe, pa mutu pa kuelabu mubidi webe mujima mu kandondu.

³⁰Pikala tshianza tshiebe tshia ku dia balume tshikufikisha ku bubi, utshikose, utshimanshe kule. Bualu mbimpe kujimija tshitupa tshimue tshia mubidi webe, pa mutu pa wewe kubuela mu kandondu ne mubidi webe mujima.

³¹— Bavua bamba ne: “Muntu udi wipata mukajende, udi ne bua kumupesha mukanda wa dishipa dia dibaka.[32]

³²Kadi meme ndi nnujadikila ne: muntu yonsu udi ubenga mukajende kashidi (katuena tuamba bua badi bangatangana mu buendenda), udi umusaka ku buendenda pikala mukaji awu mubuele mu dibaka dikuabu. Kabidi muntu yonsu udi wangata mukaji wa bende awu, udi amu wenda tshiendenda.

³³— Nudi bamanye muvuabu bakandike kabidi bankambua betu ne: “Kanunyangi mutshipu wenu. Nukumbaje malaya anuvua balaye Maweja-Nangila.[33]”

³⁴Kadi meme ndi nnukandika ne: kanuditshipi nansha kakese: kanutedi diulu, bualu mmuaba udi Mvidi Mukulu usomba.

³⁵Kanutedi buloba, bualu mmuaba udiye udiata. Kanutedi Yerushalayime, bualu ntshimenga tshia Mukalenga munene.

³⁶Kuditshipa utela mutu webe, bualu kuena mua kufikisha nansha kutekesha lusuki nansha lumue lua ku mutu webe.

³⁷Nuikale nuitaba amu ne: “eyowa”, nansha nubenga ne: “to.” Bionsu binudi nusakidila bidi bifuma kudi Muena bubi.

³⁸— Nudi bamanye muvuabu bambe ne: “Disu dipitakane ne disu, dinu dipitakane ne dinu.[34]”

³⁹Kadi meme ndi nnukandika ne: kanusombuedi muntu udi unuenzela bibi. Padi muntu ukukuma dipi ku ditama dia balume, umuandamuine kabidi ditama dia bakaji.

⁴⁰Pikala muntu mukufunde ku tshilumbu, bua kuangata tshilamba tshiebe tshia pambidi, umulekele, angata kabidi tshinkutu tshiebe.

⁴¹Pikala muntu ukuenzeja ku bukole bua wambule bujitu mutantshi wa kilometre umue, utungunuke ne bujitu abu kilometre ibidi.[35]

⁴²Padi muntu ukulomba tshintu, umupeshe. Padi muntu musue kukusomba tshintu, umusombeshe.

⁴³— Nudi bamanye muvuabu bambe ne: “Nanga muanenu,[36] kina muluishi webe.”

⁴⁴Kadi meme ndi nnuambila ne: nangayi bena lukuna benu, mu ditendelela lombelayi badi banukengesha.

⁴⁵Nanku nenuikale bana ba Tatu wenu udi mu diulu, bualu Yeye udi ubandishila bantu babi ne bantu bimpe diba diende; kabidi udi utekesha mvula bua bantu bonsu, bua badi benza bimpe, ne bua badi benza bibi.

⁴⁶Panudi nunanga anu bantu badi banunanga, nenupete difutu kudi Mvidi Mukulu mushindu kaayi? Nansha balambuishi ba bitadi badi benza pabu nanku!

⁴⁷Panudi nuela anu bana benu muoyi, nudi nuenza bualu bupiabupia bua dikema anyi? Bantu ba bisamba bikuabu badi benza pabu nanku.

⁴⁸Nuikale bantu balenga tshishiki, bu mu Tatu wenu udi mu diulu mulenga tshishiki.[37]