Read Tshiluba Matayi 8 Bible Online

Matayi 8 - Tshiluba bible

Matayi 8

¹Yezu upueka ku mukuna, bantu musumba munene kumulonda.

²Muena nsudi kusemena kudiye, kutua binu kumpala kuende, wamba ne: — Mfumu, bu wewe musue, udi mua kujikija disama dianyi.

³Yezu kuolola tshianza, kumulenga, wamba ne: — Ndi musue, disama diebe dijike! Diakamue disama diende dia nsudi kujikadi.

⁴Pashishe Yezu kumuambila ne: — Teleja bimpe: kuambidi muntu bualu ebu to. Kadi uye kudileja kudi mutuangaji bua ajadike muukadi. Pashishe ulambule mulambu uvua Moshe muambe, bua bantu bonsu bajadike ne: disama diebe ndijike.[44]

⁵Pavua Yezu ubuela mu Kefamawume, mulombodi wa bena myita ba bena Rome, kusemena kudiye, umulomba diambuluisha,

⁶wamba ne: — Mfumu, muena mudimu wanyi mmulale mu nzubu ne disama dia tuneke, ukenga bikole.

⁷Yezu kumuambila ne: — Nenye kujikija disama diende.

⁸Mulombodi kuamba ne: — Mfumu, tshiena mukumbane bua wewe kubuela mu nzubu muanyi to. Kadi tuma amu diyi, disama dia muena mudimu wanyi nedijike.

⁹Meme ndi ku bumfumu bua bantu bakuabu, kabidi ndi ne bena myita bandi ntumina diyi. Ndi ngamba ewu ne: “Yaku!” udi uya; ndi ngambila mukuabu ne: “Lua kuneku!” udi ulua. Pandi ngambila muena mudimu wanyi ne: “Enza mudimu ewu!” udi wenza.

¹⁰Yezu umvua miaku ayi, kukemaye. Kuambilaye bantu bavua bamulonda ne: — Ndi nnuambila bulelela ne: tshiena muanji kumona muntu ne ditaba dia mushindu ewu munkatshi mua bena Izrayele.

¹¹Ndi nnujadikila ne: bantu bavule nebafume luseke ludi diba dipatukila, ne ludidi dibuelela, basombe ne Abrahame, Izake, ne Yakobe mu Bukalenga bua mu diulu.

¹²Kadi bantu bavua mua kuikala mu Bukalenga, nebabimanshe pambelu mu midima, muaba udibu badila, basumakaja menu.

¹³Pashishe Yezu kuambila mulombodi wa bena myita ne: — Pingana kuebe, nebikuenzekele bu mudi ditaba diebe. Disama dia muena mudimu wa mulombodi kujika amu diba mene adi.

¹⁴Yezu kuya ku nzubu kua Petro. Kusanganaye mamuenende wa Petro mu bulalu, usama mubidi luya.

¹⁵Yezu kumulenga tshianza, mubidi luya kumushila muaba. Nanku kujukaye, kutuadija kubakuatshila mudimu.

¹⁶Dilolu kutuadilabu Yezu bantu bavule bavuabu batatshisha kudi mikishi mibi. Yezu kuipata mikishi mibi ayi ku bukole bua diyi diende, kujikija kabidi masama a bonsu bavua kabayi bumvua bimpe.

¹⁷Uvua wenza bionsu ebi bua kukumbaja bivua muambi Yeshaya muambe ne: “Kudiambuilaye butekete buetu; kutumushilaye masama etu.[45]”

¹⁸Yezu umona bantu ba bungi bamuela munkatshi, kuambilaye balongi bende ne: tusabukayi dishiya dia dijiba.

¹⁹Ke mulongeshi wa mikenji kusemena kudiye, umuambila ne: — Mulongeshi, nenkulonde kuonsu kuwaya.

²⁰Yezu kumuandamuna ne: — Nyama ya mibuabua idi ne miaba ya kulala, nyunyi ya kulu ne masua ayi, kadi Muana wa muntu kena ne muaba udiye mua kuikisha, kulala.

²¹Mulongi wende mukuabu kumuambila ne: — Mfumu, ndi nkulomba bua nganji kuya kujika tatu.

²²Yezu kumuandamuna ne: — Katuye, lekela bafue bajike bafue babu.

²³Yezu kubuela mu buatu, balongi bende kuya nende.

²⁴Diakamue tshipepele tshikole kujuka mu dijiba, mavuala kubuikila buatu, kuwulabu mayi tente. Kadi Yezu uvua amu mulale.

²⁵Balongi bende kumubisha, bamuambila ne: — Mfumu, utusungile, tudi mua kufua!

²⁶Yezu kubakonka ne: — Tshinudi nutshina ntshinyi? Ditaba dienu ndikese ditambe! Ke Yezu kujuka, kukanyina tshipepele, ne mayi a dijiba. Kubatamabi bataa.

²⁷Kukemabu bonsu, bebejangana ne: — Ewu mmuntu kaayi udibu bitaba ne kudi tshipepele, ne kudi mayi a dijiba?[46]

²⁸Yezu ufika dishiya dia dijiba, mu buloba bua bena Ngadara,[47] kusambakenaye ne bantu babidi bavua bapatuka mu nkita. Bantu aba bavua babatatshisha kudi mikishi mibi. Bavua ne lonji lukole, muntu kayi mua kupita mu njila awu to.

²⁹Ke bobu kuela mbila ne: — Muana wa Mvidi Mukulu, butudi nebe mbunganyi? Udi mufike bua kutunyoka, diba kadiyi dianji kukumbana, bua tshinyi?

³⁰Pabuipi ne muaba awu pavua tshisumbu tshinene tshia ngulube,[48] ikeba biakudia.

³¹Mikishi mibi kulomba Yezu ne: — Paudi utuipata, ututume mu tshisumbu tshia ngulube etshi.

³²Yezu kuitaba ne: — Ndayi. Mikishi ivua bantu babidi aba nayi kupatuka, kubuela mu ngulube. Diakamue tshisumbu tshia ngulube kupulumuka pa tshibungubungu, kudiela mu dijiba, kufila mu mayi.

³³Bantu bavua balama ngulube kunyema, kuya mu tshimenga, kulonda malu onsu, ne bualu mene buvua buenzekela bantu babidi bavua ne mikishi mibi.

³⁴Ke bena mu tshimenga bonsu kuya kusambakena ne Yezu. Bamumona, kumusengelelabu bua kumukaye mu buloba buabu.