Read Tshiluba Marke 1 Bible Online

Marke 1 - Tshiluba bible

Marke 1

¹Mukanda ewu udi mbangilu wa Lumu lua Disanka lua Yezu Kristu, Muana wa Mvidi Mukulu.[1]

²Mu mukanda wa muambi Yeshaya mbafunde mudi Mvidi Mukulu wamba ne: “Ndi ntuma mutumibue wanyi kumpala kuebe, bua kukunzuluila njila.

³Ke muntu udi wela lubila mu tshipela ne: Longololayi njila wa Maweja-Nangila, muludikilayi tujila tuende![2]”

⁴Ke muvua Yowanane mumueneke mu tshipela nanku, uvua utua bantu mu mayi, wela diyi ne: — Kudimunayi nsombelu wenu, banutue mu mayi, Mvidi Mukulu neanujimijile mibi yenu.[3]

⁵Bantu bonsu ba mu ditunga dia Yudeya ne bena mu tshimenga tshia Yerushalayime bavua baye kudiye, batonda patoke mibi yabu. Yowanane uvua ubatua mu mayi a mu musulu wa Yardene.

⁶Yowanane uvua muvuale tshilamba tshia miosa ya kamelu, ne mukaba wa tshiseba mu tshimonu.[4] Uvua udia mpasu ne buitshi bua muitu.

⁷Uvua umanyisha bantu bavule ne: — Kudi muntu udi undonda meme mu nyima, udi mumpite ku muanzu. Tshiena nansha mukumbane mua kuinama, bua kusulula nshinga ya bisabata biende.

⁸Meme ndi nnutua mu mayi. Kadi yeye neanutue mu Mueyelu wa Tshijila.

⁹Mu matuku awu, Yezu uvua utumina ku Nazarete, musoku wa mu Ngalileya. Ke Yowanane kumutua mu mayi mu musulu wa Yardene.

¹⁰Amu diakamue Yezu upatuka mu mayi, kumonaye diulu dibululuke. Mueyelu wa Tshijila upueka pa mutu pende bu nyunyi wa nkudimba.

¹¹Kumvuaye diyi difuma mu diulu ne: — Wewe udi muananyi undi munange. Ndi nsanka bikole bualu buebe.[5]

¹²Diakamue pashishe, Mueyelu wa Mvidi Mukulu kulombola Yezu mu tshipela.

¹³Kushalayemu matuku makumi anayi. Diabolu kumuteta. Yezu uvua munkatshi mua nyama ya tshisuku, batumibue ba Maweja-Nangila bavua bamuambuluishe.

¹⁴Bamane kuela Yowanane mu lukanu,[6] Yezu kuya mu Ngalileya. Uvua wenda ulongesha bantu Lumu lua Disanka lua Mvidi Mukulu.

¹⁵Uvua wamba ne: — Diba divuabu bafunde diakumbanyi, ndimane kukumbana. Bualu Bukalenga bua Mvidi Mukulu bukadi pabuipi. Kudimunayi nsombelu yenu,[7] itabayi Lumu lua Disanka.

¹⁶Yezu uvua wendakana ulonda muelelu wa dijiba dia Ngalileya. Kumonaye balobi ba mishipa babidi: ke Simone ne muanabu Andre, bela makondu abu mu dijiba.

¹⁷Yezu kubabikila ne: — Katuyayi, nennuvuije bilembi bidi biloba bantu.

¹⁸Diakamue, kulekelabu makondu abu, kumutua mu nyima.

¹⁹Yezu utungunuka amu mutantshi, kumonaye Yakobe ne muanabu Yowanane, bana ba Zebede. Bavua mu buatu buabu, balongolola makondu abu.

²⁰Diakamue Yezu kubabikila. Bobu kushiya tatuabu Zebede mu buatu ne bena mudimu, kutuabu Yezu mu nyima.

²¹Yezu ne balongi bende kuyabu mu tshimenga tshia Kefamawume. Dituku dia Dikisha, Yezu kubuela mu nzubu wa kutendelela wa bena Yuda. Kubangaye kulongesha bantu.

²²Bantu bavua bamuteleja bavua bakema bikole bua dilongesha diende, bualu kavua ubalongesha mushindu umue ne balongeshi ba mikenji, kadi uvua ulongesha ne bumfumu.

²³Amu diba adi, muntu kumueneka mu nzubu wa kutendelela amu, muikale ne mukishi mubi munda, umutatshisha. Kuelaye lubila ne:

²⁴— Wewe Yezu wa mu Nazarete, udi musue kutuenzela tshinyi? Udi mulue kutubutula anyi? Ndi mumanye bimpe ne: udi wa Tshijila, Mvidi Mukulu mmukutume!

²⁵Yezu kukanyina mukishi mubi, kuwambila ne: — Puwa, patuka munda mua muntu ewu!

²⁶Mukishi mubi kupaluisha bikole muntu awu, kupatukawu munda muende wela lubila lukole.

²⁷Bantu bonsu kukema bikole, bebejangana ne: — Edi ndiyi dia mushindu kaayi? Ndilongesha dipiadipia didi ne diyi dia bumfumu. Muntu ewu udi utumina mikishi mibi diyi, imuitaba!

²⁸Lumu lua Yezu kutangalaka ne lukasa luonsu mu ditunga dia Ngalileya dijima.

²⁹Bobu kupatuka mu nzubu wa kutendelela wa bena Yuda. Kuyabu diakamue kua Simone ne Andre. Kubatuabu mu nyima kudi Yakobe ne Yowanane.

³⁰Mamuende wa Simone uvua muikale ne mubidi luya, usama. Diakamue Yezu ufika, kumuambilabu bua mamu awu.

³¹Kuyaye kudiye, kumukuata ku tshianza, kumuimanyikaye kulu. Disama dia mubidi luya kujikadi, kutuadijaye kubalongoluela biakudia.

³²Ku dilolu, diba[8] dimane kubuela, bantu kutuadilabu Yezu babedi bonsu ne bavua ne mikishi mibi.

³³Bantu bonsu ba mu tshimenga bavua bunguile kumpala kua tshiibi tshia nzubu.

³⁴Yezu uvua ujikija masama a bantu ba bungi, bavua ne masama a mishindu mishilangane, uvua wipata kabidi mikishi mibi ya bungi. Kavua musue bua mikishi mibi yakule bualu buende, bualu ivua munumanye.

³⁵Dinda dionsu, butuku kabuyi buanji kutshia, Yezu kujuka, kupatuka mu nzubu. Kumukaye mu tshimenga, kuyaye muaba wa pa nkayende, kubangaye kutendelela.

³⁶Kadi Simone ne balunda bende kuyabu kumukeba.

³⁷Bamumona, kumuambilabu ne: — Bantu bonsu badi bakukeba.

³⁸Kadi Yezu kubambila ne: — Tuyayi mu miaba mikuabu ya mu misoku itudi nayi mutumba. Ndi ne bua kumulongesha kabidi. Bualu ke bundi muvuile.

³⁹Yezu uvua wendakana mu Ngalileya mujima, ulongesha mu nzubu ya kutendelela ya bena Yuda, uvua wipata ne mikishi mibi.

⁴⁰Muena nsudi kufika kudi Yezu, kumufuila binu, umusengelela wamba ne: — Bu wewe musue, udi mua kungondapaku.

⁴¹Yezu kumumvuila luse lua bungi.[9] Kuololaye tshianza, kumulenga, umuambila ne: — Ndi musue, disama diebe diajiki!

⁴²Diakamue nsudi kujika pambidi pa muntu, yeye kupanda.

⁴³Pashishe Yezu kumukandika bikole, umutuma diakamue,

⁴⁴umuambila ne: — Teleja, kuambidi muntu bualu ebu to. Kadi uye kudileja kudi mutuangaji, akukenkete, pashishe ulambule mulambu udi Moshe mufunde bua kujadikila bantu bonsu ne: udi mupande.[10]

⁴⁵Kadi muntu awu uya, kubangaye kulondela bantu bonsu bualu buvua bumuenzekele. Nanku Yezu katshivua mua kumueneka kabidi mu tshimenga, uvua amu mushale muaba wa nkayende. Bantu ba nseke yonsu bavua baye kudiye.