Read Tshiluba Marke 11 Bible Online

Marke 11 - Tshiluba bible

Marke 11

¹Pasuabu bamane kusemena pamue ne Yerushalayime, pabuipi ne musoku wa Betfaje ne wa Betanya, kufikabu ku mukuna wa Olive.[80] Yezu kudianjila kutuma balongi babidi,

²ubambila ne: — Ndayi mu musoku udi kumpala wawa. Panudi nufika anu momu, nenusangane muana wa nyama wa mpunde musuike, udi muntu nansha umue kayi muanji kubanda. Numusulule, nulue nende muaba essu.

³Muntu yeye munukonke ne: “Nudi nuenza nanku bua tshinyi?” Numuambile ne: “Mfumu udi nende dijinga, neamupingaje mpindiessu.[81]”

⁴Kuyabu kusangana muana wa mpunde, musuike pambelu pabuipi ne tshiibi, mu musesu. Bobu kumusulula.

⁵Bamue bantu bavua muaba assu kubakonka ne: — Nudi nuenza tshinyi? Nudi nusulula muana wa nyama wa mpunde ewu bua tshinyi?

⁶Balongi kuandamuna amu umvua Yezu mubambile, nanku bantu abu kubalekela bobu kuya.

⁷Kuyabu ne muana, wa nyama wa mpunde kudi Yezu, kuteka bilamba biabu pa nyama, Yezu kusombapu.[82]

⁸Bantu ba bungi kuadija bilamba mu njila, bakuabu kumuteka bisala bibishi bisuabu bakose mu madimi.[83]

⁹Bavua bapita kumpala kua Yezu ne bavua bamulonda, bavua bela mbila ne: — Tutumbishayi Mvidi Mukulu! Mvidi Mukulu alabe muntu udi uvua mu dina dia Maweja-Nangila, lupemba!

¹⁰Mvidi Mukulu ele bukalenga budi buvua lupemba, bukalenga bua nkambua wetu Davide! Tutumbishayi Mvidi Mukulu mu diulu![84]

¹¹Yezu kubuela mu Yerushalayime, kuyaye mu nzubu wa Mvidi Mukulu. Yeye mumane kutangila bionsu, kuyaye ku Betanya ne balongi bende dikumi ne babidi, bualu diba dikavua dimane kuya.

¹²Butshia, bobu bamane kumuka mu Betanya, Yezu kumvua nzala.

¹³Kumonaye mutshi wa mfiku pa bule musampile. Kuyaye kutangila bua kumona ne udiku mua kuikala mukuama bimuma. Kadi ufika pabuipi ne mutshi, kusanganaye amu mabeji, bualu katshivua tshikondu tshia mutshi wa mfiku kukuama nansha.

¹⁴Yezu kutshipa mutshi awu ne: — Kashidi muntu nansha umue kena mua kudia bimuma biebe! Balongi bende bavua bamuteleja.

¹⁵Pashishe kufikabu mu Yerushalayime. Yezu kubuela mu nzubu wa Mvidi Mukulu. Kubangaye kuipatamu bavua basumbisha ne bavua basumba bintu muaba awu. Kutonkolaye mesa a bashintudi ba makuta ne nkuasa ya basumbishi ba nkudimba.[85]

¹⁶Kavua muanyishe bua muntu kuambulaye tshintu upitshila mu nzubu wa Mvidi Mukulu.

¹⁷Pashishe kubalongeshaye wamba ne: — Mu Mukanda wa tshijila mbafunde ne: “Nebabikile nzubu wanyi ne: nzubu udi bantu ba bisamba bionsu mua kutendelela.” Kadi nuenu nudi bamuenze muaba udi bivi mua kusokomena![86]

¹⁸Batuangaji banene ne balongeshi ba mikenji bumvua bualu abu, kukebabu mushindu wa kushipesha Yezu. Kadi bavua bamutshina, bualu bantu bavule bavua bakema bikole bua dilongesha diende.

¹⁹Ku dilolu, Yezu ne balongi bende kupatukabu mu tshimenga.[87]

²⁰Butshia dinda, pavuabu bapita mu njila, kumonabu mutshi wa mfiku mumane kuuma onsu ne ku miji.

²¹Petro kuvuluka bivua bienzeka, kuambilaye Yezu ne: — Mulongeshi, tangila mutshi wa mfiku uuvua mutshipe, mmumane kuuma onsu.

²²Yezu kuambila balongi bende ne: — Ndi nnujadikila ne: Nuenu, itabayi Mvidi Mukulu!

²³Muntu muambile mukuna ewu ne: “Umuka udiele mu mayi manene.” Padiye kayi ne mpata mu muoyi wende, kadi muitabe ne: tshidiye wamba netshienzeke, tshiotshi netshienzeke.

²⁴Ke pandi nnuambila ne: Panudi nutendelela bua kulomba tshintu, nuitabe ne: nudi bamane kutshipeta kundi, nebanupeshetshi.

²⁵Ne panudi bimane kulu bua kutendelela, panudi bajilangana ne muntu kampanda, numutuile luse, bua Tatu wenu udi mu diulu anulekele mibi yenu kabidi. [

²⁶Kadi panudi kanuyi nulekela bakuabu mibi yabu, Tatu wenu udi mu diulu kena mua kunutekela yenu mibi kabidi.[88]]

²⁷Kupinganabu kabidi mu Yerushalayime. Pavua Yezu wendakana mu nzubu wa Mvidi Mukulu, bamfumu ba batuangaji, balongeshi ba mikenji ne bakulu kuyabu kudiye,

²⁸bamukonka ne: — Udi wenza malu aa ne bukenji kaayi? Udi mukuambile bua kuenza nnganyi?

²⁹Yezu kubandamuna ne: — Meme kabidi nennuele amu dikonka dimue, nuenu bangandamune, nennuambile bukenji bundi ngenza nabu malu aa.

³⁰Uvua mutume Yowanane bua kutua[89] bantu mu mayi nnganyi? Udi mua kuikala Mvidi Mukulu, anyi mbantu? Ngandamunayi.

³¹Bobu kubangabu kuelangana mpata munkatshi muabu, bambilangana ne: — Tuetu bandamuna ne: “Mvidi Mukulu, ke uvua mumutume,” neatukonke ne: “Kanuvua bitabe Yowanane bua tshinyi?”

³²Kadi tuetu bamba ne: “Bantu mbavua bamutume…” (Bavua batshina bantu, bualu buonsu bavua bela meji ne: Yowanane uvua muambi mulelela.)

³³Ke kuandamunabu Yezu ne: — Katuena bamanye to. Ke Yezu kabidi kubambila ne: — Meme kabidi tshiena nnuambila bukenji bundi ngenza nabu malu aa nansha.