Read Tshiluba Marke 13 Bible Online

Marke 13 - Tshiluba bible

Marke 13

¹Pavua Yezu upatuka mu nzubu wa Mvidi Mukulu, umue wa ku balongi bende kumuambila ne: — Mulongeshi, utangile mudi mabue aa mimpe, ne bunene budi nzubu ewu.

²Yezu kumuandamuna ne: — Udi mumone nzubu minene eyi anyi? Kakuakushala dibue nansha dimue diambata pa dikuabu nansha, bionsu nebiupuke.

³Yezu uvua musombe pa mukuna wa Olive, buludiludi ne nzubu wa Mvidi Mukulu. Petro, Yakobe, Yowanane, ne Andre kumukonkabu pa nkayabu ne:

⁴— Utuambile diba didi bia nanku mua kuenzeka, kabidi ne tshimanyinu tshidi mua kuleja tshikondu tshidi bionsu abi ne bua kuenzeka.

⁵Yezu kubanga kubambila ne: — Nuadimukayi, muntu kanushimi.

⁶Bantu ba bungi nebalue bangata dina dianyi, badiamba ne: “Memendi Meshiya!” Nebashime bantu ba bungi.

⁷Panumvua mutoyi wa bantu bakula, kanupampakanyi nansha. Bidi bimpe bua bia nanku bienzeke, kadi ki nshikidilu wa panu nansha.

⁸Tshisamba netshiluishe tshisamba tshikuabu. Bukalenga nebuluishangane ne bukalenga bukuabu. Bikumina nebienzeke mu matunga mashilangane. Biyole bia nzala nebienzeke. Nebikale bu makenga a kumpala adi akuata mukaji pa lulelu.

⁹“Kadi nuenu, dimukayi. Bualu bantu nebanufikishe ku tubadi. Bantu nebanututshishile mitshi mu nzubu ya kutendelela ya bena Yuda. Nenuimane kumpala kua balombodi ba buloba ne kua bakalenga, bua kubajadikila bimvua muambe.

¹⁰Bidi bimpe bangabanga banji kulongesha bantu bonsu Lumu lua Disanka.

¹¹Panukuatabu bua kuya nenu ku kabadi, kanudianji kupampakana bua binudi mua kuamba. Kadi diba adi, nenuambe miaku idibu banupa. Bualu kayena ifumina kunudi, nkudi Mueyelu wa Tshijila.

¹²Bantu nebafile bana babu menemene bua kubashipabu. Kabidi batatu nebenzele bana babu badibu balela momumue. Bana nebabenge baledi babu, nebabashipeshe.[103]

¹³Bantu bonsu nebanukine bualu nudi bannange. Kadi muntu udi unanukila too ne ku ndekelu, neapande.”

¹⁴— (Muntu udi ubala bualu ebu ajingulule tshidibu basue kumvuija:) “Tshinyangu tshipite bubi.” Nenumone tshinyangu tshia dibutuka tshishindamena muaba uditshi katshiyi ne bua kuikala.[104] Nenku bantu bikale mu Yudeya nebanyemene ku mikuna.

¹⁵Muntu wikala pa musonga wa nzubu wende, kena ne bua kutuluka bua kuangata bintu bidi mu nzubu.

¹⁶Muntu wikala mu budimi kapinganyi kuende bua kuangata tshinkutu tshiende.

¹⁷Bakaji badi ne mafu ne badi bamusha bana mabele nebikale ne diakabi dipite mu matuku awu!

¹⁸Nulombe Mvidi Mukulu bua malu aa kaenzeki mu tshikondu tshia mashika!

¹⁹Bualu mu matuku awu, dikenga nedikale dipite bukole bua makenga onsu adi bantu bamane kumanya katshia bafuka bintu bionsu, too ne mpindiewu, kakuena mua kuikala dikenga difuanangane[105] ne dia mushindu ewu nansha.

²⁰Bu Maweja-Nangila kayi mukepeshe bungi bua matuku awu, muntu nansha umue kavua mua kupanda. Kadi mmuakepeshe bua bantu bende badiye musungule.

²¹Pikala muntu unuambila ne: “Tangilayi Meshiya udi apa!” nansha ne: “Udi papa,” kanuitabi to.

²²Bualu ba Meshiya ba dishima ne bambi ba dishima nebafike, nebenze bimanyinu ne bishima bua kupeta mushindu wa kushima bantu badi Mvidi Mukulu mumane kusungula.

²³Nenku, nuenu nuadimukayi! Ndi mudianjile kunumanyisha bionsu.

²⁴— Kadi mu matuku awu, makenga mamane kuenzeka, diba nedibuitshidile, ngondu kakukenka kabidi.

²⁵Mitotu neyikuluke kulu. Makole onsu adi mulu neatshikakane.[106]

²⁶Diba adi nebamone Muana wa muntu uluila mu mavuba, pamue ne bukole bua bungi ne butumbi.[107]

²⁷Neatume batumibue ba Mvidi Mukulu ku ntengu inayi ya buloba, bua kukunguja bantu bavua Mvidi Mukulu musungule mu buloba bujima.[108]

²⁸— Nuangatshile tshilejilu pa mutshi wa mfiku. Padi matamba awu ela ntonga, mabeji asasa, nudi numanya ne: tshikondu tshia mvula tshidi pabuipi.

²⁹Bidi momumue kabidi, panuamona malu aa enzeka, mimanye ne: Muana wa muntu udi pabuipi, ukadi makasa mu njila.[109]

³⁰Ndi nnujadikila ne: bena lelu kabakufua bonsu kabayi banji kumona bionsu ebi bienzeka.

³¹Diulu ne buloba nebijimine, kadi miaku yanyi kayakujimina tshiendelele.

³²— Kadi bua dituku adi nansha diba, muntu nansha umue kena mubimanye. Batumibue ba Mvidi Mukulu nansha Muana wa muntu kabena bamanye. Amu Tatu nkayende.

³³Nuadimukayi, tabalayi, bualu kanuena bamanye diba didi tshikondu tshikumbana.

³⁴Nebikale bu mudi muntu uya ku luendu, ushiya nzubu wende, ushila bena mudimu bende bumfumu, upesha muntu yonsu mudimu wa kuenza, pashishe welela mulamiwa tshiibi mukenji bua kushalaye mutabale.

³⁵Nenku tabalayi, bualu kanuena bamanye diba diapingana muena nzubu, bumue ndilolu, nansha mmundankulu, nansha mpa bitala nansha dinda.

³⁶Nutshine bua kafiki bu ntumba wa tshintuluntulu, kanusanganyi balale tulu.

³⁷Bindi nnuambila ebi, ndi nnuambila bonsu ne: Tabalayi!