Read Tshiluba Marke 14 Bible Online

Marke 14 - Tshiluba bible

Marke 14

¹Kutshivua kushala matuku abidi bua tshibilu tshia Dipita dia Maweja-Nangila ne tshia mampa kaayi mela[110] buanga kuenzekatshi. Bamfumu ba batuangaji ne balongeshi ba mikenji bavua bakebela pa kukuatshila Yezu mu musokoku ne kumushipa.

²Bavua bambilangana ne: — Katuena mua kumukuatshila munkatshi mua tshibilu to. Bualu bantu badi mua kujula mutoyi.

³Yezu utshivua ku Betanya, mu nzubu mua Simone muena nsudi. Pavuaye musombe bua kudia, mukaji kubuela ne mulangi tente wa manananshi[111] a mushinga mukole, kaayi masangisha ne tshintu tshikuabu. Kuukangulaye, kuelaye Yezu manananshi mu mutu.

⁴Bamue ba ku bantu bavua muaba awu kufikabu munda, babambila ne: — Tshidibu banyangila aa manananshi nenku ntshinyi?

⁵Bavua mua kuapana ku mushinga mupite ku nkanu nkama isatu ya tshiamu tshitoke tshia mushinga mukole,[112] bua kumona mua kupesha bapele. Bavua badiwula mukaji ewu bikole.

⁶Kadi Yezu kuamba ne: — Mulekelayi. Nudi numutatshishila tshinyi? Tshidiye mungenzele ntshimpe.

⁷Bualu nenuikale[113] ne bapele matuku onsu, nenku misangu yonsu inudi basue nudi mua kubenzela bimpe. Kadi meme kanuena nanyi matuku onsu to.

⁸Yeye mmuenze muende muvuaye namu. Mmudianjile kulaba mubidi wanyi manananshi bua kuujika.[114]

⁹Ndi nnujadikila ne: mu buloba bujima miaba yonsu idibu balongesha Lumu lua Disanka, bantu nebalonde kabidi bidi mukaji ewu muenze, bua kumuvuluka.

¹⁰Pashishe Yudase Iskariyote, umue wa ku balongi dikumi ne babidi, kuyaye kudi bamfumu ba batuangaji bua afile Yezu mu bianza biabu.

¹¹Bobu kusanka bikole. Kumulayabu bua kumupesha makuta. Ke Yudase kubanga kukeba mushindu muimpe uvuaye mua kufila Yezu mu bianza biabu.

¹²Dituku dia kumpala dia tshibilu tshia mampa kaayi mela buanga, divuabu balambula bana ba mikoku bua didia dia tshibilu tshia Dipita dia Maweja-Nangila, balongi ba Yezu kumukonka ne: — Udi musue tukulongoluele didia dia tshibilu tshia Dipita dia Maweja-Nangila penyi?

¹³Ke Yezu kutuma balongi babidi ba ku balongi bende, ubambila ne: — Nuye mu tshimenga. Nenusambakene ne muntu mulume muambule mulondu wa mayi. Numulonde.

¹⁴Muaba wabuelaye, nuambile muena lubanza ne: “Mulongeshi udi ukonka ne: tshibambalu tshindi mua kudila didia dia Dipita dia Maweja-Nangila ne balongi banyi, tshiepi?”

¹⁵Yeye neanuleje kulu kua nzubu, tshibambalu tshinene, tshimane kulongolola ne bintu biamu bionsu. Ke muaba unuatulongoluela didia awu.

¹⁶Balongi kuya, kufikabu mu tshimenga. Kusanganabu bionsu bu muvua Yezu mubambile. Kulongololabu didia dia tshibilu tshia Dipita dia Maweja-Nangila.

¹⁷Dilolu, Yezu kufika ne balongi dikumi ne babidi.

¹⁸Pavuabu badia ku mesa, Yezu kuamba ne: — Ndi nnujadikila ne: umue wa kunudi, utudi tudia nende, neantungile tshitungu.[115]

¹⁹Balongi kubanga kunyingalala, bamukonka ku muntu ku muntu ne: — Udi mua kuikala meme anyi?

²⁰Yezu kubandamuna ne: — Mmuntu umue wa ku nuenu dikumi ne babidi, utudi tutua nende diampa diende mu dilongu disalame.[116]

²¹Bulelela, Muana wa muntu neafue bilondeshile mudibu bafunde mu Mukanda wa tshijila bualu buende.[117] Kadi muntu udi uyila Muana wa muntu tshitungu, mmuena dikasa dibi! Bivua kuikala bitambe buimpe bua kabaledi muntu awu to.

²²Pavuabu badia, Yezu kuangata diampa, yeye mumane kuela Mvidi Mukulu tuasakidila, kudikosololaye, kudiabanyinaye balongi bende, ubambila ne: — Angatayi etshi, mmubidi wanyi.

²³Pashishe kuangataye kabidi dikopu dia maluvu a nwinyo, yeye mumane kuela Mvidi Mukulu tuasakidila, kudipeshaye balongi bende, bobu kunuinamu bonsu.

²⁴Yezu kubambila ne: — Etshi mmashi anyi, avua mapumuka bua ba bungi, bua kushindika ndondu uvua Mvidi Mukulu mutue ne bantu.[118]

²⁵Ndi nnujadikila ne: tshiena mua kunua kabidi maluvu a nwinyo too ne ku dituku dindi mua kunua nwinyo mupiamupia mu Bukalenga bua Mvidi Mukulu.

²⁶Pashishe kuimbabu misambu ya kuela Mvidi Mukulu tuasakidila,[119] kuyabu ku mukuna wa Olive.

²⁷Yezu kuambila balongi bende ne: Nenuye bonsu, nenunshiye. Bualu mbafunde mu Mukanda wa tshijila ne: “Nenshipe mulami wa mikoku, mikoku itangalake.[120]”

²⁸Kadi, Yezu kubambila kabidi ne: — Pangikala mubiike ku lufu, nendianjile kumpala kuenu mu Ngalileya.

²⁹Petro kumuambila ne: — Nansha bakuabu bonsu bakushiye, meme tshiena mua kukushiya nansha.

³⁰Nanku Yezu kumuandamuna ne: — Ndi nkujadikila ne: lelu, butuku ebu mene, tshitala katshiyi tshianji kusama misangu ibidi, wewe newikale munwile misangu isatu ne tshiena mumumanye to.

³¹Kadi Petro kushindika bikole kabidi ne: — Nansha bua kufua nebe, tshiena mua kukuvila ne tshiena mukumanye to. Balongi bakuabu bonsu kuambabu bia momumue.

³²Kufikabu ku muaba udibu babikila ne: Ngetsemani.[121] Yezu kuambila balongi bende ne: — Sombayi apa, ntshidi nya kutendelela.

³³Kuangataye Petro, Yakobe ne Yowanane. Kubangaye kumvua buowa ne dipampakana dikole,

³⁴kubambilaye ne: — Muoyi wanyi udi tente ne dibungama too ne ku lufu. Shalayi apa, ikalayi batabale.

³⁵Kuyaye kule kakese, kudiela panshi, utendelela bua bu biobi mua kuenzeka, dikenga adi kadifiki kudiye to.

³⁶Uvua wamba ne: — Tatu wanyi,[122] kakuena tshidi mua kukukolela to. Ungumushile dikopu edi dia dikenga. Kadi kabienzeki mundi musue, bienzeke amu muudi musue wewe!

³⁷Kupinganaye kudi balongi basatu, kubasangana balale tulu. Kuambilaye Petro ne: — Simone, udi mulale anyi? Kuena ne bukole bua kushala mutabale nansha diba dimue anyi?

³⁸Shalayi batabale nutendelele, bua kanulenduki. Muoyi wa muntu udi mulongolole mua kuenza bionsu, kadi mubidi wende udi ne butekete.

³⁹Yezu kuya tshiakabidi, kutendelela wambulula miaku ya momumue.

⁴⁰Pashishe kupinganaye kudi balongi bende, kubasangana balale tulu. Mesu abu avua abungila ne tulu. Bavua amu bamuandamuina ku tulu.

⁴¹Kupinganaye musangu muisatu, ubambila ne: — Nutshidi balale tulu, bikishe? Biakumbanyi. Diba diakanyi. Tangilayi, nebafile Muana wa muntu mu bianza bia bantu babi.

⁴²Jukayi, tuye! Muntu udi untungila tshitungu mmumane kufika!

⁴³Diakamue patshivua Yezu wakula, ke Yudase, umue wa ku balongi dikumi ne ba bidi kufikaye pamue ne bantu bavule, bikale ne miele ya nwita ne mitshi. Bavua babatume kudi bamfumu ba batuangaji, balongeshi ba mikenji ne bakulu.

⁴⁴Yudase uvua mutangile Yezu tshitungu uvua mumane kuambila bantu abu tshimanyinu tshivuaye ne bua kubaleja ne: “Muntu ungela mu tshitupa awu ke yeye unudi nujinga. Numukuate, nuye nende bamulame bimpe.”

⁴⁵Diakamue Yudase ufika, kusemenaye kudi Yezu, umuamba ne: — Mulongeshi! Pashishe kumuelaye mu tshitupa.

⁴⁶Bakuabu kukuatabu Yezu.

⁴⁷Ke umue wa ku bavua nende kutula muele wende wa nwita, kutapa muena mudimu wa mutuangaji munene, kumukosa ditshi.[123]

⁴⁸Yezu kubakonka ne: — Meme ndi bu muivi panudi balue ne miele ya mvita ne mitshi bua kunkuata anyi?

⁴⁹Matuku onsu mvua munkatshi muenu, nnulongeshila mu nzubu wa Mvidi Mukulu, kanutua bankuate nansha. Kadi bidi bienzeka nenku bua bidibu bafunde mu Mukanda wa tshijila bikumbane.

⁵⁰Ke balongi bonsu kumushiya nkayende, kunyemabu.[124]

⁵¹Umue nsongalume uvua ulonda Yezu, uvua mutuale anu tshilamba tshia kudibuikila pa kulala. Bavua basue kumukuata,

⁵²kadi yeye kushiya tshilamba tshia kudibuikila pa kulala atshi, kunyema butaka.

⁵³Kuyabu ne Yezu kua mutuangaji munene. Muaba uvuabu basangile kudi bamfumu bonsu ba batuangaji, bakulu ne balongeshi ba mikenji.

⁵⁴Petro uvua ulonda Yezu pa bule. Kubuelaye munda mua lubanza lua nzubu wa mutuangaji munene. Muaba awu, kusombaye ne balami, ota kapia.

⁵⁵Bamfumu ba batuangaji ne bonsu bena Tshipangu tshikulu bavua bakeba bualu bua kushiminyina Yezu, bua kumonabu mua kumufundila tshibawu tshia lufu, kadi kabatua babupeta nansha.

⁵⁶Bantu ba bungi bavua basonguela Yezu,[125] kadi kabatua bajadika bualu bua momumue to.

⁵⁷Bakuabu batua bajuka, bamushiminyina ne:

⁵⁸— Tutua bumvue wamba ne: “Nengupule nzubu wa Mvidi Mukulu ewu utua bantu base, mu matuku asatu nengase mukuabu udi bantu kabayi basa.[126]”

⁵⁹Kadi nansha ku miaku ya nanku mene, kabatua bajadika bualu bua momumue nansha.

⁶⁰Mutuangaji munene kujuka munkatshi mua bantu bonsu, kukonka Yezu ne: — Kuena wandamuna bualu nansha bumue anyi? Bantu aba badi bakusonguela bua tshinyi?

⁶¹Kadi Yezu utua mupuwe, kavua wandamuna to. Mutuangaji munene kumukonka tshiakabidi ne: — Udi Meshiya, Muana wa Mvidi Mukulu utudi mua kutumbisha anyi?

⁶²Yezu kuandamuna ne: — Eyowa, mmeme. Kabidi nenumone Muana wa muntu musombe ku dia balume dia Mvidi Mukulu wa bukole buonsu. Nenumumone kabidi uluila mu mavuba a mu diulu.[127]

⁶³Ke mutuangaji munene kudipanda bilamba, wamba ne: — Katuena tukengela kabidi bajadiki ba tshilumbu to.

⁶⁴Nudi badiumvuile mudiye upenda Mvidi Mukulu. Nudi nuela meji kaayi? Bonsu kuambabu ne: bamufundile tshibawu tshia lufu.[128]

⁶⁵Bamue ba kudibu kubanga kutuila Yezu mate pambidi, bamubuikila tshilamba ku mpala, bamutuuta bisusu bamuamba ne: — Jandula udi ukuenza nanku awu. Basolayi kumuangata, kumutuuta mapi.[129]

⁶⁶Petro utshivua panshi mu lubanza. Umue wa ku bakaji bena mudimu ba mutuangaji munene kufika.

⁶⁷Kumonaye Petro ota kapia, kumujojaye, umuamba ne: — Wewe kabidi uvua ne Yezu wa mu Nazarete.

⁶⁸Kadi Petro kumuyila wamba ne: — Tshiena mumanye, tshiena mujingulule tshiudi musue kuamba. Pashishe kuyaye pambelu, ku mushiku wa lupangu. Tshitala kusama.[130]

⁶⁹Kadi muena mudimu mukaji uvua mumumone. Kubangaye tshiakabidi kuambila bantu bavua muaba awu ne: — Muntu ewu udi wa ku bobu!

⁷⁰Kadi Petro kumuyila tshiakabidi. Katupa kapite, bantu bavua muaba awu kuambabu kabidi Petro ne: — Bushuwa, udi wa ku bobu, bualu kabidi udi muena Ngalileya.

⁷¹Ke Petro kuditshipa, wamba ne: — Tshiena mumanye muntu unudi nuamba awu to. Pangikala nshima, Mvidi Mukulu annyoke!

⁷²Pa diba adi, tshitala kusama musangu muibidi. Ke Petro kusuluka bisua Yezu mumuambile ne: “Bangabanga ne tshitala kusama misangu ibidi, wewe newikale mumane kunwila misangu isatu ne: tshiena mumumanye to.” Ke Petro kubanga kudila.[131]