Read Tshiluba Marke 15 Bible Online

Marke 15 - Tshiluba bible

Marke 15

¹Patshiatshia, bamfumu ba batuangaji ne bakulu pamue ne balongeshi ba mikenji kudisangishabu ne bena Tshipangu tshikulu bonsu bua kukosabu tshilumbu. Kusuikabu Yezu mionji, kua kumufila kua Pilate.

²Pilate kumukonka ne: — Udi mukalenga wa bena Yuda anyi? Yezu kumuandamuna ne: — Anu bu muudi wamba amu.

³Bamfumu ba batuangaji bavua basonguela Yezu ne malu a bungi.

⁴Pilate kumukonka tshiakabidi ne: — Kuena wandamuna bualu nansha bumue anyi? Udi mumvue mudibu bakusonguela!

⁵Kadi Yezu kasua muandamune kabidi to. Pilate kukema.

⁶Ku tshibilu tshionsu tshia Dipita dia Maweja-Nangila, Pilate uvua upatula mu lukanu muena lukanu umue usua bantu badisunguile.

⁷Kadi, kusua muntu uvuabu babikila ne: Barabase. Usua mu lukanu pamue ne bantomboji nende bavua bashipe muntu diba divua bantu bajula ndululu.

⁸Bantu bavule kusemena, kubanda kudi Pilate, kubanga kumulomba bua kubenzelaye muvuaye wenza misangu yonsu.

⁹Pilate kubandamuna ne: — Nudi basue nnupatuile mu lukanu mukalenga wa bena Yuda anyi?

¹⁰Bualu uvua mumanye ne: bamfumu ba batuangaji mbafile Yezu mu bianza biende bualu bavua nende ne lubabu.

¹¹Kadi, bamfumu ba batuangaji kusonsola bantu bua balombe Pilate, bua abapatuile mu lukanu anu Barabase.

¹²Pilate kukonka bantu tshiakabidi ne: — Kadi nudi basue ne ngenzele unudi nubikila ne mukalenga wa bena Yuda tshinyi?

¹³Bobu kumuandamuna bela mbila ne: — Umupopele pa mutshi mutshiamakane!

¹⁴Pilate kubakonka ne: — Ntshilema kaayi tshibi tshidiye muenze? Kadi bobu kuela kabidi mbila bikole ne: — Umupopele pa mutshi mutshiamakane!

¹⁵Pilate uvua musue kusankisha bantu pa kubapatuila Barabase mu lukanu. Pashishe, yeye mumane kukumisha Yezu mikaba, kumufilaye bua bamupopele pa mutshi mutshiamakane.

¹⁶Basolayi kuyabu ne Yezu munda mua lubanza (mmomumue ne: mu lubanza lua nzubu wa mulombodi wa buloba). Kubikilabu basolayi bonsu.

¹⁷Kuvuadikabu Yezu tshinkutu tshikunze.[132] Kulukabu tshifulu tshia bukalenga tshia mionji ya meba, kumuasa ku mutu.

¹⁸Pashishe kubangabu kumuela muoyi ne: — Mukalenga wa bena Yuda! Muoyi awu!

¹⁹Bavua bamutuuta lukodi ku mutu, bamutuila mate pambidi, bamutuila binu panshi kumpala kuende bua kumukukuila.

²⁰Bobu bamane kumuseka, kuntuvulabu tshinkutu tshikunze, kumuvuadikabu bilamba biende. Pashishe kuyabu nende ku mpenga kua tshimenga bua kumupopela pa mutshi mutshiamakane.

²¹Muntu mukuabu uvua upita mu njila, utumina ku budimi, diende Simone muena mu Sirene, uvua tatuende wa Aleksandre ne Rufuse.[133] Basolayi kumuenzeja bua kuambulaye mutshi mutshiamakane wa Yezu.

²²Kuyabu ne Yezu muaba uvuabu babikila ne Ngolgota, mmomumue ne: “Muaba wa kabalubalu ka Mutu.”

²³Bavua basue kumupesha nwinyo musambakaja ne buanga budi bukuata bu diamba pamue ne mire. Kadi Yezu kubenga kunua.

²⁴Pashishe kumupopelabu pa mutshi mutshiamakane. Kuabanyanganabu bilamba biende, bavua batshinka bua kumanya tshidi muntu yonsu ne bua kuangata.[134]

²⁵Pavuabu bamupopela pa mutshi mutshiamakane, diba dikavua pa tshitema wa dinda.

²⁶Pa kabaya kavua kaleja tshibawu tshiyuabu bamufundile, bavua bafundepu ne: “Mukalenga wa bena Yuda.”

²⁷Bavua bapopele bantomboji babidi ku nseke yonsu ya Yezu: umue ku dia balume diende, mukuabu ku dia bakaji diende. [

²⁸Amu bua kukumbaja miaku idibu bafunde mu Mukanda wa tshijila ne: “Bavua bamuteka munkatshi mua benji ba malu mabi.[135]”]

²⁹Bantu bavua bapitshila muaba awu bavua banyukisha mitu, bamupenda, bamuamba ne: — Akia! Wewe uvua musue kupula nzubu wa Mvidi Mukulu ne kuasa mukuabu mu matuku asatu,[136]

³⁰udisungidile, utuluke ku mutshi mutshiamakane!

³¹Bamfumu ba batuangaji ne balongeshi ba mikenji kabidi bavua baseka Yezu, bambilangana ne: — Uvua usungidilangana, kadi mupange mua kudisungidila yeye mene!

³²Meshiya mukalenga wa bena Izrayele atuluke ku mutshi mutshiamakane mpindiewu! Patuamona nanku, netumuitabe! Bantu bavuabu bapopela ku mutshi mutshiamakane pamue ne Yezu bavua bamupenda kabidi.

³³Diba dia dikumi ne dibidi munda munya, miidima kuenzeka mu ditunga dijima, kunengayi too ne ku diba isatu wa ku mapingaja.

³⁴Diba dia isatu, Yezu kuela lubila lukole ne: — Eloyi, Eloyi, lama sabaktanyi? (mmomumue ne: “Mvidi Mukulu wanyi, Mvidi Mukulu wanyi, udi mundekele bua tshinyi?[137]”)

³⁵Bamue bantu bavua muaba awu kumvuabu, kuambabu ne: — Telejayi, udi ubikila Eliya!

³⁶Umue wa kudibu kuya lubilu, kuzabika musukulampampa mu maluvu a buanji, kuusuika ku lusongu lua lusokola, kupesha Yezu bua kunuaye,[138] wamba ne: — Lekelayi tumone Eliya ne udi mua kulua kumutulula ku mutshi mutshiamakane.

³⁷Kadi Yezu kuela tshiona tshikole, kukulaye muoyi.

³⁸Tshilamba tshivua tshilembeleja mu nzubu wa Mvidi Mukulu[139] kupandikatshi pankatshinkatshi biangatshile kulu too ne panshi.

³⁹Mulombodi wa basolayi wa bena Rome uvua muimane buludiludi ne Yezu, umone muakudi Yezu muoyi[140] kuambaye ne: — Muntu awu uvua Muana wa Mvidi Mukulu bulelela!

⁴⁰Bakaji bakuabu bavua kabidi muaba awu, bavua batangidile pa bule. Munkatshi muabu muvua Mariya wa mu tshimenga tshia Magdala, ne Mariya mamuende wa Yakobe mukese ne wa Yose, kabidi ne Salome.

⁴¹Bavua balonda Yezu kabidi bamuambuluisha pavuaye mu Ngalileya. Kuvua bakaji bakuabu bavule kabidi bavua babande nende mu Yerushalayime.

⁴²Diba dikavua ku dilolu, divua dia didilongolola, momumue ne divua dia muladilu wa dituku dia Dikisha. Yozefe muena mu tshimenga tshia Arimateya,[141] uvua ne muanzu munene mu Tshipangu tshikulu tshia bena Yuda. Uvua kabidi mutekemene Bukalenga bua Mvidi Mukulu. Uvua ne muoyi mukole bua kuya kudi Pilate bua kumulomba tshitalu tshia Yezu.

⁴³

⁴⁴Kadi Pilate uvua mukeme pumvuye ne: Yezu mmumane kufua. Nenku kubikidishaye mfumu wa basolayi, kumukonka ne: Yezu ukadi mumane kufua musangu mule anyi?

⁴⁵Mulombodi wa basolayi mumane kuandamuna Pilate ne: mmomu, ke yeye kuitabaye bua Yozefe angate tshitalu.

⁴⁶Yozefe kusumba tshilamba tshia kudibuikila tshia buanda bua mitshi, kutululaye tshitalu tshia Yezu ku mutshi mutshiamakane, kutshijingilaye tshilamba tshia kudibuikila, kutshilonga mu lukita luvuabu bumbule mu lubuebue. Pashishe kubungulujaye dibue dinene bua kubuikila ku mushiku wa lukita.

⁴⁷Mariya muena mu Magdala ne Mariya mamuende wa Yose bavua bamona muaba uvuabu bajike Yezu.