Read Tshiluba Marke 6 Bible Online

Marke 6 - Tshiluba bible

Marke 6

¹Yezu kumuka muaba awu, kuyaye mu tshimenga tshivuaye mukolele.[38] Balongi bende kumulondabu.

²Pavua dituku dia Dikisha dikumbane, uvua ulongesha bantu mu nzubu wa kutendelela wa bena Yuda. Bantu ba bungi bavua bamuteleja, bavua bakatshila bikole, bamba ne: — Bionsu ebi mmubimanye bishi? Udi ne meji a mushindu kaayi adiye wenza nawu malu a kukema nenku?

³Yeye ewu ki mmuntu udi utenga nzubu anyi? Kena muana wa Mariya[39] anyi? Kena muanabu ne Yakobe anyi? Kena muanabu ne Yoze anyi? Kena muanabu ne Yuda ne Simone anyi? Bana babu ba bakaji kabena munkatshi muetu emu anyi? Ke tshiyuabu babengela kumuitabila.

⁴Yezu kubambila ne: — Muambi badi bamunemeka miaba yonsu, kadi badi bamupenda mu ditunga diabu ne kudi baledi bende ne kudi bana babu.[40]

⁵Yezu kavua muenze muaba awu bualu bua kukema nansha bumue, kadi uvua mutenteke bamue babedi bianza mujikije masama abu.

⁶Uvua ukema bikole muvuabu bapange mua kumuitaba. Pashishe Yezu uvua ulongesha bantu mu misoku yonsu ya ku mpenga.

⁷Kubikilaye balongi bende dikumi ne babidi, kubatumaye ku babidi ku babidi. Uvua mubapeshe bumfumu bua kuipata mikishi mibi.

⁸Uvua mubelele mukenji ne: — Kanuena mua kuya ne tshintu tshikuabu mu luendu, amu dikombu dia luendu. Kanuena mua kuangata diampa nansha tshibuta, kanuyi nansha ne makuta mu bibombi bienu to.

⁹Nuvuale bisabata ku makasa. Kadi kanuikadi ne mitelu ibidi nansha.

¹⁰Yezu kubambila kabidi ne: — Panuafika mu tshimenga, nushale mu nzubu mudibu banubikila amu too ne panudi numuka muaba awu.

¹¹Padi miaba mikuabu bantu babenga mua kunuakidila nansha kunuteleja, numuke muaba awu, nututule lupuishi lua mu makasa enu,[41] bua lushale kubavuluija tshiyuabu benze.

¹²Balongi kuyabu kulongesha bantu: bua balengeje nsombelu yabu.

¹³Bavua bipata mikishi mibi ya bungi, balaba babedi ba bungi manyi,[42] bajikija masama.

¹⁴Mukalenga Erode[43] uvua mumvue bantu batumbisha Yezu bikole. Bamue bavua bamba ne: — Yowanane-Batiste mmubiike ku lufu! Ke padiye ne bumfumu bua kuenza malu a kukema.

¹⁵Kadi bakuabu bavua bamba ne: — Udi Eliya. Bakuabu kabidi bavua bamba ne: — Udi umue wa ku bambi ba kale ba Mvidi Mukulu.

¹⁶Erode umvua nanku, kuambaye ne: — Udi Yowanane-Batiste umvua mukoseshe mutu awu, mmubiike ku lufu!

¹⁷Erode nkayende ke uvua mukuatshishe Yowanane, mumusuikishe nkanu, mumueleshe mu nzubu wa lukanu. Erode uvua muenze nanku bualu uvua musele Erodiyade mukaji wa muanabu Filipe.[44]

¹⁸Yowanane-Batiste uvua uyukidila Erode ne: “Kabiena bikumbana bua wewe kuangata mukaji wa muanenu to![45]”

¹⁹Erodiyade uvua mulamine Yowanane lukuna. Uvua ukeba mua kumushipesha, kadi kavua ne tshia kuenza to.

²⁰Bualu Erode uvua unemeka Yowanane, uvua mumanye ne: mmuntu muimpe, udi kabidi wa tshijila. Uvua umulama biakane. Pavuaye umuteleja, uvua ne dipampakana mu muoyi bikole. Kadi uvua munange mua kumuteleja ne disanka.

²¹Kadi ku ndekelu, Erodiyade kututa dikasa dimpe, musangu uvua Erode wenza tshibilu tshia diledibua diende. Erode uvua muenzele bena mu bukalenga buende didia dinene, kabidi ne bamfumu ba basalayi ne bantu baneme ba mu Ngalileya.

²²Muana wa bakaji wa Erodiyade,[46] kubuela mu nzubu, kujaye maja, kusankisha Erode ne benyi bende. Ke mukalenga kuambila nsongakaji awu ne: — Undombe tshionsu tshiudi musue, nenkupetshi.

²³Kuditshipaye ne: — Tshionsu tshiwikala mundombe, nenkupetshi, nansha tshia bibidi tshimue tshia bukalenga buanyi!

²⁴Nsongakaji kupatuka, kumanyisha mamuende ne: — Ndi mua kulomba tshinyi? Yeye kumuandamuna ne: — Ulombe mutu wa Yowanane-Batiste.

²⁵Nsongakaji kupingana kudi mukalenga ne lukasa luonsu, umulomba ne: — Ndi musue amu mpindiewu, umpeshe mutu wa Yowanane-Batiste pa dilonga disalame!

²⁶Mukalenga kunyingalala bikole. Kadi bu muvuaye muditshipile ku mesu kua benyi bende, kavua mua kubenga kumupa nansha.

²⁷Diakamue Erode kutuminaye disalayi divua dimulame diyi bua dilue ne mutu wa Yowanane-Batiste. Disolayi kuya mu nzubu wa lukanu, kukosa mutu wa Yowanane-Batiste.

²⁸Pashishe kuluaye ne mutu wa Yowanane pa dilongu disalame, kuupeshaye nsongakaji, awu pende kuupesha mamuende.

²⁹Balongi ba Yowanane bumvua lumu alu, kuyabu kuangata tshitalu tshiende, kutshijikabu.

³⁰Bapostolu kupingana kuvua Yezu, kumulondela bionsu bivuabu benze kabidi balongeshe.

³¹Bantu bavua baya bapingana, bapite bungi, Yezu ne balongi bende kabayi mua kupeta nansha diba dia kudia. Nanku Yezu kubambila ne: — Tuyayi muaba mupengame bua nuenu kuikisha tshitupa.

³²Ke kubuelabu mu buatu bobu nkayabu, kuya muaba mupengame.

³³Kadi bantu bavule kubamonabu baya, kubamanyabu, bena mu bimenga bionsu kunyemabu lubilu, kudianzabu kufika ku makasa muaba awu, kumpala kua Yezu ne balongi bende.

³⁴Padi Yezu upatuka mu buatu, kumonaye bantu bavule. Kubumvuilaye luse, bualu bavua bu mikoku idi kayiyi ne mulami.[47] Kubangaye kubalongesha malu a bungi mutantshi mule.

³⁵Diba dikavua dimane kuya. Balongi bende kutantshila kudiye, kumuambila ne: — Diba ndimane kuya. Muaba ewu mmu tshipele.

³⁶Tuma bantu aba baye ku ntshiamba ne ku misoku idi pabuipi bua kudisumbilabu biakudia.

³⁷Ke Yezu kubandamuna ne: — Nuenu nubapeshe biakudia. Kadi bobu kumukonka ne: — Tuye kubasumbila mampa a mushinga wa nkanu nkama ibidi,[48] bua kubadisha anyi?

³⁸Ke Yezu kubakonka ne: — Nudi ne mampa bungi munyi? Ndayi nuanji kutangila. Kuyabu kuebeja, kubambilabu ne: — Tudi ne mampa atanu ne mishipa ibidi.

³⁹Pashishe Yezu kutumina balongi bende diyi bua kuteka bantu mu bisumbu ne kubasombesha mu mashinde.

⁴⁰Kusombabu mu mulongu wa bantu lukama, wa bantu makumi atanu.

⁴¹Pashishe Yezu kuangata mampa atanu ne mishipa ibidi, kutangilaye mulu, kuelaye Mvidi Mukulu tuasakidila. Kutshibulaye mampa, kuapeshaye balongi bua kuabanyinabu bantu. Kubabanyinaye bonsu buabu kabidi mishipa ibidi.

⁴²Bantu bonsu kudia, kuukuta.

⁴³Balongi kusangisha bipese bia mampa ne bisunsukila bia mishipa bivua bishale, kuwujabu bisaka dikumi ne bibidi.[49]

⁴⁴Balume bavua badie mampa bavua binunu bitanu.

⁴⁵Diakamue Yezu kubueja balongi bende mu buatu bua badianjile mu tshimenga tshia Betsayida, dia muamua dia dijiba, patshi-vuaye ntangalaja bantu.

⁴⁶Yeye mumane kulayangana nabu, kubandaye ku mukuna bua kutendelela.

⁴⁷Dilolu, buatu buvua munkatshi mua dijiba. Yezu kavua ku mayi to.

⁴⁸Ke kumonaye ne: balongi bende bavua batata bikole bua kuita buatu, bualu lupepele luvua lubatatshisha, pa diba dia isatu wa butuku. Ke kuyaye kudibu wenda pa mutu pa mayi. Uvua ukeba kubapita.[50]

⁴⁹Kadi bamumona, wendela pa mutu pa mayi, bobu kuela meji ne: mmukishi, kukangabu kuela mbila,

⁵⁰bualu bonsu bavua bamumone bavua bakuatshike buowa. Kadi diakamue Yezu kubambila ne: — Koleshayi muoyi. Mmeme. Kanutshinyi!

⁵¹Pashishe Yezu kubuela mu buatu buvuabu, lupepele kutuya. Balongi bavua bakema bikole menemene,

⁵²bualu kabavua bajingulula bualu bua kukema bua mampa buvuaye muenze. Lungenyi luabu kaluvua mua kujingulula bualu abu.

⁵³Bobu bamane kusabuka dijiba, kufikabu mu buloba bua Ngenesarete.[51] Kusuikilabu buatu buabu ku dilobu muaba awu.

⁵⁴Kupatukabu mu buatu, bantu kumanyabu Yezu diakamue.

⁵⁵Kuyabu mu ditunga dijima, kumutuadilabu babedi balale pa biata, ba miaba yonsu isuabu bumvua ne Yezu mmufike.

⁵⁶Miaba yonsu ivua Yezu uya, mu misoku, mu bimenga nansha ku ntshiamba, bantu bavua baya ne babedi babu mu miaba ya bisalu, bamusengelela bua kulengabu nansha luzemba lua tshinkutu tshiende. Bavua bamulenga bonsu masama abu avua ajika.