Read Tshiluba Marke 7 Bible Online

Marke 7 - Tshiluba bible

Marke 7

¹Baparushe ne balongeshi bakuabu ba mikenji batumine ku Yerushalayime, kudikungujabu muaba uvua Yezu.

²Kumonabu bamue ba ku balongi bende badia biakudia kabayi bowa bianza, bu muvuabu bafunde mu mikenji ya Mvidi Mukulu.

³Bualu Baparushe ne bena Yuda bonsu bakuabu bavua balama dilongesha divuabu bapete kudi bankambua babu. Kabavua badia kabayi bowa mayi ku bianza biabu ne mankenda nansha.[52]

⁴Padibu batumine mu tshisalu, kabena mua kudianza kudia kabayi bowa mayi nansha. Badi balonda bibidilu bikuabu bia bungi bidibu balama: bu mudi kusukula makopu, mabungu, ngesu ya tshiamu tshikunze ne malalu.[53]

⁵Baparushe ne balongeshi ba mikenji kukonkabu Yezu ne: — Balongi bebe kabena balonda bibidilu bia bankambua betu bua tshinyi? Badi badia kabayi bowa bianza bimpe bua tshinyi?

⁶Yezu kubandamuna ne: — Nuenu bena mpala ibidi, Yeshaya uvua mudianze kuambilamu bualu buenu, pavuaye mufunde ne: “Mvidi Mukulu udi wamba ne: Bantu aba badi bantumbisha amu ku mishiku, kadi muoyi wabu kawena kundi.

⁷Bantu aba badi bantendelela tshianana, bualu badi balongesha mikenji miela kudi bantu, mienza bu malongesha a Mvidi Mukulu![54]”

⁸Yezu kubambila ne: Nudi nulekela mikenji ya Mvidi Mukulu, nulonda malongesha a bantu.

⁹Pashishe Yezu kubambila kabidi ne: — Bulelela, nudi nubenga mikenji ya Mvidi Mukulu bua kulonda dilongesha dienu nuenu!

¹⁰Bualu Moshe uvua muambe ne: “Unemeke tatuebe ne mamuebe,” kabidi ne: “Muntu udi utshipa tatuende nansha mamuende, bamushipe.[55]”

¹¹Kadi nuenu, nudi nulongesha bantu ne: Padi muntu wambila tatuende nansha mamuende ne: “Bintu bimvua mua kukuambuluisha nabi, bidi Korbane,[56]” (mmomumue ne: “Ndi mubilamine bua kulambula Mvidi Mukulu,”)

¹²kena wambuluisha tatuende nansha mamuende muvuaye ne bua kuenza.

¹³Nenku nudi nunyanga lumu lua muaku wa Mvidi Mukulu ku dilongesha dinudi nulongesha bantu bakuabu. Nudi nuenza kabidi malu makuabu a bungi a mushindu ewu.

¹⁴Pashishe Yezu kubikila bantu tshiakabidi, kubambilaye ne: — Nuenu bonsu, nunteleje, mimanye bimpe ne:

¹⁵Kakuena tshintu nansha tshimue tshia pambidi pa muntu tshidi tshibuela munda muende bua kumunyanga. Kadi tshidi tshipatuka mu muoyi wa muntu ke tshidi tshimunyanga. [

¹⁶Telejayi bimpe, udi ne matshi a kumvua, asangane kumvua[57] anyie!]

¹⁷Yezu mumane kushiyangana ne bantu, kubuelaye mu nzubu, balongi bende kumukonka bua kubajinguluilaye lusumuinu alu.

¹⁸Kubakonkaye ne: — Nuenu kabidi, kanuena bamanye mua kujingulula anyi? Kanuena bajingulula ne: kakuena tshintu nansha tshimue tshia pambidi pa muntu tshidi tshibuela munda muende bua kumunyanga?

¹⁹Bualu tshintu etshi katshiena tshibuela mu muoyi wende. Kadi tshidi tshibuela mu difu diende, pashishe tshipatuka. (Pavuaye wakula nanku, uvua ubambila ne: biakudia bionsu, bantu badi mua kubidia.[58])

²⁰Yezu kubambila kabidi ne: — Tshidi tshipatuka munda mua muntu ke tshidi tshimunyanga.

²¹Bualu munda mua muntu, mu muoyi wende, mudi mupatuka meji mabi, buendenda, buivi, dishipangana,

²²buenji bua malu a bundu, lukuka, tshikisu, budimu, ditupa dia mikenji, lubabu lua bintu bia bende, bipendu, ditambisha ne dipanga dia lungenyi.

²³Malu mabi onsu aa adi apatuka munda mua muntu, amubipisha.

²⁴Pashishe Yezu kumuka aku, kuya mu ditunga divua pabuipi ne tshimenga tshia Tire. Kubuelaye mu nzubu. Kavua musue bua muntu amanye ne: udimu. Kadi kavua mua kushala musokome.

²⁵Mukaji mukuabu uvua ne muana wa bakaji uvuabu batatshisha kudi mukishi mubi. Mukaji awu kumvuaye lumu lua Yezu. Kuyaye kudiye diakamue, kudiela ku makasa ende.

²⁶Mukaji awu uvua muenyi, bavua bamulelela mu Fenisiya wa mu Arame. Kusengelelaye Yezu bua kuipataye mukishi mubi munda mua muanende wa bakaji.

²⁷Kadi, Yezu kumuambila ne: — Lekela, bana banji kudia buukuta. Bualu kabiena bimpe kuangata biakudia bia bana kubielela mbua.

²⁸Kadi mukaji kumuandamuna ne: — Mfumu, mbua idi idia bisunsukila bidi bana bantatshisha muinshi mua mesa!

²⁹Ke Yezu kumuambila ne: — Bu muudi muandamune nanku, udi mua kupingana kuebe. Mukishi mubi mmumane kupatuka munda mua muanebe wa bakaji!

³⁰Mukaji kupingana kuende, kusanganaye muanende wa bakaji mudiolola pa bulalu; mukishi mubi mumane kupatuka munda muende.

³¹Pashishe Yezu kumuka mu ditunga dia Tire, kupitshila ku Sidone, kupingana ku dijiba dia Ngalileya, mu buloba bua Bimenga Dikumi.

³²Bantu kumutuadila muntu muikale ne mapapa ne tshidimi. Kulombabu Yezu bua kumutenteka tshianza.

³³Yezu kumuka nende munkatshi mua bantu, kuya nende pa nkayende. Kuelaye minu mu matshi a muntu, kutuilaye mate, kumulenga nawu ku ludimi.

³⁴Pashishe Yezu kutangila mulu, witshija mioyi, wambila muntu ne: — Efata![59] (mmomumue ne “Jibuka.”)

³⁵Diakamue, matshi a muntu kujibuka, ludimi luende kuambuluka, kubangaye kuakula bimpe.

³⁶Yezu kukandika bantu bonsu bua kabambidi muntu bualu ebu. Kadi pavuaye ubakandika bualu, ke pavuabu benda babuambila bantu kabidi.

³⁷Bantu bonsu bavua bakema bikole bamba ne: — Malu onsu adiye muenze adi amu mimpe: bena mapapa badi bumvua, tumama kabidi tudi tuakula!