Read Tshiluba Marke 9 Bible Online

Marke 9 - Tshiluba bible

Marke 9

¹Yezu kubambila kabidi ne: — Ndi nnujadikila ne: bamue ba ku bantu badi muaba ewu kabena mua kufua kabayi banji kumona mudi Bukalenga bua Mvidi Mukulu bufike ne bukole.

²Matuku apita asambombu, Yezu kuangata Petro, Yakobe ne Yowanane, kuyaye nabu nkayabu pa mukuna mutumbuke. Kukudimukaye mpala bobu batangila.

³Bilamba biende kukenka, kutoka bikole mushindu udi muntu wa pa buloba kayi mua kubitokesha.[65]

⁴Pashishe balongi basatu abu kumona Eliya ne Moshe bayukila ne Yezu.

⁵Ke Petro kuambila Yezu ne: — Mulongeshi, bidi bimpe tuikale muaba ewu. Tuase nzubu ya ntenta isatu, umue webe, mukuabu wa Moshe ne munga wa Eliya.

⁶Kavua ne tshivuaye wamba mene to, bualu balongi bakuabu ne yeye bavua ne bowa buvule.

⁷Divuba kubabuikila, diyi kumvuika mu divuba ne: — Ewu ke muananyi undi munange, numuteleje![66]

⁸Diakamue, balongi kukenzakana, kabavua bamone muntu nansha umue, amu Yezu nkayende ke uvua nabu.

⁹Pavuabu bapueka pa mukuna, Yezu kubakandika ne: — Kanuambidi muntu nansha umue, binuvua bamone too ne padi Muana wa muntu ubiika ku lufu.

¹⁰Bobu kulama muvua Yezu mubambile, kadi bavua bakonkangana ne: — Kubiika ku lufu kudi kumvuija tshinyi?

¹¹Kukonkabu Yezu ne: — Balongeshi ba mikenji badi bamba ne: Eliya udi ne bua kudianjila[67] kufika bua tshinyi?

¹²Yezu kubandamuna ne: — Bulelela, Eliya udi ne bua kudianjila kufika bua kulongolola malu onsu. Mudi Mukanda wa tshijila ujadika ne: nebakengeshe Muana wa muntu bikole, kabidi nebamupetule mbishi?[68]

¹³Kadi ndi nnuambila ne: Eliya mmumane kufika, bantu bavua bamupenda muvuabu basue kuenza, amu bu muvuabu bamane kufunda mu Mukanda wa tshijila.

¹⁴Padibu bafika pamue ne balongi bakuabu, kumonabu babela munkatshi kudi bantu bavule, balongeshi ba mikenji bavua belangana nabu mpata.

¹⁵Diakamue bantu abu, bamona Yezu, kukemabu bikole, kuyabu lukasa kudiye bua kumuela muoyi.

¹⁶Yezu kukonka balongi bende ne: — Nudi nuelangana nabu mpata pa tshinyi?

¹⁷Muntu umue wa munkatshi mua bantu abu kuandamuna ne: — Mulongeshi, ndi mukutuadile muananyi wa balume, udi ne mukishi mubi udi umukengesha, umupangisha mua kuakula.

¹⁸Muaba onsu udi mukishi mubi ewu umukuatshila, udi umutuuta panshi, muana upatuka ntutu ku mishiku, usumakaja menu, mubidi utandabala. Meme kulomba balongi bebe bua kuipata mukishi ewu, bobu kupangila.

¹⁹Yezu kubambila ne: — Nuenu bantu kanuena ne ditaba! Ndi ne bua kushala kabidi nenu matuku bungi munyi? Ndi mua kulengulula malu enu too ne ku diba kaayi? Luaku ne muana.

²⁰Mukishi muana. Mukishi mubi umona amu Yezu, kupalulawu. Muana bikole, muana kupona panshi, kubunguluka, ntutu kupatuka ku mishiku.

²¹Yezu kukonka tatuende wa muana ne: — Mbimutuadije diba kaayi? Tatu kuandamuna ne: — Mbituadijile ku buana buende.

²²Misangu mivule mukishi udi umuela mu kapia ne mu mayi bua kumushipa. Kadi utufuile luse, utuambuluishe, bu wewe musue!

²³Yezu kumuambila ne: — Udi wamba ne: bu wewe musue! Kadi bionsu bidi biteketela muntu udi ne ditaba.

²⁴Diakamue, tatu wa muana kuela diyi dikole ne: — Ndi muitabe, ungambuluishe bualu meme tshiena ne ditaba dikumbane!

²⁵Yezu mumone muvua bantu bavule baya lukasa batangila kudibu, kukanyinaye mukishi mubi bikole, wamba ne: — Wewe mukishi mubi udi upangisha mua kuakula ne mua kumvua, ndi nkutumina diyi ne: patuka munda mua muana ewu, kupinganyimu kabidi nansha!

²⁶Mukishi wela mbila, kupalulawu muana bikole, kupatukawu. Muana wa balume awu uvua umueneka bu muntu mufue. Bantu ba bungi bavua muaba awu bavua bamba ne: “Mmumane kufila.”

²⁷Kadi Yezu kumukuata ku tshianza, kumujula kulu, yeye kuimanakana.

²⁸Padi Yezu upingana mu nzubu, balongi bende kumukonkabu pa nkayabu ne: — Tuetu katuvua bapatule mukishi ewu bua tshinyi?

²⁹Yezu kubandamuna ne: — Mukishi wa mushindu ewu badi mua kuwipata amu ku ditendelela Mvidi Mukulu.

³⁰Kumukabu aku, kupitshilabu mu Ngalileya. Yezu kavua musue bua bantu bamanye muaba uvuaye.

³¹Bualu uvua ulongesha balongi bende. Uvua ubambila ne: — Nebafile Muana wa muntu mu bianza bia bantu, bobu nebamushipe. Kunyima kua matuku asatu, neabike ku lufu.

³²Kadi balongi kabavua bajingulule tshivuaye wamba nansha. Bavua batshina mua kumukonka bualu ebu.

³³Ke kufikabu mu Kefamawume. Padi Yezu ubuela mu nzubu, kukonkaye balongi bende ne: — Mu njila nuvua nuelangana mpata pa tshinyi?

³⁴Kadi bobu kupuwa. Bualu pasuabu mu njila, bavua belangana mpata munkatshi muabu bua kumanya ne: wa kutudi udi mupite bakuabu nnganyi?

³⁵Yezu kusomba. Kubikilaye balongi dikumi ne babidi, ubambila ne: — Padi muntu musue kuikala wa kumpala, udi ne bua kuikala wa ku nshikidilu kua bonsu, kabidi muena mudimu wa bonsu.

³⁶Pashishe kuangataye muana mukese, kumuimanyika kumpala kuabu. Kumupukilaye, ubambila ne:

³⁷— Muntu udi wakidila umue wa ku bana bakese aba mu dina dianyi, udi ungakidila meme. Muntu udi ungakidila, kena ungakidila amu meme, udi wakidila kabidi uvua muntume.

³⁸Yowanane kuambila Yezu ne: — Mulongeshi, tuvua bamone muntu wipata mikishi mibi mu dina diebe, tuvua basue kumukandika, bualu kena wa mu tshisumbu tshietu nansha.

³⁹Kadi Yezu kuandamuna ne: — Kanumukandiki nansha, bualu muntu kena mua kuenza tshishima mu dina dianyi, diakamue, kunyima kunyanga lumu luanyi to.

⁴⁰Bualu muntu udi kayi utubenga ke wetu.

⁴¹Muntu wanupesha dikopu dia mayi a kunua mu dina dianyi, bualu nudi ba Kristu, ndi nnujadikila ne: neapete difutu diende.

⁴²— Muntu udi ufikisha ku bubi umue wa ku bana bakese aba, badi bangitaba, mbipite buimpe bamusuike dibue dinene mu nshingu, bamuele mu mayi manene.

⁴³Padi tshianza tshiebe tshifuana mua kukufila ku bubi, utshikose, bidi bimpe ubuele ne tshianza tshimue mu muoyi mulelela pa mutu pa kushala ne bianza bibidi, kukuimanshabu mu kandondu ka bafue, mudi kapia kadi kakayi mua kujima nansha. [

⁴⁴Mmuaba udi misanda idia mibidi kayiyi ifua, kabidi kapia kakayi mua kujima nansha.[69]]

⁴⁵Pikala dikasa diebe dikufikisha ku bubi, udikose, bidi bimpe wewe kubuela mu muoyi wa tshiendelele ne dikasa dimue, pa mutu pa kushala ne makasa abidi, kukuimanshabu mu kandondu ka bafue. [

⁴⁶Mmuaba udi misanda idia mibidi kayiyi ifua, kabidi kapia kakayi mua kujima nansha.[70]]

⁴⁷Pikala disu diebe dikufikisha ku bubi, uditonkone, bidi bimpe wewe kubuela mu Bukalenga bua Mvidi Mukulu ne disu dimue pa mutu pa kushala ne mesu abidi, kukuimanshabu mu kandondu ka bafue.

⁴⁸Mmuaba udi misanda idia mibidi kayiyi ifua, kabidi kapia kakayi mua kujima nansha.[71]

⁴⁹Bualu nebele muntu ne muntu luepu lua kapia.

⁵⁰Luepu ntshintu tshimpe. Kadi padilu lutshipale, nebalutuishe kabidi bishi? Ikalayi batue bu badi ne luepu munda muenu. Sombayi ne ditalala munkatshi muenu.