Read Tshiluba Luke 1 Bible Online

Luke 1 - Tshiluba bible

Luke 1

¹Bantu ba bungi mbidikije mua kufunda malu manene avua menzeke munkatshi muetu.

²Bavua bamfundile malu anu muvuabu batulondelawu kudi bavua baamone bituadije ku ntuadijilu, kabidi kudi bavuabu bimikile bujitu bua kumanyisha muaku wa Mvidi Mukulu.

³Nanku, Teyofile musuibue,[1] mpindiewu meme kabidi, ndi mukebulule menemene bionsu bivua bienzeka bituadije ku tshibangidilu. Ke pandi muele meji bua kukufundilabi mudibi bilondangana.

⁴Ndi nkufundila nanku, bua ujingulule mudi malu avuabu bakulongeshe, anu malelela.

⁵Tshikondu tshivua Erode mukalenga wa ditunga dia Yudeya, kuvua mutuangaji, dina diende Zekarya. Uvua wa mu tshisumbu tshia batuangaji tshia Abiya.[2] Mukajende uvua wa ku ndelanganyi ya mutuangaji munene Arone. Dina diende divua Elisabete.

⁶Bonsu babidi bavua bakumbaja bivua Mvidi Mukulu musue, batumikila bimpe menemene mikenji yonsu ne meyi onsu bia Maweja-Nangila.

⁷Kadi kabavua ne muana nansha. Bualu Elisabete uvua nkumba, kabidi bonsu babidi bakavua bamane kukulakaja.

⁸Dinga dituku, Zekarya uvua wenza midimu yende ya butuangaji kumpala kua Mvidi Mukulu. Bualu ke tshikondu tshivua tshisumbu tshiabu ne bua kuenza mudimu.

⁹Bilondeshile muvua tshibidilu tshia batuangaji, kumusungulabu bua abuele muaba wa tshijila wa Maweja-Nangila bua kuoshilamu musenga wa kamonya.[3]

¹⁰Diba divuabu bosha musenga wa kamonya, bantu bonsu bavua batendelela pambelu.

¹¹Ke mutumibue wa Maweja-Nangila kumuenekela Zekarya. Mutumibue uvua muimane ku dia balume dia tshilambuilu tshia musenga wa kamonya.[4]

¹²Zekarya umumona, kupapukaye. Bowa kumukuata.

¹³Kadi mutumibue kumuambila ne: — Zekarya, kutshinyi nansha. Mvidi Mukulu mmuitabe ditendelela diebe. Mukajebe Elisabete neakulelele muana wa balume. Neumuinyike dina dia Yowanane.

¹⁴Neusanke bikole bualu buende. Bantu ba bungi kabidi nebikale ne musangelu bua diledibua dia muana ewu.

¹⁵Bualu neikale muntu munene kumpala kua Maweja-Nangila. Kakunua nwinyo, nansha maluvu makole makuabu.[5] Yeye mutshikale munda mua mamuende, neikale muwule tente ne Mueyelu wa Tshijila.

¹⁶Neapingaje bena Izrayele bavule kudi Maweja-Nangila Mvidi Mukulu wabu.[6]

¹⁷Neadianjile kumpala kua Mvidi Mukulu. Neikale ne lungenyi, kabidi ne bukole, bivua muambi Eliya nabi. Neatuangaje batatu ne bana. Neapingaje bantomboji mu njila wa bantu bakane. [7] Nealongoluele Maweja-Nangila bantu badi bamuindila.

¹⁸Kadi Zekarya kuebeja mutumibue ne: — Bionsu ebi nenjadike ne: mbilelela, ku tshinyi? Bualu meme nkadi mukulakaje. Mukajanyi kabidi ukadi tshikunda.

¹⁹Ke mutumibue kumuandamuna ne: — Meme ndi Ngabriyele.[8] Ndi ngimana kumpala kua Mvidi Mukulu bua kumuenzela mudimu. Yeye mmuntume bua kuyukidilangana nebe, ne kukumanyisha Lumu elu lua Disanka.

²⁰Nanku neushale kamama, kuyi wakula, too ne pakumbana malu aa. Bualu kuena muitabe bimvua mukuambile. Kadi miaku yanyi eyi neikumbane pa tshikondu tshiayi.

²¹Diba adi bantu bavua bindila Zekarya, bakema bua mutantshi mule uvuaye mushale muaba wa tshijila.

²²Ke Zekarya kupatuka. Kadi kavua mua kuakula nabu. Nanku bantu kujingulula ne: Mvidi Mukulu mmumuleje malu muaba wa tshijila. Zekarya kushala kamama, uleja bantu malu anu ne bianza.

²³Matuku ende a kuenza mudimu mu nzubu wa Mvidi Mukulu mamane kujika, Zekarya kupingana kuende.

²⁴Matuku makese apita, ke mukajende Elisabete kuimita difu. Kushalaye kuende ngondu itanu, kayi wendakana. Uvua wamba ne:

²⁵“Maweja-Nangila mmungambuluishe; mmunjikije mpindiewu bundu buvua bungenza ku mesu a bantu.”

²⁶Elisabete ukumbaja difu ngondu isambombu, Mvidi Mukulu kutuma mutumibue Ngabriyele,[9] mu tshimenga tshia mu Ngalileya, tshiyuabu binyika Nazarete.

²⁷Mutumibue awu uvua ne mukenji wa kuambila nsongakaji, dina diende Mariya. Nsongakaji awu uvua mubangila kudi Yozefe, muntu wa ku ndelanganyi ya mukalenga Davide.

²⁸Mutumibue kubuela mu nzubu mua nsongakaji, umuamba ne: — Sankaku. Maweja-Nangila mmukutokele munda bikole. Mvidi Mukulu udi nebe.

²⁹Mariya umvua miaku ayi, kupapukaye bikole, udikonka tshivuabu bamuelele muoyi wa mushindu ewu.

³⁰Ke mutumibue wa Mvidi Mukulu kumuambila ne: — Mariya, kutshinyi nansha. Udi mutokele Mvidi Mukulu ku muoyi.

³¹Newimite difu, ulele muana wa balume, umuinyike Yezu.

³²Neikale munene. Nebamuinyike Muana wa Mvidi Mukulu, Muena kulu. Maweja-Nangila Mvidi Mukulu neamuteke mukalenga, bu muvua nkambua wende Davide.

³³Neashale mukalenga wa bena Izrayele kashidi. Bukalenga buende kabuakuikala ne ndekelu.[10]

³⁴Mariya kukonka mutumibue ne: — Bualu ebu nebuenzeke munyi? Bualu ntshidi kamama.

³⁵Mutumibue kumuandamuna ne: — Mueyelu wa Tshijila neukutulukile. Bukole bua Mvidi Mukulu Muena kulu nebukubuikile bu mundidimbi. Nanku muana uwalela neikale wa tshijila. Nebamuinyike Muana wa Mvidi Mukulu.

³⁶Muanenu Elisabete, nansha mudiye tshikunda, udi pende ne difu dia muana wa balume. Dikadi mpindiewu dia ngondu isambombu. Eku bavua bamuamba ne: kena mua kulela.

³⁷Bualu kakuena tshidi mua kukolela Mvidi Mukulu.[11]

³⁸Nanku Mariya kuamba ne: — Ndi muntu wa Maweja-Nangila. Bingenzekele anu muudi wamba. Ke mutumibue kumushiya, kuya.

³⁹Matuku awu Mariya kumata mu njila, kuya lukasa mu tshimenga tshia mu Yudeya mu ditunga dia mikuna.

⁴⁰Kubuelaye kua Zekarya, kuela Elisabete muoyi.

⁴¹Elisabete umvua muoyi uvua Mariya mumuele, diakamue muana kunyungakana bikole munda muende. Ke Elisabete kuwula tente ne Mueyelu wa Tshijila.

⁴²Kuelaye diyi dikole ne: — Mvidi Mukulu mmukuele lupemba, bipite bia bakaji bakuabu bonsu. Muana uwalela udi kabidi wa diakalenga.

⁴³Meme mene ndi nganyi? Mudi mamuende wa Mfumu mua kuvua kunsamba nunku mbishi?

⁴⁴Bualu anu ngumvua ungela muoyi, muana kunyungakana ne disanka munda muanyi.

⁴⁵Udi wa diakalenga, bualu udi muitabe ne: malu avuabu bammanyishe kudi Maweja-Nangila neakumbane!

⁴⁶Ke Mariya kuamba ne[12]: — Muoyi wanyi udi utumbisha Maweja-Nangila ne: mmunene!

⁴⁷Ndi nsankidila bikole Mvidi Mukulu, mumpandishi wanyi.

⁴⁸Bualu mmuntabele meme muntu wende, muntu wa patupu.[13] Eyowa, biangatshile mpindiewu, bantu ba mu bikondu bionsu nebangambe ne: mmuena diakalenga.

⁴⁹Bualu Mvidi Mukulu wa bukole buonsu mmungenzele malu a dikema. Dina diende ndia tshijila.

⁵⁰Ku ndelanganyi ne ndelanganyi muoyi wende mulenga udi kudi bonsu badi bamunemeka.

⁵¹Uvua muenze midimu minene ku bukole bua diboku diende. Uvua mutangalaje bena ditambisha, bua bapange kukumbaja bivuabu belele meji.

⁵²Uvua mutonkole bakalenga ba matunga mu nkuasa yabu ya bumfumu. Uvua muzangike ba muoyi mupuekele.[14]

⁵³Uvua mupeshe bavua ne nzala bilenga bia bungi, mutangalaje babanji bianza bitupu.

⁵⁴Uvua muambuluishe bena Izrayele, bantu bende. Kavua mupue muoyi dinanga divuaye mubanange nadi,

⁵⁵amu muvuaye mulaye bankambua betu, Abrahame ne ndelanganyi yende kashidi.

⁵⁶Mariya uvua mushale kua Elisabete ngondu bu isatu. Pashishe kupinganaye kuende.

⁵⁷Tshikondu tshivua Elisabete ne bua kulela kukumbanatshi. Kulelaye muana wa balume.

⁵⁸Nanku bena mutumba ne balela ba Elisabete bamona ne: Maweja-Nangila mmumuenzele bimpe bitambe, kusankabu nende pamue.

⁵⁹Muana kukumbaja lumingu lujima, bantu kufika bua kumuteka panshi.[15] Bavua basue kumuinyika dina dia tatuende Zekarya.

⁶⁰Kadi mamuende kubenga, wamba ne: — Nansha kakese! Dina diende nYowanane.

⁶¹Ke kumuandamunabu ne: — Kadi mu diku dienu emu, kamuena muntu ne dina edi nansha.

⁶²Nanku bavua baleja tatuende ne bianza, bamukonka dina divuaye musue ne: binyike muana.

⁶³Zekarya kulomba kabaya, kufunda ne: “Dina diende nYowanane.” Bonsu kukema bikole.

⁶⁴Bu mpindiewu Zekarya kutuadija kuakula tshiakabidi, utumbisha Mvidi Mukulu ne diyi dikole.

⁶⁵Ke bena mutumba bonsu kumvua bowa. Bantu bavua balondelangana malu aa mu mikuna yonsu ya mu Yudeya.

⁶⁶Bonsu bavua bumvua bakula malu aa, bavua baakema, badikonka mundamunda ne: — Muana ewu neikale nganyi? Bualu bivua bimueneka patoke ne: Maweja-Nangila uvua nende, umuambuluisha.

⁶⁷Zekarya, tatuende wa muana, kuwula ne Mueyelu wa Tshijila. Kutuadijaye kumanyisha bantu malu a Mvidi Mukulu, wamba ne:

⁶⁸— Maweja-Nangila Mvidi Mukulu wa bena Izrayele atumbe! mMuvue kusamba ne kupikula bantu bende.

⁶⁹Kutupatuilaye Musungidi wa bukole, mu ndelanganyi ya mukalenga Davide, muntu wende.

⁷⁰Ke tshivuaye mudianze kumanyisha bantu kale, mukana mua bambi bende ba tshijila.

⁷¹Ukavua mulaye bua kutupikula kudi baluishi betu, ne ku bumfumu bua bonsu badi batukina.

⁷²Uvua mulaye bua kuenzela bankambua betu bimpe. Kavua mupue muoyi ndondu wa tshijila uvuaye mutue nabu.

⁷³Bualu Mvidi Mukulu ukavua mumane kuditshipa kudi nkambua wetu Abrahame,[16]

⁷⁴mumulaye bua kutupikula ku bumfumu bua bena lukuna betu, ne kubambuluisha bua tumuenzele mudimu katuyi ne bowa,

⁷⁵bua tuikale bantu ba tshijila, tukumbaje tshidiye musue, matuku onsu atutshidi ne muoyi panu.

⁷⁶Kadi wewe, muananyi, nebakuinyike ne: mmuambi wa Mvidi Mukulu Muena kulu. Bualu neudianjile kumpala kua Mfumu, bua kumulongoluela njila,[17]

⁷⁷ne bua kumanyisha bantu bende ne: Mvidi Mukulu neanusungidile, anujimijile mibi yenu.

⁷⁸Bualu Mvidi Mukulu wetu udi wa luse ne wa muoyi mulenga. Neatutumine butoke bua mulu, bufuanangane ne diba didi dipatuka.

⁷⁹Butoke abu nebutokeshe badi mu miidima ne mu dijimba dia lufu, nebuludike makasa etu mu njila wa bupole.[18]

⁸⁰Muana uvua utantamana. Lungenyi luende luvua lukola. Uvua usomba mu tshipela too ne ku dituku divuaye mudileje patoke kudi bena Izrayele.