Read Tshiluba Luke 10 Bible Online

Luke 10 - Tshiluba bible

Luke 10

¹Ke Mfumu kusungula balongi bakuabu makumi muanda mutekete ne babidi.[92] Uvua ubatuma babidi babidi, bua badianjile kumpala kuende mu bimenga bionsu, ne miaba mikuabu yonsu, bivuaye ne bua kuya.

²Kubambilaye ne: — Bintu bia kunowa mbivule, kadi banowi mbakese. Nanku lombayi mfumu wa madimi, bua atume banowi bakumbane mu budimi buende.

³Nuye! Ndi nnutuma bu bana ba mikoku munkatshi mua nkashama.

⁴Kanuangatshi tshibuta tshia makuta, nansha tshia luendu, nansha bisabata. Kanuimanyi mu njila bua kuela muntu muoyi.

⁵Panudi nubuela mu nzubu, nudianze kuamba ne: “Bupole buikale mu nzubu emu!”

⁶Pikala muntu wa bupole usombamu, bupole buenu nebushale kudiye. Kadi pikala muntu wa bupole kayimu, bupole buenu nebupingane kunudi.

⁷Nushale mu nzubu awu, nudie, nunue bianupeshabu. Bualu muena mudimu badi ne bua kumufuta.[93] Kanusambi nzubu.

⁸Panuabuela mu tshimenga, banuakidila, nudiemu bidibu banupa.

⁹Nujikijile babeedi badimu masama abu. Nubambile ne: “Bukalenga bua Mvidi Mukulu bukadi pabuipi nenu.”

¹⁰Kadi nuenu babuele mu tshimenga, bantu babenga kunuakidila, nuendakane mu misesu yatshi, nuambe ne:

¹¹“Tudi tunutuila lupuishi lua mu tshimenga tshienu luvua lubakuate ku makasa.[94] Kadi numanye amu ne: Bukalenga bua Mvidi Mukulu bukadi bumane kusemena pabuipi nenu.”

¹²Ndi nnujadikila ne: dituku didi Mvidi Mukulu ukosa nsambu, kakunyoka bena Sodome,[95] mudiye ne bua kunyoka bena tshimenga atshi nansha.

¹³Wewe Korazine, udi muena diakabi! Wewe Betsayida, udi muena diakabi! Bualu malu a dikema adibu banuenzela nuenu, bu bobu bawenzele bena Tire ne bena Sidone, bena bimenga ebi bavua mua kusomba panshi musangu umue, kuvuala bilamba bikayapale, kudilaba butu mu mutu, bua kuleja ne: tudi basue kudilengeja.[96]

¹⁴Dituku didi Mvidi Mukulu ukosa nsambu, kakunyoka Tire ne Sidone bikole, mudiye ne bua kununyoka nuenu nansha.

¹⁵Wewe Kefamawume, udi wela meji ne: neubande mu diulu anyi? Nansha kakese! Nebakuele mu kandondu ka bafue.[97]

¹⁶Ke Yezu kuambila kabidi balongi bende ne: — Muntu udi unuteleja, udi unteleja meme. Muntu udi unubenga, udi umbenga meme. Kadi muntu udi umbenga, udi ubenga ne Tatu uvua muntume.

¹⁷Balongi makumi muanda mutekete ne babidi[98] kupingana kudi Yezu ne disanka divule, bamba ne: — Mfumu, nansha mikishi mibi mene ivua itumikila diyi dietu, patuvua tuyitumina diyi mu dina diebe!

¹⁸Yezu kubandamuna ne: — Mvua mumone diabolu ukuluka mu diulu bu muele wa mvula.

¹⁹Telejayi: mvua munupeshe bumfumu bua nudiate nyoka ne tuminyimynyi,[99] ne bua nutshimune bukole buonsu bua muluishi. Kakuena tshintu tshianuenzela bibi.

²⁰Kadi kanusanki nangananga bualu mikishi mibi idi inutumikila. Nusanke amu, bualu mbamane kufunda mena enu mu diulu.

²¹Diba adi Yezu kuwula ne disanka dia kudi Mueyelu wa Tshijila,[100] kuamba ne: — Tatu, Mfumu wa diulu ne buloba, ndi nkuela tuasakidila, bualu udi mumanyishe bantu bashadile malu, audi musokoke bena meji, ne bantu bavua balonge mikanda. Eyowa, Tatu, ke muuvua musue ne: bienzeke nanku!

²²“Tatu wanyi mmumpeshe bintu bionsu. Kakuena muntu udi mumanye Muana, anu Tatu nkayende. Kakuena muntu udi mumanye Tatu, anu Muana nkayende, kabidi ne bantu badi Muana musue kumanyisha Tatuende.”

²³Ke Yezu kutangila balongi bende, ubambila bobu nkayabu ne: — Nuenu nudi bena diakalenga, bualu nudi badimuene malu onsu aa.

²⁴Bualu ndi nnujadikila ne: Bambi ba bungi ne bakalenga ba matunga bavua bajinga kumona binudi numona, kadi kabavua babimone nansha. Bavua bajinga kabidi kumvua binudi numvua, kadi kabavua babiumvue nansha.[101]

²⁵Ke mulongeshi wa mikenji kufika kudi Yezu, kumuela lukonku bua kumuteya, wamba ne: — Mulongeshi, bua kupeta muoyi wa kashidi, ngenze tshinyi?

²⁶Yezu kumuela kabidi lukonku ne: — Mu mikenji yetu mbafunde tshinyi? Tshiudi ubalamu ntshinyi?

²⁷Muntu awu kumuandamuna ne: — “Nanga Maweja-Nangila Mvidi Mukulu webe muebe muonsu, ne muoyi webe mujima, ne bukole buebe buonsu, kabidi ne lungenyi luebe luonsu. Nanga kabidi mukuebe muudi mudinange wewe mene.[102]”

²⁸Ke Yezu kumuambila ne: — Udi muandamune bimpe. Enza nanku, newikale ne muoyi.[103]

²⁹Kadi mulongeshi wa mikenji uvua musue kuleja Yezu ne: lukonku luanyi luvua pa bualu. Ke kuebejaye Yezu ne: — Mukuetu nnganyi?

³⁰Ke Yezu kumuelela lusumuinu elu ne: — Kuvua muntu ufuma ku Yerushalayime, upueka ku Yeriko. Bivi kumuluisha, kumuvula bilamba bua kuiba bivuaye nabi, kumutuuta, kumushiya panshi mufue tshipuka.

³¹Kuvua mutuangaji upueka mu mpukapuka ne njila awu. Kumonaye muntu awu, kusesukaye, kuya.

³²Muena Levi momumue kufika muaba awu, kusemena pabuipi. Umona amu muntu awu, kusesukaye, kuya.

³³Kadi muena Samariya kampanda uvua upitshila mu njila awu. Kufikaye muaba uvua muntu awu. Umumona, luse kumukuata bikole.

³⁴Kuyaye kudiye. Kuelaye mafuta ne nwinyo mu mputa yende,[104] kusuika. Pashishekumutekaye pa nyama wende, kumufila ku nzubu wa tshilala benyi, bua bamulamemu mu dina diende.

³⁵Butshia kupeshaye muena nzubu wa tshilala benyi nkanu ibidi ya tshiamu tshitoke tshia mushinga mukole, umuambila ne: “Ukube muntu ewu bimpe, bamuondape. Makuta onsu awikala mutule mapite pa mutu, meme nenkupingajilewu pangapingena apa.”

³⁶Ke Yezu kumukonka ne: — Udi wamba bishi? Ku basatu aba muntu uvua muleje mudiye mukuende wa uvuabu baluisha kudi bivi aba nnganyi?

³⁷Mulongeshi wa mikenji kuandamuna Yezu ne: — Anu muntu uvua mumuambuluishe awu. Ke Yezu kumuambila ne: — Uye, wenze amu nanku.

³⁸Yezu ne balongi bende kutungunuka ne luendu. Ke Yezu kubuela mu musoku kampanda. Mukaji, dina diende Marte, kumuakidila kuende.

³⁹Mukaji awu uvua ne muanabu, diende Mariya. Ke Mariya kuya kusomba ku makasa a Mfumu, uteleja bivuaye ulongesha.[105]

⁴⁰Marte uvua usumpakana amu ne midimu ya bungi ya ku nzubu. Kuyaye kudi Yezu, umuambila ne: — Mfumu, padi muanetu wa bakaji undekela midimu yonsu nkayanyi, kabiena bikutonda anyi? Umuambile bua angambuluishe!

⁴¹Mfumu kumuandamuna ne: — Marte, Marte, udi ulubakana, utata bua malu a bungi.

⁴²Kadi kudi bualu bumuepele bunudi nukengela. Mariya mmusungule tshidi tshipite buimpe, tshidibu kabayi mua kumunyenga.