Read Tshiluba Luke 11 Bible Online

Luke 11 - Tshiluba bible

Luke 11

¹Dituku dikuabu Yezu uvua utendelela muaba kampanda. Ujikija, umue wa ku balongi bende kumuebeja ne: — Mfumu, ubilongeshe mutudi mua kutendelela, muvua Yowanane[106] mulongeshe balongi bende.

²Ke Yezu kubambila ne: — Panudi nutendelela, nuambe ne: “Tatu, bantu bonsu batumbishe dina diebe dia tshijila. Bukalenga buebe bufike.

³Utupe ku dituku ku dituku tshiakudia tshitudi tukengela.[107]

⁴Utulekele bilema bietu, mutudi balekele bonsu bavua batuenzela bibi. Kuanyishi bua batutete, tukuvile.”

⁵Yezu kubambila kabidi ne: — Ambayi tumone. Umue wa kunudi, yeye muye kua mulunda wende mundankulu mua butuku, umuambila ne: “Mulunda wanyi, unsombeshe mampa asatu.

⁶Bualu muenyi mmufike kuanyi, ufuma ku luendu. Tshiena ne tshia kumulambila nansha.”

⁷Kadi mukuabu awu mu nzubu kumuandamuna ne: “Umfuile luse! Kumbelu nkukanga. Bana banyi ne meme tukadi bamane kulala. Tshiena ne mushindu wa kujuka, kukupesha mampa to.”

⁸Kadi meme ndi nnujadikila ne: nansha yeye kayi ujuka bua kumupeshawu, bualu mmulunda wende, kadi neajuke bua kumupesha bionsu bidiye ukengela, bualu mulunda wende udi unanukila ne dimulomba, kayi ufua bundu.

⁹Nanku meme ndi nnuambila ne: lombayi, nenupete; kebayi, nenumone; kokolayi ku tshiibi, nebanunzuluile.

¹⁰Bualu muntu yonsu udi ulomba tshintu, udi utshipeta. Udi ukeba, udi umona. Udi ukokola ku tshiibi, badi bamunzuluila.

¹¹Nuenu nudi batatu. Nganyi wa kunudi udi mua kupesha muanende nyoka, padiye ulomba mushipa;[108]

¹²nansha kumupesha kaminyiminyi,[109] padiye ulomba diyi?

¹³Nanku nuenu bantu babi, nudi bamanye mua kupesha bana benu bintu bia nsongu. Mudi Tatu wa mu diulu mua kubenga kupesha bantu Mueyelu wa Tshijila udibu balomba mbishi?

¹⁴Yezu utshivua wipata mukishi mubi uvuamutulukile muntu, mumushiye kamama. Mukishi mubi mumane kupatuka, kamama kuakula bimpe. Bantu kukema bikole.

¹⁵Kadi bantu bakuabu bavua bamba ne: — Belzebule[110] mfumu wa mikishi mibi, ke udi upesha muntu awu bukole bua kuipata mikishi mibi eyi!

¹⁶Bantu bakuabu bavua basue kuteta Yezu. Kumulombabu bua enze tshishima tshidi mua kujadika mudi bumfumu buende bufume kudi Mvidi Mukulu.

¹⁷Kadi Yezu uvua mumanye meji avuabu bela. Nanku kubambilaye ne: — Bukalenga buonsu budi benabu baluishangana nkayabu, nebunyanguke lukasa. Nzubu yabu neyupuke.

¹⁸Pikala diabolu udiluisha nkayende, bukalenga buende nebutungunuke munyi? Bualu nudi nuamba ne: Belzebule mmukupeshe bukole bua kuipata nabu mikishi mibi.

¹⁹Meme ngipata mikishi mibi ku bukole bua Belzebule, kadi bena dienu udi ubapesha bukole bua kuyipata nnganyi? Nanku bena dienu mene badi bajadika munudi nutupakana.

²⁰Kadi meme ndi ngipata mikishi mibi amu ku bukole bua Mvidi Mukulu. Ke bidi bileja ne: Bukalenga bua Mvidi Mukulu mbumane kufika kunudi.

²¹“Padi tshilobu ne bia mvita mu bianza, ulama nzubu wende, bintu bionsu bidiye nabi bidi amu katakata.

²²Kadi padi muntu udi mumupite dikanda ufika, umutshimuna, udi umunyenga bia mvita bivuaye mutekemene. Udi wabanya kabidi bionsu bidiye mupawule.

²³“Udi kayi mutue ku tshianyi, mmumbenge. Udi kayi ungambuluisha bua kukungija mikoku, udi uyitangalaja.

²⁴“Diba didi mukishi mubi mumane kupatuka munda mua muntu, udi utambakana miaba miume, ukeba muaba wa kuikisha. Padiwu kauyi upeta muaba, udi wela meji ne: ‘Nempingane mu nzubu umvua mushiye.’

²⁵Udi umupingana, usangana nzubu mukomba, utulongolola bimpe.

²⁶Udi uya kuangata mikishi mikuabu muanda mutekete idi mimupite ku bubi. Udi upingana nayi pamue, isomba mu nzubu amu. Nanku bubi bua muntu ewu mpindiewu budi bupite buende bua kale.”

²⁷Yezu utshivua wakula, ke mukaji kuela diyi munkatshi mua bantu, wamba Yezu ne: — Mamu uvua mukulele, mukuamushe, ngwa diakalenga!

²⁸Kadi Yezu kumuandamuna ne: — To! Badi bateleja muaku wa Mvidi Mukulu, baukumbaja, ke bena diakalenga!

²⁹Bantu bavule bavua bunguila Yezu. Ke Yezu kuamba ne: — Bena lelu mbantu babi. Badi balomba bua Mvidi Mukulu abajadikile malu ne tshishima. Kadi Mvidi Mukulu neabajadikile malu amu muvuaye muenze mu tshikondu tshia muambi Yona.

³⁰Bualu bu muvua Mvidi Mukulu utuma Yona kudi bena Ninive,[111] bua kubaleja tshivuaye ujinga, ke mudiye utuma Muana wa muntu kudi bena lelu.

³¹Dituku didi Mvidi Mukulu ukosa nsambu, mukalenga mukaji wa mu ditunga dia kuinshi, neimane kumpala kua bena lelu, abadiwule. Bualu uvua mufume ku ditunga dia kule bua kuteleja mibelu ya meji ya kudi Shelomu.[112] Kadi patudi apa padi muntu mupite Shelomu!

³²Dituku didi Mvidi Mukulu ukosa nsambu, bena Ninive nebadiwule bena lelu. Bualu bena Ninive bavua badilengeja, pavuabu bumvua muambi Yona ubalongesha.[113] Kadi patudi apa padi muntu mupite Yona!

³³— Kabena batemesha muendu bua kuusokoka nansha kuubuikila muinshi mua kapanza.[114] Kadi badi bauteka pa tshitekelu tshiawu, bua ukenkeshe bonsu badi babuela mu nzubu.

³⁴Mesu ebe adi bu muendu wa mubidi webe. Padi mesu ebe amona bimpe, mubidi webe mujima udi patoke. Kadi pikala mesu ebe kaayi amona bimpe, mubidi webe udi mu miidima.

³⁵Nanku udimuke bua butoke budi munda muebe kabuikadi miidima.

³⁶Padi mubidi webe mujima mu butoke, kauyi mu miidima kaba nansha kamue, newikale mu butoke wonsu mujima, bu padi muendu ukutokesha ne nkenke yawu.

³⁷Yezu utshivua wakula, ke Muparushe mukuabu kumubikila bua kudiaye kuende. Yezu kubuela mu nzubu muende, kusomba ku mesa.

³⁸Kadi Muparushe uvua ukema bikole, bualu Yezu uvua udia kayi muanji kuowa bianza.

³⁹Ke Mfumu kumuamba ne: — Ke munudi nuenu Baparushe: nudi nusukula dikopu nansha dilongu panyima, kadi munda muenu mudi muwule tente ne lukuka lua bivi, kabidi ne tshikisu.

⁴⁰Nudi bantu batatakane! Mvidi Mukulu uvua muenze panyima, ki ngudi muenze kabidi munda anyi?

⁴¹Peshayi bapele bidi mu makopu ne mu malongu enu. Nanku malu enu onsu neakane!

⁴²“Nuenu Baparushe, nudi bena diakabi! Nudi nulambula tshia dikumi tshia bia mu madimi enu, tshia tshiluabenyi, tshia tshikote, nansha tshia bisekiseki bishilangane bikuabu.[115] Kadi kanuena basue kuenzela bantu bimpe, nansha kunanga Mvidi Mukulu. Ke binuvua ne bua kuenza ebi, kanuyi nulengulula bikuabu abi.

⁴³“Nuenu Baparushe, nudi bena diakabi! Nudi basue kusomba mu nkuasa ya kumpala mu nzubu ya ditendelela. Nudi banange kabidi bua bantu banuele mioyi ya kanemu mu bisalu.

⁴⁴Nudi bena diakabi! Bualu nudi bu nkita idibu kabatshiyi bamona, bayidiata kabayi bamanye!”

⁴⁵Mulongeshi mukuabu wa mikenji kumuamba ne: — Mulongeshi, udi utupenda ne tuetu, paudi wamba nanku!

⁴⁶Yezu kuandamuna ne: — Nuenu kabidi balongeshi ba mikenji, nudi bena diakabi! Nudi nuambuisha bantu majitu manene panyima. Kadi nuenu kanuena malenga nansha munu umue.

⁴⁷Nudi bena diakabi! Nudi nuibakila bambi bavua bankambua benu bashipe nkita mimpe.

⁴⁸Ke munudi nuleja munudi banyishe malu avua bankambua benu benze. Bobu bavua bashipe bambi! Nuenu kuibaka nkita yabu!

⁴⁹Ke muvua Mvidi Mukulu mudianze kuamba ne: “Nembatumine bambi ne bapostolu. Nebashipe bamue ba kudibu, bakengesha bakuabu.”

⁵⁰Kadi nebanyoke bena lelu bua bambi bonsu bavuabu bashipe, biangatshile ku tshibangidilu tshia buloba,

⁵¹kutuadija ku Abele too ne ku Zekarya, uvuabu bashipe pankatshi pa tshilambuilu ne muaba wa tshijila.[116] Eyowa, ndi nnujadikila ne: nebanyoke bena lelu, bua bantu bonsu bavuabu bashipe aba!

⁵²Nuenu balongeshi ba mikenji, nudi bena diakabi! Bualu nudi bumushe nsapi idibu mua kunzulula nayi tshiibi tshia muaba wa kumanya malu. Nuenu mene kanuena numubuela. Kadi nudi nukandika kabidi badi bajinga kubuelamu.

⁵³Yezu mumane kupatuka mu nzubu amu, balongeshi ba mikenji ne Baparushe kumufikila munda bikole, kumuela nkonku ya mishindu yonsu.

⁵⁴Bavua bakeba kumuteya, bua bamujikile ulongesha malu adi kaayi malelela.