Read Tshiluba Luke 14 Bible Online

Luke 14 - Tshiluba bible

Luke 14

¹Dituku dikuabu dia Dikisha, Yezu uvua muye kua mfumu kampanda wa Baparushe bua kudia. Bantu bavua muaba awu bavua bamujoja bikole.

²Muntu muikale ne mikolu ne maboku biwule uvua muimane kumpala kuende.

³Yezu kukonka balongeshi ba mikenji ne Baparushe ne: — Mikenji yetu idi yanyisha bua tujikije disama dia muntu dituku dia Dikisha anyi idi ibenga?

⁴Kadi kabavua basue kuandamuna to. Ke Yezu kulenga mubeedi, kumujikijila disama diende, kumupingaja kuabu.

⁵Pashishe kuambilaye bantu ne: — Pikala wa kunudi ne muanende, nansha ngombe wende, mupone mu tshina, neamupatule diakamue, nansha dituku mene dia Dikisha. Ki mmomumue anyi?

⁶Kupangabu tshia kumuandamuna.

⁷Yezu uvua mumone muvua bantu bavuabu babikila bafuilakana miaba mitambe buimpe. Kubambilaye lusumuinu elu ne:

⁸— Pikala muntu mukubikile mu didia dia dibaka, kuyi kusomba pa muaba mutambe buimpe to. Bualu pamue apa bavua babikila muntu mukuabu munene, mukupite wewe.

⁹Nanku uvua munubikile bonsu babidi, udi mua kukuambila ne: “Mushila muaba ewu!” Diba adi neujuke bua kuya kusomba muaba wa ndekelu, bundu disu tente.

¹⁰Kadi pikalabu bakubikila, uye kusomba ku ndekelu. Pikala udi mukubikile ufika, neakuambe ne: “Muanetu, bandila kumpala, ku muaba muimpe.[129]” Nanku neupete lumu kudi bantu bonsu bawikala nabu ku mesa.

¹¹Bualu muntu yonsu udi uditambisha, nebamufuishe bundu. Muntu yonsu udi udipuekesha, neapete lumu.

¹²Pashishe Yezu kuambila uvua mumubikile ne: — Diba diudi upa bantu biakudia bia dinda, nansha bia munda munya, lekela kubikila balunda bebe, bana benu, nansha bena mutumba nebe babanji. Bualu bobu badi mua kukubikila pabu. Nanku nebakupingajile biuvua mubapeshe abi.

¹³Kadi pawikala wenza didia dia tshibilu, ubikile bapele, balema, batebuki ne bampofu.

¹⁴Nanku newikale ne diakalenga, bualu bobu kabena mua kukupingajilabi. Mvidi Mukulu neakupingajilebi diba didiye ubisha ku bafue bantu bavua benza malu mimpe.

¹⁵Yezu mumane kuakula nanku, umue wa ku bantu bavua nende ku mesa kumuambila ne: — Muntu waya kudia mu Bukalenga bua Mvidi Mukulu mmuena diakalenga!

¹⁶Yezu kumuelela lusumuinu ne: — Muntu mukuabu uvua mulongolole didia dinene. Kubikilaye bantu ba bungi mu didia adi.

¹⁷Diba dia didia dikumbana, kutumaye muena mudimu wende, bua ambile bavuaye mubikile ne: “Luayi mpindiewu, tukadi balongolole bionsu.[130]”

¹⁸Kadi muntu yonsu wa ku bantu aba uvua amu umulomba ne: umfuile luse. Muntu wa kumpala kuambila muena mudimu ne: “Ndi musumbe budimi. Ndi ne bua kuya kubumona. Ndi nkusengelela ne: umfuile luse.”

¹⁹Muntu muibidi wa kudibu kumuambila ne: “Ndi musumbe ngombe dikumi ya kuenza nayi mudimu. Ndi nya kuyiteta. Ndi nkusengelela ne: umfuile luse.”

²⁰Muntu muisatu kuamba ne: “Ndi musele amu mpindiewu. Nanku tshiena ne mushindu wa kuyaku to.”

²¹Muena mudimu kupingana kudi mfumuende, kumumanyisha bivua bantu bandamune. Mfumu wa nzubu kufika munda bikole, kuambila muena mudimu wende ne: “Uye lukasa mu bisalu ne mu misesu ya mu tshimenga. Ufike ne bapele, balema, bampofu ne badi batebuka.”

²²Ke muena mudimu kupingana, wamba ne: “Mfumu, ndi muenze muonsu muudi muambe. Kadi nkushale kabidi muaba.”

²³Ke mfumu kuambila muena mudimu wende ne: “Uye mu njila ya ku ntshiama, ku mielelu ya mpangu, wenzeje bantu ku bukole, bua babuele mu nzubu wanyi, uwule tente.

²⁴Ndi nnuambila ne: ku bantu bamvua mubikile aba, muntu nansha umue kakudia didia dianyi edi to.”

²⁵Bantu ba bungi bavua baya ne Yezu mu njila. Yezu utangila kudibu, kubambilaye ne:

²⁶— Muntu udi undonda, udi ne bua kunnanga meme bipite tatuende, mamuende, mukajende, bana bende, bana babu ba balume nansha ba bakaji, nansha bipite mene mudiye mudinange. Yeye kayi wenza nanku, kena mua kuikala mulongi wanyi to.

²⁷Muntu udi kayi wambula mutshi wende mutshiamakane, kayi musue kundonda, kena mua kuikala mulongi wanyi to.

²⁸Pikala umue wa kunudi musue kuibaka kaleya, udi wanji kusomba, utshinka mushinga waku, bua kumona ne: ndi ne makuta makumbane bua kujikija mudimu anyi?

²⁹Pikalaye kayi muenze nanku, yeye muibake tshitaku, mupangile kaleya, bantu bonsu badi bamona nanku, nebamuseke.

³⁰Nebambe ne: “Muntu ewu uvua mubange kuibaka nzubu. Kadi kena ne mushindu wa kujikija mudimu!”

³¹Nansha mukalenga wa ditunga udi musue kuluisha mukalenga nende myita, muikale amu ne bantu binunu dikumi, udi wanji kusomba bua kudikonka ne: ndi mua kuluisha muena lukuna wanyi udi ne bena mvita binunu makumi abidi anyi?

³²Pikalaye kayi mua kumuluisha bimpe, udi umutumina mukenji patshidiye kule, umuebeja mudibu mua kumyuangana nende bua mvita kayenzeki.

³³Nanku ndi nnuambila ne: muntu nansha umue wa kunudi, kena mua kuikala mulongi wanyi, padiye kayi mubenge bionsu bidiye nabi.

³⁴— Luepu ludi tshintu tshimpe. Kadi pikalatshi lutshipale, badi mua kulutuisha ne tshinyi?

³⁵Kalutshiena luimpe bua baluele nansha mu budimi nansha mu tshina tshia bufuke. Badi baluimansha. Badi ne matshi basangane kumvua anyiee? Bumvuee!