Read Tshiluba Luke 17 Bible Online

Luke 17 - Tshiluba bible

Luke 17

¹Yezu kuambila balongi bende ne: — Matuku onsu nekuikale malu adi akoka bantu bua kuenzabu bibi. Kadi muntu udi wenzeja bantu malu mabi aa mmuena diakabi!

²Muntu wa nanku mbimpe bamusuike dibue dinene dia kupela nadi mu nshingu, bamuele mu mayi manene, bua kafikishi nansha umue wa ku bakese aba ku dienza bibi.

³Nuadimukayi! Pikala muanenu wa balume mubunde tshibawu, umubele bimpe. Pikalaye munyingalale bua tshilema tshivuaye muenze, umumvuile luse.

⁴Nansha yeye mukuenzele bibi misangu muanda mutekete ku dituku, upingana kuudi, ukuambila ne: “Ndi nnyingalala bua bindi mukuenzele,” wamumvuila amu luse.

⁵Bapostolu kulomba Mfumu ne: — Kolesha ditaba dietu.

⁶Mfumu kuandamuna ne: — Bu nuenu ne ditaba bunene bua lutete lua lusanga,[135] nuvua mua kuambila mutshi wa sikomore wawa ne: “Juka apa, umene mu mayi manene.” Nanku mutshi newitabe mu diyi dienu.

⁷— Tuambe ne: muntu wa kunudi udi mua kuikala ne muena mudimu wende udi udima, nansha umulamina bimuna. Padiye umona muena mudimu awu ufuma ku budimi nansha ku mpata, neamubikile lukasa bua kudiaye nende ku mesa anyi?

⁸Kakuenza nanku to. Kadi, neanuambile ne: “Ndambita biakudia. Pashishe vuala bilamba bikuabu bua kungambuluisha pantshidi ndia. Neushishe kudia pebe.”

⁹Neele muena mudimu wende tuasakidila bua padiye mukumbaje bivuaye mumuambile anyi?

¹⁰Ke munudi nuenu kabidi. Panudi nukumbaja bionsu bidi Mvidi Mukulu unuambila, nuambe amu ne: “Tudi amu bena mudimu ba patupu. Tuvua bakumbaje amu bituvua ne bua kuenza.”

¹¹Pavua Yezu mu luendu, mutangile ku Yerushalayime, kupitshilaye ku mikalu ya buloba bua Samariya ne bua Ngalileya.

¹²Ufika mu musoku mulkuabu, ke bena nsudi dikumi, bantu balume, kusambakena nende. Bavua bimanyine pa bule,[136]

¹³bela mbila ne: — Yezu, Mfumu, utumvuileku luse!

¹⁴Yezu ubamona, kubambilaye ne: — Nuye kudi batuangaji, banukenkete.[137] Patshivuabu mu njila, disama diabu kujika.

¹⁵Umue wa kudibu umona ne: disama dianyi ndijike, kupinganaye kudi Yezu, wenda utumbisha Mvidi Mukulu ne diyi dikole.

¹⁶Kudielaye mpala panshi ku makasa a Yezu, umuela tuasakidila. Muntu awu uvua muena Samariya.

¹⁷Ke Yezu kuamba ne: — Disama dia bonsu dikumi ki ndijike anyi? Kadi bakuabu tshitema badi penyi?

¹⁸Bobu ki mbapingane bua kutumbisha Mvidi Mukulu bua tshinyi? Amu muenyi ewu!

¹⁹Ke Yezu kumuamba ne: — Juka, uye; ditaba diebe ndikupandishe!

²⁰Baparushe bavua bakonka Yezu ne: — Bukalenga bua Mvidi Mukulu nebufike diba kaayi? Yezu kubandamuna ne: — Bukalenga bua Mvidi Mukulu kabuena bufika mushindu udi bantu mua kubumona bimpe to.

²¹Muntu kakuamba ne: “Budi apa!” nansha ne “Budi kuaka!” Numanye amu ne: Bukalenga bua Mvidi Mukulu bukadi munkatshi muenu.[138]

²²Ke Yezu kuambila balongi bende ne: — Tshikondu netshifike tshinuajinga kumona dimue dia ku matuku a Muana wa muntu. Kadi kanuakudimona to.

²³Nebanuambile ne: “Nyeye wawa!” nansha ne: “Nyeye ewu!” Kadi kanunyemenyiku bua kuya kumona to!

²⁴Pakumbana dituku diende, Muana wa muntu neafike, bu mudi mukenya wa mvula upenya mu diulu, udikenkesha dionsu musangu umue.

²⁵Kadi Muana wa muntu udi ne bua kudianza kukenga bikole. Bantu ba mu tshikondu etshi nebamubenge.

²⁶Bivua bienzeka mu tshikondu tshia Nowa, nebienzeke mu tshikondu tshidi Muana wa muntu ufika.

²⁷Bantu bavua badia, banua, baselangana, ne ku diba divua Nowa mubuele mu buatu. Ke mvula wa tshipupu kuloka, kubabutula bonsu.[139]

²⁸Nebienzeke bu mu tshikondu tshia Lote: bantu bavua badia, banua, basumba, basumbisha bintu, bakuna, bibaka nzubu.

²⁹Kadi dituku divua Lote mupatuke mu tshimenga tshia Sodome, kapia ne mvuanda bivua biloka, bibutula bantu bonsu.[140]

³⁰Nanku dituku didi Muana wa muntu umueneka, nebienzeke momumue.

³¹Dituku adi, muntu ku musonga wa nzubu, kena ne bua kutuluka bua kuambula bintu biende bidi mu nzubu to. Muntu mu budimi kena ne bua kupingana kuende to.

³²Vulukayi mukaji wa Lote![141]

³³Muntu udi musue kusungidila muoyi wende, neaujimije. Kadi wajimija muoyi wende, neausungidile.

³⁴Ndi nnujadikila ne: bufuku abu ku bantu babidi bikale balale muaba umue, nebaye ne umue, bashiye mukuabu.

³⁵Ku bakaji babidi bikale batue ntete mu tshinu tshiapamue, nebaye ne umue, bashiye mukuabu. [

³⁶Ku balume babidi bikale badime mu budimi, nebaye ne umue, bashiye mukuabu.[142]]

³⁷Ke balongi kumukonka ne: — Mfumu, malu aa neenzekele muaba kaayi? Yezu kuandamuna ne: — Padi tshitalu, ke padi nyunyi ya mikanku idisangishila.[143]