Read Tshiluba Luke 19 Bible Online

Luke 19 - Tshiluba bible

Luke 19

¹Yezu kubuela mu Yeriko, kukosolola tshimenga.

²Muaba awu muvua muntu, dina diende Zakayi. Uvua mfumu wa balambuishi ba bitadi, muena biuma bia bungi.

³Uvua musue kumona Yezu bua kumanya ne: nnganyi. Kadi bu muvuaye muntu wa tshitupa, kavua mua kumumona bimpe bua bungi bua bantu.

⁴Ke kudianjilaye kumpala lubilu, kubanda ku mutshi wa sikomore, bua kumona Yezu uvua ne bua kupitshila muaba awu.

⁵Yezu ufika muaba awu, kutangilaye kulu, wambila Zakayi ne: — Zakayi, tuluka lukasa, bualu lelu ndi muebe.

⁶Zakayi kutuluka lukasa, kuakidila Yezu ne disanka.

⁷Bantu bonsu bavua bamone nanku, kufikabu munda, bamba ne: — Muntu ewu mmuye kutula kua muenji wa malu mabi.

⁸Kadi Zakayi kujuka, kuambila Mfumu ne: — Mfumu, ndi nkujadikila ne: nempeshe bapele tshia bibidi tshia bintu bianyi. Pangikala mushime muntu, muangate makuta ende, nemmupingajile bungi abu misangu inayi.[148]

⁹Ke Yezu kumuambila ne[149]: — Lelu wewe ne bena diebe bonsu nudi bapete lupandu. Bualu wewe kabidi udi muntu wa ku ndelanganyi ya Abrahame.

¹⁰Muana wa muntu mmufike bua kukeba ne kusungidila bantu bavua bajimine.

¹¹Yezu uvua welela kabidi bantu bavua bumvua bionsu abi lusumuinu lukuabu. Bu muvua Yezu pabuipi ne Yerushalayime, bantu bavua bela meji ne: Bukalenga bua Mvidi Mukulu bukadi pa kumueneka amu mpindiewu.

¹²Ke Yezu kuambila bantu ne: — Muntu kampanda wa mu diku dia bantu baneme uvua uya ku ditunga dia kulekule bua kupetaku bukalenga, kupingana nabu kuabu.

¹³Kayi muanji kuya, kubikilaye bena mudimu bende dikumi, bua kubapesha muntu yonsu lukanu lua mpawungi. Kubambilaye ne: “Nuenduluke ne lukanu luenu too ne panga-pingana.”

¹⁴Kadi bena ditunga diabu bavua bamukina. Ke kutumabu bantu kuvuaye uya ne mukenji ne: “Katuena basue bua muntu ewu ikale mukalenga wetu to.”

¹⁵“Kadi muntu awu kupeta amu bukalenga. Ke kupinganaye mu ditunga diende. Kubikidishaye bena mudimu ba-vuaye mupeshe nkanu, bua kumanya tshiyuabu bapete.

¹⁶Wa kumpala kufika, wamba ne: ‘Mukalenga, uvua mumpeshe lukanu lumue. Meme kuenduluka kupeta mikuabu dikumi.’ ”

¹⁷Mukalenga kumuamba ne: “Uvua muenze bimpe. Udi muena mudimu wa nsongu. Bu muuvua mukumbaje mudimu bimpe ne bintu bikese bindi mukushile, nenkuteke mulombodi wa bimenga dikumi.”

¹⁸Muena mudimu muibidi kufika, wamba ne: “Mukalenga, uvua mumpeshe lukanu lumue. Meme kuenduluka, kupeta mikuabu itanu.”

¹⁹Mukalenga kumuandamuna ne: “Ndi nkuteka mulombodi wa bimenga bitanu.”

²⁰Muena mudimu muisatu kufika, wamba ne: “Mukalenga, ke lukanu luebe lua mpawungi elu. Mvua mululame mu tshitambala.

²¹Mvua nkutshina, bualu udi muena tshikisu. Udi wangatabintu bidi kabiyi biebe, unowa biudi kuyi mukune.”

²²Mukalenga kumuandamuna ne: “Udi muena mudimu mubi. Nenkose tshilumbu tshiebe bilondeshile miaku yebe. Uvua mumanye mundi muntu wa tshikisu, ngangata bintu bidi kabiyi bianyi, nnowa bindi tshiyi mukune.

²³Nanku kuena muteke nkanu yanyi mu tshibutshilu tshivuayi mua kumpetesha makasa bua tshinyi? Bu wewe muenze nanku, mu dipingana dianyi, mvua mua kupeta nkanu yanyi, ne kasombela kabidi!”

²⁴Ke mukalenga kuambila bantu bavua muaba awu ne: “Munyengayi lukanu lua mpawungi alu. Nulufile kudi udi ne nkanu dikumi.”

²⁵Kumuambilabu ne: “Mukalenga, se ukadi nayi dikumi!”

²⁶Mukalenga kuandamuna ne: “Ndi nnujadikila ne: muntu yonsu udi ne tshintu, nebamupeshe bipite. Kadi udi kayi ne tshintu, nebamunyenge ne tshikese tshidiye natshi.

²⁷Kadi bena lukuna banyi bavua kabayi basue bua meme kuikala mukalenga wabu, fikayi nabu apa. Nubashipe, meme mutangile.”

²⁸Yezu mumane kuamba nanku, kupitaye kumpala kua bantu bua kuya ku Yerushalayime.

²⁹Ufika pabuipi ne musoku wa Betfaje ne wa Betanya, pepi ne mukuna wa mitshi ya Olive,[150] kudianjilaye kutuma balongi babidi, ubambila ne:

³⁰— Nuye mu musoku udi kumpala wawa. Panuabuelamu, nenusangane muana wa nyama wa mpunde musuika, udi muntu nansha umue kayi muanji kubandapu. Numusulule, nufike nende apa.

³¹Pikala muntu unuebeja ne: “Nudi numusulula bua tshinyi?” numuandamune ne: “Mfumu[151] udi nende dijinga.”

³²Balongi kuya, kusangana bionsu muvua Yezu mubambile.

³³Pavuabu basulula muana wa nyama wa mpunde, bena nyama awu kubakonka ne: — Nudi numusulula bua tshinyi?

³⁴Bobu kuandamuna ne: — Mfumu udi nende dijinga.

³⁵Nanku kuyabu ne muana wa nyama wa mpunde kudi Yezu. Kutekabu bilamba biabu pa nyama. Yezu kubandapu.[152]

³⁶Pavua Yezu wenda uya, bantu bavua badija bivualu biabu mu njila.[153]

³⁷Yezu uvua usemena pabuipi ne Yerushalayime mu njila udi upueka ku mukuna wa mitshi ya Olive. Balongi bende bonsu tshisumbu tshinene bavua ne disanka, batumbisha Mvidi Mukulu ne diyi dikole, bua malu a kukema onsu avuabu bamone.

³⁸Bavua bamba ne: “Mukalenga udi ufika mu dina dia Maweja-Nangila, Mvidi Mukulu amuele lupemba! Bupole budi mu diulu, butumbi budi kudi Mvidi Mukulu![154]”

³⁹Baparushe bakuabu bavua munkatshi mua bantu, kuambilabu Yezu ne: — Mulongeshi, tandisha balongi bebe, bapuwe!

⁴⁰Yezu kuandamuna ne: — Ndi nnujadikila ne: nansha bobu bapuwe, mabue neele mbila!

⁴¹Yezu ufika pabuipi ne tshimenga, utshimona, kuasaye muadi bualu buatshi,

⁴²wamba ne: — Bu wewe mua kujingulula bidi mua kukupetesha ditalala! Kadi mpindiewu malu onsu aa mbakusokokewu. Kuena mua kuamona!

⁴³Matuku neafike adi bena lukuna bebe bakuela munkatshi ne biamu binene bia mvita, bakuluisha, bakufimpakaja nseke yonsu.

⁴⁴Wewe ne bantu bebe nebanubutule muebe butubutu. Kabakukushila dibue ditentekaja pa dikuabu. Bualu wewe kuena mujingulule tshikondu tshivua Mvidi Mukulu mufike bua kukusamba!

⁴⁵Yezu kubuela mu nzubu wa Mvidi Mukulu, kuipata bangenda mushinga,

⁴⁶ubambila ne: — Mikanda ya tshijila idi yamba ne: “Nzubu wanyi mmuaba udibu batendelela.” Kadi nuenu nukadi bamuandamune muaba wa bivi.[155]

⁴⁷Matuku onsu Yezu uvua ulongesha mu nzubu wa Mvidi Mukulu. Bamfumu ba batuangaji, balongeshi ba mikenji, ne bakulu ba mu tshisamba, bavua bakeba muvuabu mua kumushipesha.

⁴⁸Kadi kabavua bamanye tshia kuenza, bualu bantu bonsu bavua pabuipi nende, bamuteleja ne ntema mivule.