Read Tshiluba Luke 20 Bible Online

Luke 20 - Tshiluba bible

Luke 20

¹Dituku dikuabu Yezu uvua ulongesha bantu mu nzubu wa Mvidi Mukulu, ubamanyisha Lumu lua Disanka. Bamfumu ba batuangaji, balongeshi ba mikenji, ne bakulu, kufika kudiye.

²Kumukonkabu ne: — Malu onsu audi wenza aa, udi wenza ne bukenji kaayi? Udi mukuambile bua kuwenza nnganyi?

³Yezu kubandamuna ne: — Meme kabidi ndi musue kunukonka, nungandamune:

⁴Udi mutume Yowanane bua atue bantu mu mayi nnganyi?[156] Mvidi Mukulu anyi mbantu?

⁵Kuelanganabu meji munkatshi muabu, bambilangana ne: — Tuetu bandamune ne: “Mvidi Mukulu mmumutume,” neatukonke ne: “Nanku kanuena bitabe Yowanane bua tshinyi?”

⁶Kadi tuetu bandamune ne: “Bantu mbamutume,” bantu bonsu nebatuase mabue bua kutushipa. Bualu mbajadike ne: Yowanane mmuambi wa Mvidi Mukulu.

⁷Ke kuandamunabu Yezu ne: — Katuena bamanye uvua mumutume bua kutua bantu mu mayi.

⁸Ke Yezu kubambila ne: — Nansha meme kabidi, tshiena nnuambila bukenji bundi ngenza nabu malu onsu aa.

⁹Ke Yezu kuelela kabidi bantu lusumuinu ne: — Muntu uvua mukune mionji ya nwinyo.[157] Kushiyaye budimi abu kudi bafiitshidi. Kuyaye ku luendu lua matuku a bungi.

¹⁰Tshikondu tshia kupola tumuma tshikumbana, kutumaye muena mudimu wende kudi bafutshidi abu, bua kupeta tuende tumuma kudibu. Kadi bafutshidi kutuuta muntu awu, kumuipata, kayi mupete nansha kantu.

¹¹Muena budimi kutuma kabidi muena mudimu mukuabu. Bafutshidi kumutuuta kabidi, kumupenda, kumuipata kayi mupete kantu.

¹²Muena budimu kutuma kabidi muntu muisatu. Yeye kabidi bafutshidi kumutapa mputa, kumuipata.

¹³Ke muena budimi kuamba ne: “Nengenze tshinyi? Ndi ntuma muananyi munanga. Misangu mikuabu badi mua kumuangata ne mushinga.”

¹⁴Kadi bafutshidi bamona muana wa mukalenga, kuambilanganabu ne: “Ke wapiana budimi pashishe wawa. Tumushipayi. Budimi bua nwinyo nebushale buetu.”

¹⁵Nanku kumukokelabu ku mpenga kua budimi, kumushipa. Kadi muena budimi neenze tshinyi ne bantu bavua bafutshila budimi buende?

¹⁶Neafike, neabashipe, neapeshe bafutshidi bakuabu budimi buende. Bantu bumvua miaku ayi, kuambabu ne: — Abi kabienzeki nansha!

¹⁷Kadi Yezu ubatangila, kubakonkaye ne: — Mu Mikanda ya tshijila mbafunde ne: “Dibue divua bibaki balekela, dikadi dibue didi dishindika nzubu.[158] Miaku eyi idi inumvuija tshinyi?

¹⁸Muntu yonsu udi upona pa dibue edi, udi ubozeka. Padi dibue edi diponena muntu, nedimuvi-ngutule.

¹⁹Balongeshi ba mikenji ne bamfumu ba batuangaji bavua bakeba kukuata Yezu diba adi. Bualu bavua bamanye ne: Yezu mmutuelele tuetu lusumuinu elu. Kadi bavua batshina bantu.

²⁰Nanku kutuadijabu kutentekela Yezu. Ke kumutuminabu bantu bamueneka bu bantu ba muoyi muimpe. Kadi bantu aba bavua bakeba kuteya Yezu ku dimukonka bualu, bua bamone mua kumufila mu bianza ne ku bumfumu bua mulombodi wa buloba abu.

²¹Nanku kukonkabu Yezu ne: — Mulongeshi, tudi bamanye ne: biudi wamba ne biudi ulongesha bidi amu pa biobi. Kuena utangila muanzu wa muntu. Kadi udi ulongesha anu patoke tshidi Mvidi Mukulu musue ne: bantu benze.

²²Ke patudi tukukonka ne: bilondeshile mikenji yetu, tudi mua kuhita tshitadi kudi mukalenga wa bakalenga wa bena Rome anyi katutshifutshidi?

²³Kadi Yezu uvua mujingulule budimu buabu. Kubambilaye ne:

²⁴— Ndejayi lukanu lunudi nufuta nalu tshitadi. Mpala ne dina bidibu bazolapu ebi mbia nganyi? Kuandamunabu ne: — Mbia mukalenga wa bakalenga.

²⁵Ke Yezu kubambila ne: — Nanku futayi mukalenga wa bakalenga bintu bidi biende. Kadi lambulayi Mvidi Mukulu kabidi biende Yeye.

²⁶Nanku kabavua mua kumusangana ne tshilema mu miaku ivuaye wambila bantu. Bivua Yezu mubandamune bivua bibakemesha. Kupuwabu.

²⁷Basaduke bakuabu kufika kudi Yezu. (Bobu aba ke badi balongesha ne: bantu ka bena babiika ku bafue.[159]) Kukonkabu Yezu ne:

²⁸— Mulongeshi, Moshe uvua mutufundile mukenji ne: “Muntu musele, mufue kayi muana, muanabu apiane mukaji awu, bua asanguile muanabu udi mufue.[160]”

²⁹Kadi kuvua bana ba balume muanda mutekete ba muntu umue. Wa kumpala kusela mukaji, kufua kayi mulele muana.

³⁰Muibidi kupiana mukaji awu.

³¹Pashishe muisatu amu momumue. Nanku bonsu muanda mutekete kusela mukaji awu. Kadi kufilabu bonsu, kabayi balele nende muana.

³²Ku ndekelu kua bonsu, mukaji awu kubatonda.

³³Kadi dituku diabika bantu ku lufu, mukaji neikale wa nganyi? Bualu bonsu muanda mutekete bavua amu bamusele!

³⁴Yezu kubandamuna ne: — Panu balume ne bakaji badi baselangana.

³⁵Kadi balume ne bakaji badi bakanyine kubiika ku lufu, kupeta muoyi mupiamupia, kabena baselangana kabidi to.

³⁶Nanku kabatshiena mua kufua, bualu nebafuanangane ne batumibue ba Mvidi Mukulu. Badi bana ba Mvidi Mukulu, bualu mbabike ku lufu.

³⁷Moshe udi wamba patoke ne: bantu nebabiike ku lufu. Muaba udiye utela tshipuka tshitema kapia, udi winyika Maweja-Nangila ne: “Mvidi Mukulu wa Abrahame, Mvidi Mukulu wa Izake, ne Mvidi Mukulu wa Yakobe.[161]”

³⁸Nanku Mvidi Mukulu kena Mvidi Mukulu wa bafue to, udi wa bantu badi ne muoyi. Bualu bonsu badi ne muoyi bualu buende.

³⁹Ke balongeshi bakuabu ba mikenji kuamba ne: — Mulongeshi udi muandamune anu bimpe.

⁴⁰Bualu kabatshivua bakimina kumuela nkonku mikuabu.

⁴¹Kadi Yezu kubakonka ne: — mMunyi mudibu mua kuamba ne: Kristu udi wa ku ndelanganyi ya Davide?

⁴²Bualu Davide mene mu mukanda wa misambu udi wamba ne: “Maweja-Nangila Mvidi Mukulu uvua wamba Mfumu wanyi ne: Somba ku diboku dianyi dia balume,

⁴³too ne pangateka bena lukuna bebe bu tshidiatshilu kuinshi kua makasa ebe.[162]”

⁴⁴Padi Davide umubikila: “Mfumu wanyi,” mudi Kristu mua kuikala wa ku ndelanganyi ya Davide mmunyi?

⁴⁵Pavua bantu bonsu bateleja Yezu, kuambilaye balongi bende ne:

⁴⁶— Nudimukile balongeshi ba mikenji. Badi basanka bua kuendakana bavuale mintumpu mile. Badi bananga bua bahele mioyi ya kanemu miaba idi bantu basangile. Badi basue kusomba mu nkuasa ya kumpala mu nzubu ya ditendelela, ne kupeta miaba ya lumu mu bibilu.

⁴⁷Kadi badi banyenga bakaji bakamba nzubu ne bionsu bidibu nabi. Pine apu badi batendelela mutantshi mule bua bamueneke bu bantu bimpe. Kadi nebabanyoke bikole bipite!