Read Tshiluba Luke 21 Bible Online

Luke 21 - Tshiluba bible

Luke 21

¹Yezu ukenzakana, kumonaye bena biuma bela milambu yabu mu mushete mu nzubu wa Mvidi Mukulu.

²Kumonaye kabidi mukaji mukamba mupele wela pende mu mushete makuta a tshiamu tshikunze abidi.[163]

³Ke Yezu kuamba ne: — Ndi nnujadikila bulelela ne: mukaji mukamba mupele ewu mmufile mulambu mupite wa bantu bakuabu bonsu.

⁴Bualu bonsu mbalambule makuta avuabu kabayi nawu dikenga. Kadi mukaji mupele ewu mmufile konsu kavuaye mua kudia naku.

⁵Bantu bakuabu bavua bakula bua nzubu wa Mvidi Mukulu, bamba muvuabu bamuibaka ne mabue mimpe, bamulengeja ne bintu bivua bantu balambule Mvidi Mukulu. Kadi Yezu kuamba ne:

⁶— Matuku neakumbane adi bionsu binudi numona ebi ne bua kuupuka. Kakushala dibue ditentakaja pa dikuabu nansha.

⁷Ke bantu abu kukonka Yezu ne: — Mulongeshi, bionsu ebi nebienzeke diba kaayi? mBishi mutuamanya ne: tshikondu tshidi ebi ne bua kuenzeka ntshimane kufika?

⁸Yezu kuandamuna ne: — Nuadimukayi! Muntu kanushimi! Bualu bantu ba bungi nebafike, bangata dina dianyi, badiamba ne: “Ndi Kristu,” bamba kabidi ne: “Diba dikadi dikumbane!” Kanubalondi to.

⁹Panumvua bantu bakula bua mvita ne buntomboji, kanutshinyi to. Malu aa adi ne bua kuenzeka bangabanga. Kadi nshikidilu wa buloba kakuikalaku diakamue to.

¹⁰Ke Yezu kubambila kabidi ne: — Tshisamba netshiluishe tshikuabu. Bukalenga nebuluishe bukuabu.

¹¹Bikumina bienza bowa nebienzeke miaba yonsu pa buloba. Biyole bia nzala ne bipupu bia masama nebikale miaba mishilangane. Mu diulu nemukuluke bintu bidi bileja malu manene, bikuatshisha bantu bowa.

¹²Kadi bionsu ebi kabiyi bianji kuenzeka, bantu nebanukuate, banukengesha. Nebanufile mu tshilumbuluilu mu nzubu ya ditendelela. Nebanuele mu nzubu wa lukanu. Nebaye nenu kumpala kua bakalenga ne kua balombodi ba ditunga, bualu nudi bangitaba.

¹³Tshikondu atshi ke tshinudi mua kujadikila bantu bimvua munuambile.

¹⁴Kanupampakanyi bua mushindu unudi mua kudilumbuluila.

¹⁵Meme nennupeshe miaku ne meji bidi nansha umue wa ku bena lukuna benu kayi mua kutontolola, nansha kubenga.

¹⁶Nansha batatuenu mene, bamamuenu, bana benu, bena diku dienu, ne balunda benu, nebanufunde ku tshilumbu. Nebashipe bamue ba kunudi.

¹⁷Bantu bonsu nebanukine, bualu nudi bangitaba.

¹⁸Kadi lusuki lua ku mutu wenu nansha lumue kaluakujimina.

¹⁹Nenupande amu panuikala nunanukila.

²⁰— Panuamona tshimenga tshia Yerushalayime tshiela munkatshi kudi baluishi, numanye ne: tshikadi pa kubutuka.

²¹Diba adi bantu bikala mu Yudeya, baye kusokoma mu mikuna. Bikala mu Yerushalayime, bumuke lubilu. Bikala mu mpata, kabapinganyi mu tshimenga to.

²²Bualu matuku awu neikale matuku adibu bakosa nsambu ya bantu, bua kukumbaja bionsu bidibu bafunde mu Mikanda ya tshijila.[164]

²³Matuku awu, bakaji badi kulu kule, nansha badi bamusha bana, nebakenge bikole. Dikenga dinene nedikuate bena ditunga edi, bualu Mvidi Mukulu neabanyoke ne tshiji.

²⁴Nebabashipe ku muele wa nwita. Nebaye nabu mu matunga makuabu onsu, basuika nkanu. Bantu ba bisamba bikuabu nebanyange Yerushalayime, too ne pakumbana tshikondu tshiabu.

²⁵— Mu diba, mu ngondu, ne mu mitotu, nemumueneke bintu bileja malu.[165] Pa buloba bisamba nebikuatshike bowa bunene, bua tshiona tshia mayi manene ne mavuala awu.

²⁶Bantu nebafue ku bowa, batshina malu adi mua kuenzeka pa buloba bujima. Bualu mabulunge a kulu neapampalumuke.

²⁷Diba adi bantu nebamone Muana wa muntu ufika mu divuba, uleja bukole buende ne butumbi.[166]

²⁸Pikala malu onsu aa atuadija kuenzeka, nubanduluke, nukoleshe muoyi, bualu bakadi pa kunupikula.

²⁹Ke Yezu kubelela lusumuinu ne: — Tangilayi mutshi wa mfiku ne mitshi mikuabu yonsu.

³⁰Panudi numona mabeji ayi atuadija kusasa, nudi bamanye ne: tshikondu tshia luya tshikadi pabuipi.

³¹Nanku nuenu kabidi, panuamona bionsu ebi bienzeka, nenumanye ne: Bukalenga bua Mvidi Mukulu bukadi pabuipi.

³²Ndi nnujadikila bulelela ne: bena lelu kabakuanji kufua, malu onsu aa kaayi menzeke.

³³Diulu ne buloba nebijimine. Kadi miaku yanyi kayakujimina to.

³⁴— Dimukayi! Kanubuelakanyi amu mu bibilu, mu bunuavi, ne mu ntatu ya panu. Bualu dituku didibu bakosa nsambu ya bantu didi mua kunujikidila diakamue,

³⁵bu mudi buteyi bukuata nyama.[167] Bualu dituku adi nedijikidile bantu bonsu ba pa buloba bujima diakamue.

³⁶Kanuladi tulu to! Nutendelele diba dionsu, bua nupete bukole bua kupitshisha bimpe bionsu bidi ne bua kuenzeka, ne bua kumueneka bakankamane kumpala kua Muana wa muntu.

³⁷Dituku dionsu Yezu uvua ulongesha bantu mu nzubu wa Mvidi Mukulu. Kadi dilolu uvua ubanda pa mukuna wa Olive, ushalamu butuku bujima.

³⁸Dinda dionsu bantu bonsu bavua bafika mu nzubu wa Mvidi Mukulu bua kumuteleja.