Read Tshiluba Luke 22 Bible Online

Luke 22 - Tshiluba bible

Luke 22

¹Tshibilu tshidi bantu badia mampa kaayi mela buanga, tshidibu binyika tshibilu tshia Dipita dia Maweja-Nangila, tshikavua pabuipi.[168]

²Bamfumu ba batuangaji, ne balongeshi ba mikenji, bavua bakeba muvuabu mua kushipesha Yezu. Kadi bavua batshina bantu.

³Ke diabolu kubuela munda mua Yudase Iskariyote, umue wa ku balongi dikumi ne babidi.

⁴Yudase kuya kuyukila ne bamfumu ba batuangaji, kabidi ne balombodi ba balami ba mu nzubu wa Mvidi Mukulu. Kumvuanga-nabu bua mushindu uvuaye mua kufila Yezu kudibu.

⁵Bamfumu kusanka bikole, kumulaya bua kumupesha makuta.

⁶Ke Yudase kuanyisha, kukeba diba dimpe divuaye mua kufila Yezu kudibu, bantu kabayi bamanye.

⁷Munkatshi mua tshibilu tshia mampa kaayi mela buanga, dituku kukumbanadi di-vuabu ne bua kushipa bana ba mikoku bua didia dia tshibilu tshia Dipita dia Maweja-Nangila.

⁸Yezu kutuma Petro ne Yowanane, ubambila ne: — Nuye kutulonguelela didia dia tshibilu tshia Dipita dia Maweja-Nangila.[169]

⁹Ke bobu kumukonka ne: — Udi musue tulongoluele didia edi penyi?

¹⁰Yezu kubandamuna ne: — Telejayi! Panuabuela mu tshimenga, nenusambakene ne muntu mulume, muambule mulondu wa mayi. Numulonde too ne mu nzubu muabuelaye.

¹¹Nukonke muena lubanza ne: “Mulongeshi udi ukuebeja ne: mu nzubu mutuadila, meme ne balongi banyi, didia dia Dipita dia Maweja-Nangila muepi?”

¹²Nanku yeye neanuleje kulu nzubu munene udi ne bintu bionsu. Muine amu ke munualongoluela didia.

¹³Ke Petro ne Yowanane kuya, kusangana bionsu anu muvua Yezu mubambile. Kulongololabu didia dia Dipita dia Maweja-Nangila.

¹⁴Diba dia didia dikumbana, Yezu kusomba ku mesa ne balongi bende.

¹⁵Kubambilaye ne: — Mvuamujinge bikole kudia nenu didia edi dia tshibilu tshia Dipita dia Maweja-Nangila, tshiyi muanji kukenga.

¹⁶Bualu ndi nnujadikila ne: tshiakudia kabidi didia edi, too ne pakumbanadi menemene mu Bukalenga bua Mvidi Mukulu.

¹⁷Ke Yezu kuangata dikopu, kuela Mvidi Mukulu tuasakidila, wamba ne: — Angatayi dikopu edi dia nwinyo, nunue bonsu.

¹⁸Bualu ndi nnujadikila ne: bituadija ku mpindiewu tshiakunua kabidi nwinyo, too ne pafika Bukalenga bua Mvidi Mukulu.

¹⁹Ke Yezu kuangata diampa, kuela Mvidi Mukulu tuasakidila, kudikosolola, kudiabanyina balongi bende, wamba ne: — Etshi mmubidi wanyi, [undi mufile bualu buenu. Enzayi nenku bua kumvuluka.

²⁰Balongi bamane kudia, Yezu kubapesha kabidi dikopu, wamba ne: — Dikopu edi ntshiovu tshipiatshipia tshia Mvidi Mukulu, tshidibu bashindika ne mashi anyi, adibu bapumuna bualu buenu.[170]]

²¹Kadi monayi: muntu udi mungelele tshitungu udi muaba ewu. Tudi nende ku mesa.[171]

²²Bushuwa, Muana wa muntu neafue, bu muvua Mvidi Mukulu muambe. Kadi muntu udi mumutungile tshitungu mmuena diakabi!

²³Ke balongi kukonkanganabu ne: munkatshi muetu emu, udi mua kuenza bualu abu nnganyi?

²⁴Balongi kutuadija kuelangana mpata bikole munkatshi muabu bua kumanya ne: wa munkatshi muetu udi mupite bakuabu ku buneme nnganyi?

²⁵Yezu kubambila ne: — Bakalenga ba matunga badi baatumina diyi. Bena mianzu badi basue bua bantu babinyike ne: “mBatuenzedi ba malu mimpe.”

²⁶Kadi buenu nuenu kabikadi nanku to. Bualu udi mupite bakuabu munkatshi muenu, udi ne bua kudileja mushadile ku bonsu. Udi utuma diyi, udi ne bua kuenzela bakuabu mudimu.

²⁷Muntu udi mupite bakuabu nnganyi? Ngudi musombe ku mesa anyi, udi ukuatshila bakuabu mudimu? Se ngudi musombe ku mesa. Nanku meme ndi munkatshi muenu, nnuenzela mudimu.

²⁸Nuenu nudi bashale nanyi matuku onsu mu makenga anyi.

²⁹Nanku bu mutua Tatu wanyi mumpeshe Bukalenga, meme kabidi ndi nnupeshabu.

³⁰Nuenu nenudie, nunue ku mesa anyi mu Bukalenga buanyi. Nenusombe mu nkuasa ya bumfumu bua kukosa nsambu ya bisamba dikumi ne bibidi bia bena Izrayele.

³¹— Simone, Simone! Dimuka! Diabolu mmulombe bua kunuteta, bu mudibu bapepula ntete ya kuenza bukula, bumusha bisote.

³²Kadi meme kukulombela kudi Mvidi Mukulu, bua kulenduki mu njila wa ditaba. Nanku pawapingana kundi, ukankamike bana benu.

³³Ke Petro kumuandamuna ne: — Mfumu, meme ndi musue kuya nebe mu nzubu wa lukanu, nansha bua kufua nebe nemfue!

³⁴Yezu kumuandamuna ne: — Petro, ndi nkujadikila ne: lelu tshitala katshiyi tshianji kusama, neumvile misangu isatu ne: tshiena mumumanye!

³⁵Ke Yezu kukonka balongi bende ne: — Tshikondu tshimvua munutume kanuyi ne tshibuta tshia makuta, nansha tshia luendu, kanuyi ne bisabata, nuvua bakengele tshintu anyi? Balongi bende kumuandamuna ne: — Katutua bakengele kantu nansha kamue.

³⁶Ke Yezu kubambila ne: — Kadi mpindiewu muntu udi ne tshibuta tshia makuta, atshiangate. Udi ne tshia luendu, atshiangate kabidi. Udi kayi ne muele wa mvita, apanyishe tshinkutu tshiende bua kuusumba.

³⁷Bualu ndi nnujadikila ne: miaku idibu bafunde mu Mukanda wa tshijila bualu buanyi bua ne: “Batua bamuteke munkatshi mua benji ba malu mabi,” neikumbane.[172] Bushuwa matuku anyi akadi ku ndekelu.

³⁸Ke balongi bende kumuambila ne: — Mfumu, tudi ne miele ya mvita ibidi eyi. Yezu kubandamuna ne: — mBikumbane.[173]

³⁹Ke Yezu kupatuka, kuya ku mukuna wa Olive, mutua tshibidilu tshiende. Balongi bende kumulonda.

⁴⁰Bafika amu ku mukuna, Yezu kubambila ne: — Nutendelele bua kanulenduki, panutetabu.

⁴¹Ke Yezu kumuka muaba uvua balongi bende mutantshi wa dibue dikupa. Kutuaye binu, utendelela,

⁴²wamba ne: — Tatu, paudi musue, angumushile dikopu dia dikenga edi. Kadi kabienzeki mundi musue meme, amu muudi musue wewe. [

⁴³Ke mutumibue wa Mvidi Mukulu kumumuenekela ufuma mu diulu bua kumukankamika.

⁴⁴Bowa bukole buvua bukuata Yezu. Ke kutendelelaye bikole bipite. Tshisululu tshiende tshifua tshiandamuka mashi, amata panshi.[174]]

⁴⁵Yezu mumane kutendelela, kujukaye. Kupinganaye kudi balongi bende, kubasangana balale bua dibungama.

⁴⁶Ke kubakonkaye ne: — Nuenu nudi balale bua tshinyi? Jukayi, nutendelele, bua kanulenduki, panutetabu.

⁴⁷Patshivua Yezu wakula, bantu ba bungi kufika. Yudase, umue wa ku balongi bende ke uvua ubaludika. Kuyaye kudi Yezu bua kumutua mishiku.

⁴⁸Ke Yezu kumukonka ne: — Yudase, udi upangila Muana wa muntu ne dimutua mishiku anyi?

⁴⁹Balongi ba Yezu bamona bitua bisue kuenzeka abi, kumukonkabu ne: — Mfumu, tubatape miele anyi?

⁵⁰Ke umue wa kudibu kupatula muele, kukosa ditshi dia balume dia muena mudimu wa mutuangaji munene.[175]

⁵¹Ke Yezu kubakandika, wamba ne: — Lekelayi! Kanutungunuki to. Yezu kulenga muntu awu ku ditshi. Kupinganadi muadi mua kale.

⁵²Ke Yezu kuambila bamfumu ba batuangaji, balombodi ba balami ba nzubu wa Mvidi Mukulu, ne bakulu, bavua bafika bua kumukuata ne: — Nudi bafike ne miele ya mvita, kabidi ne mitshi, bua kunkuata bu mushipianganyi anyi?

⁵³Matuku onsu mvua nenu mu nzubu wa Mvidi Mukulu. Kanuena bakebe kunkuata nansha. Kadi diba edi ndienu, didi miidima ileja bukole buayi.

⁵⁴Kukuatabu Yezu, kuyabu nende mu nzubu wa mutuangaji munene. Petro uvua ubalonda pa bule.

⁵⁵Bantu bavua batemesha kapia munkatshi mua lubanza. Nanku Petro kuya kusomba munkatshi mua bavua bota kapia.

⁵⁶Ke muena mudimu mukaji kumona Petro musombe ku kapia. Kumujojaye, wamba ne: — Muntu ewu kabidi uvua ne Yezu!

⁵⁷Kadi Petro kuyila, wamba ne: — Mukaji, tshiena mumumanye nansha.

⁵⁸Katupa kipi, munga muntu kumona Petro, wamba kabidi ne: — Wewe kabidi udi umue wa kudibu! Kadi Petro kuandamuna muntu awu ne: — Muanetu, meme tshiena wa kudibu to.

⁵⁹Kupita bu diba dijima, munga muntu kujadika bikole, wamba ne: — Kamuena mpata! Muntu ewu uvua ne Yezu, bualu mmuena Ngalileya!

⁶⁰Ke Petro kuandamuna ne: — Muanetu, tshiena mumanye tshiudi musue kuamba to! Patshivuaye wakula apu, diakamue tshilala kusamatshi.

⁶¹Nanku Mfumu kukudimuka kudi Petro, kumutangila talalaa. Ke Petro kuvuluka tshivua Mfumu mumuambile ne: “Lelu tshitala katshiyi tshianji kusama, newikale mumane kumvila misangu isatu ne: tshiena mumumanye.[176]”

⁶²Ke Petro kupatuka pambelu, kudila bikole.

⁶³Bantu bavua balama Yezu bavua bamulembakaja, bamutuuta.

⁶⁴Bavua bamubuikila ku mesu, bamukonka ne: — Udi mukutuute nnganyi? Jandula, tumone!

⁶⁵Bavua bamuela kabidi nsenda mikuabu ya bungi.

⁶⁶Butshia, bakulu ba bena Yuda, bamfumu ba batuangaji, ne balongeshi ba mikenji, kudisangisha. Kubikilabu Yezu ku Tshipangu tshiabu tshikulu,

⁶⁷bamuebeja ne: — Wewe udi Kristu anyi? Utujadikile! Yezu kubandamuna ne: — Nansha meme munujadikile, kanuakungitaba to.

⁶⁸Meme munukonke bualu, kanuakungandamuna to.

⁶⁹Kadi kutuadijia ku mpindiewu, Muana wa muntu neasombe ku diboku dia balume dia Mvidi Mukulu wa bukole.[177]

⁷⁰Ke bonsu kukonka Yezu ne: — Nanku wewe udi Muana wa Mvidi Mukulu anyi? Yezu kubandamuna ne: — Munudi bambe amu, mmomu.

⁷¹Nanku kuambabu ne: — Katukebi kabidi bajadiki to! Bualu tudi badiumvuile miaku ya mukana muende!