Read Tshiluba Luke 23 Bible Online

Luke 23 - Tshiluba bible

Luke 23

¹Bena tshipangu bonsu kujuka, kuya ne Yezu kua Pilate.

²Kutuadijabu kumusonguela kua Pilate, bamba ne: — Tudi basangane muntu ewu upambula bena ditunga. Udi ukandika bantu ne: kanufutshi tshitadi tshia mukalenga wa bakalenga. Udi udiamba kabidi ne: ndi Kristu, mukalenga wa ditunga.

³Ke Pilate kukonka Yezu ne: — Udi mukalenga wa bena Yuda anyi? Yezu kumuandamuna ne: — Muudi muambe mmomu.

⁴Ke Pilate kuambila bamfumu ba batuangaji, ne bantu bakuabu, ne: — Tshiena musangane bualu nansha bumue, bundi mua kunyokela muntu ewu.

⁵Kadi bobu kusuminyina bikole bipite, bamba ne: — Udi ulongesha bantu, ubasaka bua batomboke. mMutuadije mu Ngalileya; mmuendakane mu Yudeya mujima; mpindiewu mmufike too ne munemu.

⁶Pilate umvua miaku eyi, kuebejaye ne: — Muntu ewu mmuena Ngalileya anyi?

⁷Pilate umvua ne: Yezu udi ufuma mu buloba budibu balombola kudi Erode, kumutumaye kudiye. Matuku awu Erode kabidi uvua mu Yerushalayime.

⁸Erode kusanka bikole pa kumona Yezu, bualu uvua mumvue bakula bualu buende. Kuonsu eku uvua ujinga kumonangana nende. Uvua mutekemene kumona ne ende abidi muvua Yezu wenza tshishima.[178]

⁹Uvua muele Yezu makonka a bungi. Kadi Yezu kavua muandamune ku dikonka nansha dimue.

¹⁰Bamfumu ba batuangaji ne balongeshi ba mikenji batua muaba awu. Batua basonguela Yezu bikole.

¹¹Erode ne basolayi bende batua baseka Yezu, bamupepeja. Kumutuadikabu tshilamba tshimpe tshitoke, kumupingaja kudi Pilate.

¹²Kuonsu eku Erode ne Pilate kabavua bumvuangana to. Kadi dituku edi kudiabu bulunda.

¹³Pilate kusangisha bamfumu ba batuangaji, bakulu, ne bantu bakuabu bonsu,

¹⁴ubambila ne: — Nudi bamvuile ne muntu ewu, nuamba ne: udi upambula bantu. Kadi ndi mumulumbuluishe kumpala kuenu. Tshiena mumusangane mupila ku bualu bubi nansha bumue, bunudi bamufunde.

¹⁵Erode kabidi kena mumusangane ne bualu. Ke padiye mutupingajilaye. Nanku muntu ewu kena muenze bubi nansha bumue budi mua kumukebela lufu.

¹⁶Ndi musue amu kumukumisha mikaba. Pashishe nemmulekele. [

¹⁷Ku tshibilu tshionsu tshia Dipita dia Maweja-Nangila, Pilate uvua ulekela muena lukanu umue uvua bantu balomba.[179]]

¹⁸Kadi bonsu pamue kuelabu mbila ne: — Ushipeshe muntu ewu, utulekele Barabase!

¹⁹(Batua bela Barabase mu nzubu wa lukanu, bualu mu tshimenga bantu batua batomboke, bashipe muntu.)

²⁰Bu mutua Pilate musue kulekela Yezu, kukonkaye tshiakabidi bantu.

²¹Kadi bobu kuela Pilate mbila ne: — Umupopele ku mutshi mutshiamakane! Umupopele!

²²Pilate kubakonka kabidi musangu muisatu ne: — Kadi bualu kaayi bubi budiye muenze? Tshiena mumusangane ne tshilema nansha tshimue tshidiye mua kutuila. Nanku ndi musue anu kumukumisha mikaba. Pashishe nemmulekele.

²³Kadi bantu batua bateka amu mutoyi mukole, balomba amu bua bapopele Yezu pa mutshi mutshiamakane. Mbila yabu kupapisha Pilate mua kuenza tshivuaye musue.

²⁴Nanku Pilate kuitaba tshiyuabu balomba.

²⁵Kulekelaye muntu uvuabu bele mu lukanu bua buntomboji ne bua kushiyangana, bualu ke uvuabu balombe. Kadi kubapeshaye Yezu bua benze nende tshiyuabu basue.

²⁶Patuabu baya ne Yezu, kusangilabu ne Simone muena Sirene, uvua ufuma ku budimi. Basolayi kumukuata, kumupesha mutshi mutshiamakane, bua alonde nawu Yezu munyima.

²⁷Bantu ba bungi batua balonda Yezu. Munkatshi muabu mutua bakaji batua badila, batua mikemu bualu buende.

²⁸Yezu ukudimuka, kubambilaye ne: — Nuenu bakaji ba mu Yerushalayime, kanudidi bualu buanyi to. Nudile bualu buenu, ne bua bana benu.

²⁹Bualu matuku neafike, bantu nebambe ne: “Diakalenga ndia bankumba, ndia badi kabayi balela, kabayi banji kuamusha bana.”

³⁰Diba adi bantu nebambile mikuna minene ne: “Nutupukile!” Nebambile mikuna mikese ne: “Nutujibikile![180]”

³¹Bualu padibu benzela lukunyi lubishi nanku, kadi lukunyi luume nebaluenzele tshinyi?

³²Kuyabu kabidi mu njila ne bantu balume babidi bena tshibawu, bua babashipe musangu umue ne Yezu.

³³Bafika pa muaba udibu binyika ne: “Kabalubalu,” kupopelabu Yezu pa mutshi mutshiamakane. Kuelabu kabidi bena tshibawu babidi abu[181] ku mitshi mitshiamakane, umue ku dia balume dia Yezu, mukuabu ku diende dia bakaji.

³⁴Ke Yezu kuamba ne: — Tatu, ubumvuile luse, bualu kabena bamanye tshidibu benza. Kuabanyanganabu bilamba bia Yezu, batshinka udi mua kubiangata.[182]

³⁵Bantu bonsu batua bimane muaba awu, batangile. Bamfumu ba bena Yuda bavua baseka Yezu,[183] bamba ne: — Uvua musungile bantu bakuabu. Pikalaye Kristu uvua Mvidi Mukulu musungule, adisungile, tumone!

³⁶Basolayi pabu bavua bamuseka. Kusemenabu kudiye, kumupesha maluvu a buanji,[184]

³⁷bamba ne: — Pawikala mukalenga wa bena Yuda, udisungidile nkayebe!

³⁸Kulu kua mutu wa Yezu, ku mutshi mutshiamakane awu, bavua bafunde ne: “Ke mukalenga wa bena Yuda.”

³⁹Muena tshibawu mukuabu, uvua kabidi mulembelele ku mutshi mutshiamakane, uvua upenda Yezu, wamba ne: — Wewe kuena Kristu anyi? Nanku udisungidile, utusungile ne tuetu kabidi!

⁴⁰Kadi mukuabu kutandisha mukuende awu, wamba ne: — Kuena utshina Mvidi Mukulu anyi? mBakunyoke mushindu umue nende!

⁴¹Buetu tuetu, dinyoka edi pa bualu. mBatuenzele bilondeshile bituvua benze. Kadi yeye, kena ne bubi budiye muenze.

⁴²Ke kuambaye kabidi ne: — Yezu, wamyuluka, pawabuela mu Bukalenga buebe.

⁴³Ke Yezu kumuandamuna ne: — Ndi nkujadikila bulelela ne: lelu netuikale nebe mu mparadizu

⁴⁴Munda munya, diba kubuitshidila. Midima kuenzeka mu ditunga dijima, too ne ku diba dia isatu wa dilolu. Tshilamba tshiyuabu balembeleje mu nzubu wa Mvidi Mukulu,[185] kupandikatshi pankatshikatshi.

⁴⁵

⁴⁶Yezu kuela diyi dikole ne: — Tatu, ndi nteka muoyi wanyi mu bianza biebe.[186] Yeye mumane kuamba miaku eyi, kukulaye muoyi.

⁴⁷Mfumu wa basolayi ba bena Rome umona bivua bienzeka, kutumbishaye Mvidi Mukulu, wamba ne: — Bushuwa, muntu ewu kavua ne bualu to.

⁴⁸Bantu bonsu bavua bavua muaba awu bua kubandila bualu abu. Kumonabu bivua bienzeka abi. Nanku kupinganabu kuabu, badituuta bianza pa tshiadi ne dibungama.

⁴⁹Balunda bonsu ba Yezu, kabidi ne bakaji bavua bamulonda biangatshile ku Ngalileya, bavua bimanyine pa bule[187] bua kubandila bionsu bivua bienzeka.

⁵⁰Muvua muena Yuda mukuabu, dina diende Yozefe, wa mu tshimenga tshia Arimateya.[188] Uvua muntu muimpe, mutshinyi wa Mvidi Mukulu, muindile difika dia Bukalenga buende. Uvua kabidi muena Tshipangu tshikulu. Kadi kavua muanyishe muvua bena Tshipangu bakuabu bakose nsambu, nansha malu makuabu avuabu benza.

⁵¹

⁵²Kuyaye kua Pilate, kulomba tshitalu tshia Yezu.

⁵³Pashishe kutululaye tshitalu atshi ku mutshi mutshiamakane. Kutshijingilaye mu tshilamba tshienza ne buanda bua mitshi, kutshiteka mu lukita luvuabu bimbe mu lubuebue. Mu lukita amu kabavua banji kutekamu muntu mukuabu to.

⁵⁴Muvua mu ditanu. Nanku dituku dia Dikisha dikavua pa kutuadija.

⁵⁵Bakaji bavua balonda Yezu biangatshile ku Ngalileya, kulondabu Yozefe. Kutangilabu lukita, ne muaba uvuabu bateke Yezu.

⁵⁶Pashishe kupinganabu kuabu. Kulongololabu mafuta ne manananshi bua kulaaba tshitalu. Dituku dia Dikisha, bakaji abu kuikisha, bilondeshile mikenji ya ditunga.[189]