Read Tshiluba Luke 24 Bible Online

Luke 24 - Tshiluba bible

Luke 24

¹Dituku dia lumingu, patshiatshia ponsu, bakaji bavua baye ku lukita. Bavua ne mafuta a dipembu dimpe avuabu balongolole.[190]

²Kusanganabu muvuabu bamane kumusha dibue ku mushiku wa lukita.

³Kubuelabu mu lukita. Kadi nanshabu kusanganamu tshitalu tshia Mfumu Yezu.

⁴Bavua bapampakana, kabayi bamanye tshia kuenza. Ke bantu babidi, bavuala bilamba bikenka, kubamuenekela.

⁵Bakaji abu kutshina, binama panshi. Ke bantu babidi abu kubakonka ne: — Muntu udi ne muoyi, nudi numukeba munkatshi mua bantu bafile bua tshinyi?

⁶Katshiena apa. Ukadi mubiike ku lufu. Nuvuluke miaku ivuaye munuambile patshivuaye mu Ngalileya.

⁷Uvua munuambile ne: “Badi ne bua kufila Muana wa muntu kudi benji ba malu mabi, bua bamupopele ku mutshi mutshiamakane. Kadi neabiike ku lufu dituku disatu.[191]”

⁸Ke bakaji abu kutuluka miaku ya Yezu.

⁹Kumukabu ku lukita, kuya kulondela balongi dikumi ne umue, ne bantu bakuabu bonsu, bionsu bivua bienzeka.

¹⁰Bakaji abu ke Mariya wa mu Magdala, Yowana, ne Mariya, mamuende wa Yakobe. Bakaji bakuabu bavua nabu, batua balondela bapostolu malu mushindu umue.

¹¹Kadi bapostolu bavua bela meji ne: malu adi bakaji abu batulondela aa kaena mua kuenzeka to. Nanku kabatua babitaba to.

¹²Kadi Petro kujuka, kuya lubilu ku lukita. Kuinangilayemu, kumona panshi amu mikaba ya kujingila nayi tshitalu. Ke kupinganaye pambelu, ukema bikole munda muende bua bitua bienzeka.[192]

¹³Dituku adi, balongi babidi batua baya ku musoku uvuabu binyika ne: Emawuse.[193] Uvua mutantshi wa kilometre bu dikumi ne umue ne Yerushalayime.

¹⁴Batua bayukila pa bionsu bitua bienzeke.

¹⁵Patshituabu bayukila, belangana meji, Yezu kusemena pabuipi nabu, wenda uya nabu mu njila.

¹⁶Balongi batua bamumona, kadi batua bu bampofu, kabayi mua kumujingulula.

¹⁷Ke Yezu kubebeja ne: — Nudi nuenda nuelangana meji pa bualu kaayi? Balongi kuimana, babungama bikole.

¹⁸Umue wa kudibu, diende Kleyopase, kuambila Yezu ne: — Mu Yerushalayime emu, amu wewe ke udi kayi mumanye malu manene adi menzekemu, matuku adi panshi aa!

¹⁹Yezu kubakonka ne: — Malu adi menzekemu mmalu kaayi? Balongi kumuandamuna ne: — Malu avua menzekele Yezu wa mu Nazarete. Uvua muambi wa bukole. Uvua mubuleje ku midimu ivuaye wenza, ne ku miaku ivuaye wakula. Mvidi Mukulu, ne bantu bonsu, kumuanyisha.

²⁰Bamfumu ba batuangaji, ne bakulu betu, batua bamufila bua kumushipesha. Nanku kumupopelabu ku mutshi mutshiamakane.

²¹Tutua batekemene ne: Yeye ke udi mua kupikula Izrayele. Kadi lelu kukadi matuku asatu adi bionsu abi bimane kuenzeka.

²²Bushuwa, bakaji bakuabu ba kutudi batua bankemeshe. Lelu patshiatshia batua baye ku lukita.

²³Kadi ki mbasangane tshitalu tshiende to. Nanku kupinganabu, batulondela kabidi muvua batumibue ba Mvidi Mukulu babamuenekela, babajadikila ne: Yezu udi ne muoyi.[194]

²⁴Bana betu bakuabu batua baye ku lukita. Kusanganabu bionsu anu mutua bakaji bambe. Kadi kabatua bamone Yezu to.

²⁵Nanku Yezu kubambila ne: — Nudi bantu badi kabayi mua kujingulula malu! Bidi binukolela bua kuitaba lukasa bionsu bitua bambi banumanyisha!

²⁶Kristu kavua ne bua kudianza kukenga nanku, bua kubuela mu butumbi buende anyi?

²⁷Diba adi Yezu kubumvuija bionsu bivuabu bafunde bualu buende mu Mikanda ya tshijila, kutuadija ku mikanda ya Moshe, too ne ku ya bambi bonsu.

²⁸Bamane kufika pabuipi ne musoku uvuabu baya, Yezu kuenza bu muntu udi musue kutungunuka ne luendu.

²⁹Kadi balongi kumusengelela, bamba ne: — Shalaku netu, bualu butuku bukadi buila. Nanku Yezu kubuela mu nzubu, kushala nabu.

³⁰Kusombaye nabu ku mesa, kuangata diampa, wela Mvidi Mukulu tuasakidila. Pashishe kudikosololaye, kubabanyinadi.

³¹Ke bobu kumutangila, kumujingulula. Kadi Yezu kubajimina kuisu.

³²Balongi kuambilanganabu ne: — Pavua Yezu utuambila malu mu njila, utumtuija Mikanda ya tshijila, katuvua bumvua bu kapia kosha munda muetu anyi?

³³Diakamue balongi kujuka, kupingana ku Yerushalayime. Kuine aku kusanganabu bapostolu dikumi ne umue, bunguile ne balongi bakuabu,

³⁴babambila ne: — Bushuwa, Mfumu mmubiike ku bafue! Simone mmumumone!

³⁵Balongi babidi abu kabidi kulondela balongi bakuabu malu onsu avua menzeke mu njila, kabidi ne muvuabu bajingulule Yezu diba divuaye ukosolola diampa.

³⁶Patshivua balongi bayukila, ke Yezu kuimana munkatshi muabu. Kubelaye muoyi ne: — Bupole buikale nenu![195]

³⁷Kadi balongi bavua batshina, bazakala, bela meji ne: tudi bamone mukishi.

³⁸Ke Yezu kubakonka ne: — Nudi nupampakana bua tshinyi? Nudi nuela mpata munda muenu bua tshinyi?

³⁹Tangilayi bianza bianyi ne makasa anyi: se mmeme! Ndengayi, nujadike mundi. Bualu mukishi kawena ne mubidi nansha mufuba, bu mundi nabi emu.

⁴⁰Yezu wamba miaku eyi, kubalejaye bianza ne makasa ende.[196]

⁴¹Kadi balongi kabatshivua bitaba to, bualu bavua ne disanka dipite, bakema bikole be. Ke Yezu kubakonka ne: — Muaba ewu, nudi ne tshintu tshia kudia anyi?

⁴²Balongi kumupesha tshitupa tshia mushipa mukanga.

⁴³Yezu kutshiangata, kutshidia, bobu batangile.

⁴⁴Pashishe kubambilaye ne: — Miaku imvua munuambile, pantshivua nenu, ivua ne: bionsu bivuabu bafunde mu mikenji ya Moshe, ne mu mikanda ya bambi, ne ya misambu, bidi ne bua kukumbana.

⁴⁵Ke Yezu kubambuluisha bua bajingulule Mikanda ya tshijila.

⁴⁶Kubambilaye ne: — Bavua bafunde ne: Kristu udi ne bua kufua, pashishe kubiika ku lufu dituku disatu.[197]

⁴⁷Badi ne bua kulongesha bisamba bionsu mu dina diende, kutuadija ku Yerushalayime, ne: kudiye ke kudi bantu mua kupeta bukole bua kudilengeja,[198] bua Mvidi Mukulu abajimijile mibi yabu.

⁴⁸Nuenu nudi ne bua kujadika bionsu ebi.

⁴⁹Meme mene nennutumine tshivua Tatu wanyi mulaye. Kadi nushale mu tshimenga, too ne panupuekela bukole bua kulu.[199]

⁵⁰Pashishe Yezu kumuka nabu mu tshimenga, kuya pabuipi ne Betanya.[200] Aku kuelaye bianza mulu, ubela lupemba.

⁵¹Patshivuaye ubela lupemba, kumukaye pavuabu bimane, kumuambulabu mu diulu.[201]

⁵²Ke bobu kumukukuila. Kupinganabu ku Yerushalayime ne disanka dinene.

⁵³Diba dionsu bavua batumbisha Mvidi Mukulu mu nzubu wende.