Read Tshiluba Luke 4 Bible Online

Luke 4 - Tshiluba bible

Luke 4

¹Yezu uvua utumina ku musulu wa Yardene muwule ne Mueyelu wa Tshijila. Ke Mueyelu kumufikisha mu tshipela.

²Diabolu kumutetamu matuku makumi anayi. Munkatshi mua matuku awu, Yezu kavua udia kantu nansha kamue. Nanku matuku aa mamane kupita, kumvuaye nzala.

³Ke diabolu kumuamba ne: — Ne[39] udi Muana wa Mvidi Mukulu, utume diyi, dibue edi diandamuke diampa.

⁴Yezu kumuandamuna ne: — Mukanda wa Mvidi Mukulu udi wamba ne: “Muntu kena ne muoyi anu bua diampa nkayadi.[40]”

⁵Diabolu kuya nende mulu mule. Kumulejaye makalenga a pa buloba onsu musangu umue.

⁶Kumuambilaye ne: — Nenkupeshe makalenga onsu aa, ne bubanji buawu. Bualu bavua bampeshe bionsu ebi. Meme kabidi ndi mua kubipesha undi musue.

⁷Nanku wewe munkukuile, bionsu ebi nebishale biebe.

⁸Yezu kumuandamuna ne: — Mukanda wa Mvidi Mukulu udi wamba ne: “Kukuila Maweja-Nangila Mvidi Mukulu webe, umuenzele anu yeye nkayende mudimu.[41]”

⁹Ke diabolu kufikisha Yezu mu Yerushalayime, kumuimanyika ku musonga wa nzubu wa Mvidi Mukulu, umuamba ne: — Ne udi Muana wa Mvidi Mukulu, tumpika kulu, umate panshi.

¹⁰Bualu mukanda wa Mvidi Mukulu udi wamba ne: “Mvidi Mukulu neatumine batumibue bende diyi bualu buebe, bua bakulame.”

¹¹Mukanda awu udi wamba kabidi ne: “Nebakuambule mu bianza biabu, bua kututshi dikasa diebe ku dibue.[42]”

¹²Yezu kumuandamuna ne: — Mukanda wa Mvidi Mukulu udi wamba ne: “Kutetshi Maweja-Nangila Mvidi Mukulu webe.[43]”

¹³Diabolu mumane kuteta Yezu mishindu yonsu, kumushiyaye bua kupingana musangu mukuabu.[44]

¹⁴Yezu muwule ne bukole bua Mueyelu wa Tshijila, kupinganaye mu Ngalileya. Bantu bavua bayukila bualu buende bikole mu buloba bujima abu.

¹⁵Yezu uvua ulongesha mu nzubu ya ditendelela ya bena Yuda. Bantu bonsu bavua bamutumbisha.

¹⁶Yezu kuya kabidi mu Nazarete, muvuabu bamukoleshe. Dituku dia dikisha kubuelaye mu nzubu wa ditendelela wa bena Yuda, bu muvua tshibidilu tshiende. Kujukaye kulu bua kubala Mikanda ya tshijila.

¹⁷Kumupeshabu mukanda wa muambi Yeshaya. Kuuvungululaye. Kusanganaye muaba uvuabu bafunde ne:

¹⁸“Mueyelu wa Maweja-Nangila mmuntulukile. Udi munsungule, bua ntuadile bapele Lumu lua Disanka. Uvua muntume, bua mmanyishe bena lukanu ne: nebanulekele; mmanyishe kabidi bampofu ne: nenutabale; kabidi bua mpikule badibu bakengesha,

¹⁹bua mmanyishe bantu tshidimu tshidi Maweja-Nangila mua kubasungidila.[45]”

²⁰Nanku Yezu kuvunga mukanda, kuupingajila uvua muulame. Kusombaye. Bantu bonsu bavua mu nzubu wa ditendelela wa bena Yuda kushala bamulengamena.

²¹Ke Yezu kubambila ne: — Miaku eyi, inuvua bumvue mu mukanda wa Mvidi Mukulu, mmikumbane lelu, amu pamvua muyibale apu.

²²Bantu bonsu bavua bamukema, bakatshila bua miaku ya pa dinanga ivuaye muambe. Bavua bakonkangana ne: — Yeye ki mmuana wa Yozefe anyi?

²³Yezu kubambila ne: — Bulelela nenungelele lusumuinu lua ne: “Wewe munganga, wadiondapa nkayebe!” Nenungambile kabidi ne: “Bimvua bumvue wewe muenze mu Kefamawume, ubienze kabidi munu mu tshimenga tshienu.”

²⁴Kuambaye kabidi ne: — Bulelela ndi nnuambila ne: muambi nansha umue kabena bamuangate ne mushinga mu tshimenga tshiabu to.

²⁵Ndi nnujadikila bulelela ne: mu tshikondu tshia Eliya, bakaji bakamba bavua ba bungi mu Izrayele. Bidimu bisatu ne ngondu isambombu mvula kavua muloke to. Tshiyole tshikole tshia nzala tshivua mu ditunga dijima.[46]

²⁶Kadi Mvidi Mukulu kavua mutume Eliya kudi mukaji mukamba nansha umue wa kudibu. Uvua mumutume anu kudi mukaji mukamba wa mu tshimenga tshia Sarepta mu ditunga dia Sidone.[47]

²⁷Mu tshikondu tshia muambi Elisha, muvua kabidi bena nsudi bavule mu Izrayele. Kadi nansha umue wa kudibu kabena bajikija disanka diende, kadi anu dia Naamane wa mu ditunga dia Siriya.[48]

²⁸Bantu bonsu bavua mu nzubu wa ditendelela wa bena Yuda, bumvua anu miaku ayi, kubindulukabu bikole.

²⁹Kujukabu kulu, kumusakila ku mpenga kua tshimenga, kumufikisha ku lusongu lua mukuna uvuabu bashile tshimenga tshiabu, bua bamusakile mu lupongu.

³⁰Kadi Yezu kupitshila munkatshi muabu, kuya.

³¹Ke Yezu kuya ku tshimenga tshia Kefamawume, mu ditunga dia Ngalileya. Dituku dia dikisha uvua ulongeshamu bantu.

³²Bantu bavua bakema bua dilongesha diende, bualu uvua wakula ne bumfumu.

³³Mu nzubu wa ditendelela muvua muntu uvua ne mukishi mubi. Muntu awu uvua wela mbila mikole ne:

³⁴— Akia! Yezu wa mu Nazarete, udi musue kutuenzela tshinyi? Udi mulue kutubutula anyi? Ndi mukumanye bimpe ne: udi Wa Tshijila! Mvidi Mukulu mmukutume!

³⁵Yezu kukanyina mukishi mubi bikole, wela diyi ne: — Puwa! Patuka munda mua muntu ewu! Ke mukishi mubi kukulula muntu panshi, bantu bonsu batangile. Mukishi awu kupatuka munda mua muntu, kauyi mumuenzele bualu bubi nansha bumue.

³⁶Bantu bonsu bavua bakema, bakonkangana ne: — Edi ndiyi dia mushindu kaayi? Muntu ewu udi utumina mikishi mibi diyi dia bumfumu ne dia bukole, yoyi payi ipatuka!

³⁷Nanku bantu bavua bayukidilangana bikole bualu bua Yezu mu buloba bujima abu.

³⁸Yezu umuka ku nzubu wa ditendelela wa bena Yuda, kuyaye ku nzubu wa Simone. Mamuende wa Simone uvua usama mubidi luya lukole. Nanku kulombabu Yezu bua amujikije disama.

³⁹Yezu kuinama pavuaye, kutumina disama dia mubidi luya diyi. Disama kujikadi! Mamu awu diakamue kutuadija kubalongoluela biakudia.

⁴⁰Diba dimane kubuela,[49] bantu bonsu kuya kudi Yezu ne babeedi bavua ne masama mashilangane. Yezu uvua ubatenteka bianza ku muntu ku muntu, ujikija masama abu.

⁴¹Mikishi mibi kabidi ivua ipatuka munda mua babeedi bavule, yela mbila ne: “Wewe udi Muana wa Mvidi Mukulu!” Kadi Yezu uvua uyikanyina, uyikandika bua kayakudi, bualu ivua mimanye ne: Yezu udi Kristu, Musungidi mutulaya.

⁴²Butshia, Yezu kumuka mu tshimenga, kuya pa muaba wa nkayende. Bantu bavule kumukeba. Bamane kumusangana, bavua basue bua ashale munkatshi muabu, bamukandika kabidi bua kayi muaba mukuabu to.

⁴³Kadi Yezu kubambila ne: — Ndi ne bua kulongesha kabidi Lumu lua Disanka lua Bukalenga bua Mvidi Mukulu mu bimenga bikuabu. Ke tshidi Mvidi Mukulu muntumine!

⁴⁴Nanku kuyaye kulongesha mu nzubu ya ditendelela ya mu ditunga dia Yudeya.[50]