Read Tshiluba Luke 8 Bible Online

Luke 8 - Tshiluba bible

Luke 8

¹Pashishe Yezu kuya ne balongi bende mu bimenga bionsu ne mu misoku. Uvua ulongeshamu bantu, ubamanyisha Lumu lua Disanka lua Bukalenga bua Mvidi Mukulu. Balongi bende dikumi ne babidi bavua nende mu luendu alu.

²Muvua kabidi bakaji bakuabu bavuaye mumushe mikishi mibi, mujikije masama. Ke Mariya (udibu binyika ne: ngwa mu Magdala), uvuaye mumushe mikishi muanda mutekete,

³Yowana, mukaji wa Kuza, mulongolodi wa malu mu nzubu wa mukalenga Erode, Suzane, ne bakaji bakuabu bavule bayua bangata biuma biabu, bua kuambuluisha nabi Yezu ne balongi bende.

⁴Bantu bavua baya kudi Yezu bapite bungi, bafumina ku bimenga bionsu. Bamane kunguila, Yezu kubelela lusumuinu elu ne:

⁵“Muntu kampanda uvua muye kumiamina ntete. Pavuaye umiamina ntete mu budimi buende, imue kumata mu njila. Bantu kuyidiatakaja, nyunyi kuyizokola.

⁶Minga kumata mu buloba bua mabue. Itoloka, kuumayi diakamue, bualu kayivua muaba wa tshitalela.

⁷Ntete mikuabu kumata mu mitshi ya meba. Kutolokayi pamue, kadi mitshi ya meba kuyijingila.

⁸Minga kumata mu buloba buimpe. Kutolokayi, kukuama miepu. Muepu onsu uvua ne ntete lukama.” Ke Yezu kuamba kabidi ne: — Muena matshi a kumvua wasangana kumvua anyi? Umvuee!

⁹Balongi ba Yezu kumulomba ne: utumvuije lusumuinu elu.

¹⁰Yezu kubandamuna ne: — Nuenu bavua banumvuije malu masokome a Bukalenga bua Mvidi Mukulu. Kadi bantu bakuabu badi babambilawu mu nsumuinu bua “Batangile, kabayi bamona tshintu, bateleje, kabayi bumvua bualu.[77]”

¹¹— Diumvuija dia lusumuinu elu didi nunku: ntete ke muaku wa Mvidi Mukulu.

¹²Bantu bakuabu, bidi bibenzekela bu mudi ntete idi imata mu njila. Badi bumvua muaku wa Mvidi Mukulu. Kadi pashishe diabolu udi ufika, umusha muaku mu muoyi wabu, bua kabitabi, kabapandi.

¹³Bakuabu, bidi bibenzekela bu mudi ntete idi imata mu buloba bua mabue. Badi bumvua muaku wa Mvidi Mukulu, bawakidila ne disanka. Kadi muaku ewu kawena ushindama munda muabu. Badi bitaba anu bua matuku makese. Padi dikenga dibakuata, badi bajimija ditaba.

¹⁴Bua bakuabu kabidi, bidi amu bu mudi ntete idi imata mu mitshi ya meba. Badi bumvua muaku wa Mvi-di Mukulu. Kadi disumpakana dia matuku onsu, lukuka lua biuma, ne masanka a panu, bidi bikutakaja muaku, biupangisha mua kukuama bimuma munda muabu.

¹⁵Kadi bantu bakuabu, bidi bibenzekela bu mudi ntete idi imata mu buloba buimpe. Badi bateleja muaku wa Mvidi Mukulu, bawakidila ne muoyi muimpe, baukumbaja. Bu mudibu bananukila nanku, badi bakuama bimuma.

¹⁶— Muntu kena utemesha muinda bua kuusokoka mu kapanza, nansha bua kuubueja muinshi mua bulalu. Kadi badi bauteka pa tshitekelu tshiawu, bua badi babuela bamone bimpe.[78]

¹⁷Bualu buonsu butshidi busokome, nebumueneke patoke. Bidibu kabayi banji kumvua, nebabiumvue, bualu nebabileje patoke.

¹⁸Nuikale ne ntema, nuteleje bimpe! Bualu udi ne tshintu, neapete bipite. Kadi udi kayi natshi, nebamunyenge bikese bidiye wela meji ne: ndi nabi.

¹⁹Mamu ne bana babu ne Yezu kuya kudiye. Kadi kabavua mua kufika pabuipi nende bua bungi bua bantu.

²⁰Ke bantu bakuabu kumanyisha Yezu ne: — Mamuebe ne bana benu badi pambelu, bakeba kumonangana nebe.

²¹Ke Yezu kuambila bantu bonsu ne: — Mamu ne bana betu mbantu badi bateleja muaku wa Mvidi Mukulu, baukumbaja.

²²Dituku dikuabu Yezu kubuela mu buatu ne balongi bende. Kubambilaye ne: — Tusabukayi dia muamua dia dijiba.[79] Kuyabu.

²³Pavuabu bita buatu, Yezu kulala tulu. Bu mpindiewu tshipepele tshikole kutuuta pa dijiba. Mayi kuwula mu buatu. Bavua mu njiwu.

²⁴Ke balongi kusemena kudi Yezu, bamubisha, bamuambila ne: — Mfumu, mfumu, tudi tufua! Yezu utabuluka ku tulu, kukanyina tshipepele ne mavuala. Kubatamabi, bionsu kushala talalaa.

²⁵Ke Yezu kukonka balongi ne: — Ditaba dienu diepi? Kadi balongi bavua ne bowa, bakema, bambilangana ne: — Muntu ewu nnganyi? Udi utumina mpepele ne mayi diyi, bimuitaba![80]

²⁶Kufikabu dishiya dia dijiba mu buloba bua bena Ngerasa,[81] buludiludi ne ditunga dia Ngalileya.

²⁷Yezu utuluka anu mu buatu, kusambakenaye ne muntu ufumina mu tshimenga. Ke muntu uvuabu bakengesha kudi mikishi mibi kuonsu eku. Kavua uvuala kabidi bilamba, kavua usomba mu nzubu. Uvua amu muaba uvua nkita.

²⁸Muntu awu umona Yezu, kuelaye lubila, udiela ku makasa ende, wamba ne diyi dikole ne: — Yezu, Muana wa Mvidi Mukulu Muena kulu, butudi nebe mbunganyi? Ndi nkusengelela ne: kunkengeshi to.

²⁹Uvua wamba nanku, bualu Yezu uvua utumina mukishi mubi diyi, bua upatuke munda muende. Mukishi mubi awu uvua mumukuate misangu mivule. Diba adi bavua bamusuika nkanu ku bianza ne ku makasa, bua kanyemi. Kadi yeye uvua utula nkanu ayi, mukishi mubi umutuma amu mu tshipela.

³⁰Yezu kumukonka ne: — Dina diebe nnganyi? Yeye kumuandamuna ne: — Dina dianyi: “mMusumba.” Bualu mikishi mivule ivua mimubuele munda.

³¹Mikishi ayi ivua isengelela Yezu, bua kayitumi mu kandondu ka buloba.

³²Muaba awu muvua tshisumbu tshinene tshia ngulube,[82] yenda idia ku mukuna. Mikishi mibi kutendakena Yezu bua anyishe, ibuele munda mua ngulube. Yezu kuitaba.

³³Nanku mikishi mibi kupatuka munda mua muntu, kubuela mu ngulube. Ngulube yonsu kupulumuka mu tshibungubungu, kudiela mu dijiba dia mayi, kufuilamu.

³⁴Bantu bavua balama ngulube bamona nanku, kunyemabu. Kutangalajabu lumu lua bualu abu mu tshimenga ne mu misoku.

³⁵Ke bantu kufika bua kudimuena bivua bienzeke. Basemena pabuipi ne Yezu, kusanganabu muntu uvua mikishi mibi mishiye, musombe ku makasa a Yezu, muvuale bilamba, lungenyi lubutama. Ke bowa kukuata bantu.

³⁶Bavua bamona bivua bienzeka, kulondela bavua bafika amu mpindiewu, muvua muntu uvua ne mikishi mibi mupande.

³⁷Nanku bantu bonsu ba mu buloba bua Ngerasa kulomba Yezu bua umuke muaba awu, bualu bavua ne bowa bua bungi. Ke Yezu kubuela mu buatu, kuya.

³⁸Muntu uvua mikishi mibi mishiye, kusengelela Yezu bua baye nende. Kadi Yezu kumupingaja kuabu, wamba ne:

³⁹— Pingana kuenu. Ulondele bantu bionsu bidi Mvidi Mukulu mukuenzele. Nanku muntu awu kuya, kuambila bantu ba mu tshimenga tshijima malu onsu avua Yezu mumuenzele.

⁴⁰Pavua Yezu ufuma dia muamua dia dijiba, bantu bavule bavua bamuakidila, bualu bonsu bavua bamuindile.

⁴¹Ke muntu mukuabu kufika, dina diende Yayire. Uvua mulombodi wa nzubu wa ditendelela wa bena Yuda wa muaba awu. Kudielaye panshi ku makasa a Yezu, umusengelela, bua aye ku nzubu kuende.

⁴²Bualu muanende wa bakaji umue epele wa mvula dikumi ne ibidi uvua upunga ne lufu. Pavua Yezu uya ku nzubu aku, bantu bavule bavua bamufimpakaja nseke yonsu.

⁴³Muaba awu muvua mukaji uvua ne disama dia mashi a muyeya kukadi bidimi dikumi ne bibidi. Uvua mufute baminganga bionsu bi-vuaye nabi.[83] Kadi muntu nansha umue kavua mujikije disama diende.

⁴⁴Mukaji awu uvua ulonda Yezu munyima. Kulengaye luzemba lua tshilamba tshiende. Diakamue mashi ende a muyeya kukama.

⁴⁵Yezu kuebeja bantu ne: — Uvua mundenge nnganyi? Bantu bonsu kuandamuna ne: — Katuena bakulenge to. Ke Petro kuamba ne: — Mfumu, bantu bavule mbakuele munkatshi, mbakufimpakaje nseke yonsu.

⁴⁶Kadi Yezu kuamba ne: — Muntu uvua mundenge, bualu ndi mumvue bukole bumpatuke.

⁴⁷Mukaji kumona ne: mbanjandule. Kuyaye kudiela ku makasa a Yezu, uzakala. Bantu bonsu bavua bamuteleje, pavuaye ulondela Yezu tshivuaye mumulengele, kabidi muvua disama diende dijika diakamue.

⁴⁸Yezu kumuambila ne: — Muananyi wa bakaji, waya mu bupole. Disama diebe ndimane kujika, anu bua ditaba diebe.[84]

⁴⁹Yezu utshivua wakula, muena mudimu wa Yayire kufika, wambila mfumuende ne: — Muanebe wa bakaji mmumane kufua. Kutatshishi mulongeshi kabidi to.

⁵⁰Kadi Yezu umvua nanku, kuambilaye Yayire ne: — Kuzakadi to. Ikala amu ne ditaba. Muana neapande.

⁵¹Yezu ufika kumbelu, kavua musue kubuela mu nzubu ne bantu bakuabu to, anu ne Petro, Yowanane, Yakobe, kabidi ne baledi ba muana.

⁵²Bantu bonsu bavua badila muana, bela miyenga. Ke Yezu kubapuwisha ne: — Puwayi! Nsongakaji ki mmufue to. mMulale!

⁵³Bantu abu kuseka Yezu, bualu bavua bamanye ne: nsongakaji mmumane kufua.

⁵⁴Kadi Yezu kumukuata ku tshianza, wela diyi dikole ne: — Nsongakaji, biika!

⁵⁵Nsongakaji kubiika ku lufu, kujuka diakamue. Yezu kuambila bantu bua bamupeshe biakudia.

⁵⁶Baledi bende bavua bakema bikole. Kadi Yezu kubakandika bua kabambidi muntu bivua bienzeka.