Read Tshiluba Dielulula 1 Bible Online

Dielulula 1 - Tshiluba bible

Dielulula 1

¹Mukanda ewu udi utuambila malu avua Moshe muyukile ne bena Izrayele bonsu, patshivuabu luseke ludi diba dipatukila lua musulu wa Yardene, mu tshipela tshidi pabuipi ne Sufe. Ku luseke lumue lua tshipela etshi kuvua tshimenga tshia Parane, ku luseke lukuabu kuvua bimenga ebi: Tofele, Labane, Asherote ne Di-Zahabe.[1]

²(Kumukila ku mukuna wa Sinayi bua kufika ku Kadeshe-Barneya, muntu udi mua kuenda matuku dikumi ne dimue, pikalaye mulonde njila wa ku mikuna ya Seyire.[2])

³Dituku dia kumpala dia ngondu wa dikumi ne umue, bena Izrayele bamane kukumbaja bidimu makumi anayi katshia bapatuke mu Ejipitu, Moshe kubamanyisha bionsu bivua Maweja-Nangila mutume diyi bua kuenzabu.

⁴Malu aa avua menzeke, Moshe mumane kutshimuna Sihone, mukalenga wa bena Amore, uvua muase ku Eshebone. Uvua mumane kutshimuna kabidi mu tshimenga tshia Edreyi, Oge, mukalenga wa Bashane, uvua muase ku Ashetarote.[3]

⁵Nanku mu ditunga dia Mowabe, luseke ludi diba dipatukila lua musulu wa Yardene, Moshe kutuadija kulongesha bena Izrayele mikenji ya Mvidi Mukulu, ubambila ne:

⁶— Patuvua ku mukuna wa Sinayi. Maweja-Nangila Mvidi Mukulu wetu uvua mutuambile ne: “Nudi bashale ku mukuna eku matuku mapite bungi.

⁷Mpindiewu bangayi luendu tshiakabidi. Nuye luseke ludi ne mikuna, muaba udibu base kudi bena Amore. Nuye kabidi mu buloba budi mutumba ne bena Amore, budibu base kudi bena Kenaane: ke ku mpata ya Yardene, ku mikuna, mu mpata ya luseke lua Mayi manene, mu tshitupa tshia kuinshi tshia ditunga, ne ku luseke lua muelelu wa Mayi manene. Nutungunuke ne luendu too ne ku mikuna ya Lebanone, ne ku musulu munene wa Perate.[4]

⁸Ditunga edi dijima ke dimvua mulaye bankambua benu Abrahame, Izake, Yakobe, ne ndelanganyi yabu. Ndi nnupeshadi. Nuye kudikuata.”

⁹Moshe kuambila kabidi bena Izrayele ne: Tshikondu etshi, mvua mumane kunumanyisha ne: “Meme nkayanyi tshitshiena mua kuambula bujitu bua kunulombola to.

¹⁰Maweja-Nangila Mvidi Mukulu wenu mmunuvudije. Mpindiewu nudi bungi bu mitotu ya mulu.

¹¹Ndi njinga bua Maweja-Nangila, Mvidi Mukulu wa bankambua benu, anuvudije kabidi, nuvulangane misangu tshinunu. Anuele lupemba, bu muvuaye munulaye.

¹²Kadi numanye bimpe ne: meme nkayanyi tshiena mua kuambula bujitu bua kunulumbuluisha mu bilumbu bienu, ne mu matandu adi munkatshi muenu to.

¹³Nanku mu tshisamba tshionsu, nusungule bantu bashindame, ba meji, ba lumu luimpe, bua mbateke, bikale banulombola.”

¹⁴Nuenu kungandamuna ne: lungenyi alu ludi luimpe.

¹⁵Nanku bua kunulombola, mvua mubikidishe bantu bashindame, ba lumu luimpe, bavua bamane kuikala ne midimu mikuabu mu bisamba bienu. Meme kuteka bua bikale bamfumu, banulombola mu bisumbu bia bantu tshinunu, lukama nansha makumi atanu, too ne ku bia bantu dikumi. Meme kuteka bena Izrayele bakuabu ku mudimu wa kuludika bantu ku tshisamba tshienu tshionsu.

¹⁶Pashishe meme kuambila balumbuluishi bua bakose bilumbu bia bantu mushindu ewu: “Nuteleje bilumbu bia bana benu bimpe. Padi tshilumbu pankatshi pa muena Izrayele ne muanabu, nansha ne muenyi udi munkatshi muenu, nutshikose anu pa tshiotshi.

¹⁷Nukose tshilumbu anu muditshi. Nuteleje muntu yonsu, mubanji ne mupele, kakuyi kansungansunga. Kanutshinyi muntu pa kukosa tshilumbu, bualu nudi nulumbuluisha mu dina dia Mvidi Mukulu. Pikala tshilumbu tshinupita, nufike natshi kundi bua meme kutshiumvua!”

¹⁸Tshikondu atshi, mvua munuambile bionsu binudi ne bua kuenza.

¹⁹Tuetu kumuka ku mukuna wa Sinayi, bu muvua Maweja-Nangila Mvidi Mukulu netu muambe. Tuetu kupitshila mu tshipela tshipite bunene, tshikuatshishe bowa, tshinudi bamanye, tshidi mu njila wa ku mikuna ya bena Amore. Tuetu bamane kufika mu Kadeshe-Barneya,[5]

²⁰meme kunuambila ne: “Tuafiki pabuipi ne mikuna ya bena Amore, idibu batupa kudi Maweja-Nangila Mvidi Mukulu wetu.

²¹Tangilayi: Maweja-Nangila Mvidi Mukulu wenu mmunupe ditunga dinudi bamone edi. Nanku koleshayi muoyi, kanutshinyi. Yayi, nukuate ditunga edi, bu muvua Maweja-Nangila, Mvidi Mukulu wa bankambua benu, mumane kuamba.”

²²Pashishe nuenu bonsu kundomba ne: “Tutume bantu baye kutentekela ditunga, bua batuleje njila wa kupitshila, ne mushindu udi bimenga bituyaya.”

²³Malu anuvua bangambile avua a meji. Meme kuitaba, kusungula bantu dikumi ne babidi ba munkatshi muenu, umue ku tshisamba tshionsu.

²⁴Bantu abu kupitshila luseke lua ku mikuna, kufika mu tshibandabanda tshia Eshekole,[6] kutshitentekela.

²⁵Kututuadilabu bimuma bivuabu bapole mu ditunga adi, bajadikila ne: “Ditunga didi Maweja-Nangila wetu mutupeshe, didi dimpe ditambe!”

²⁶Kadi nuenu nuvua babenga diyi dia Maweja-Nangila Mvidi Mukulu wenu bua kuya mu ditunga adi.

²⁷Nuvua basombe mu ntenta yenu, numutombokela, nuamba ne: “Maweja-Nangila mmutupatule mu Ejipitu bua lukinu. Mmusue kutufila kudi bena Amore bua batushipe!

²⁸Mu ditunga dia Kenaane, tuyaya kuenza tshinyi? Katuena ne dikima dia kuyamu to, bualu bana betu bavua bajadikila ne: bena ditunga adi mbatupite bukole ne bule. Bimenga biabu bidi binene. Bimana bia bimenga mbitumbuke mulu. Kabidi bavua basanganamu ndelanganyi ya Anake, muntu wa mpolondu![7]”

²⁹Ke meme kunuambila ne: “Koleshayi muoyi, kanubatshinyi, kanupampakanyi.

³⁰Maweja-Nangila Mvidi Mukulu wenu udi wenda kumpala kuenu. Neanutshimuine mvita eyi. Nudi bamanye nuwuaye muenze mu Ejipitu,

³¹ne mu tshipela. Nuenu nkayenu nudi bajadike muvua Maweja-Nangila munuambule, bu mudi muntu wambula muanende mu njila, too ne munudi bafike muaba ewu!”

³²Kadi tshikondu atshi, kanuvua batekemene kudi Maweja-Nangila Mvidi Mukulu wenu to.

³³Kadi Yeye ke uvua munudianjidile mu njila, bua kunukebela muaba wa kuasa mitanda. Nanku butuku uvua nenu mu tshikutu tshia kapia tshivua tshinutokeshila njila, mu munya uvua nenu mu divuba.

³⁴Maweja-Nangila umvua bijanu bienu, kufikaye munda. Kuditshipaye, wamba ne:

³⁵“Muntu nansha umue wa ku ndelanganyi eyi mibi, kena mua kufika mu ditunga dimpe, dimvua mulaye bankambua benu to.

³⁶Anu Kalebe, muana wa Yefune, neafike mu ditunga edi, divuaye muye kutentekela. Ndi mumupeshedi, yeye ne ndelanganyi yende, bualu yeye uvua muitabe diyi dianyi, mundamate ne muoyi mujima.”

³⁷Bua bubi buenu ebu, Maweja-Nangila mmumfikile kabidi ne meme munda, unkandika ne: “Nansha wewe mene Moshe kuena ufika mu ditunga dia Kenaane to.

³⁸Anu Yoshuwa, muana wa Nune, muena mudimu webe, ke wafikamu. Umukankamike, bualu yeye ke wafikisha bena Izrayele mu ditunga edi.”

³⁹Pashishe Maweja-Nangila kunuambila bonsu ne: “Bana benu banuvua nuelela meji ne: nebabakuate bonsu mu mvita, anu bobu aba, badi kabayi banji kusunguluja lelu bualu ne mbuimpe, ne mbubi, ke bavuavua kubuela mu ditunga edi ne Yoshuwa. Nembapeshadi bua badikuate.

⁴⁰Kadi nuenu bonsu, pinganayi mu tshipela, nupitshile mu njila wa ku Mayi manene makunze.”

⁴¹Nuenu kungandamuna ne: “Tuvua batombokele Maweja-Nangila Mvidi Mukulu wetu. Kadi mpindiewu, tudi basue kuya kuluangana mvita, bu nuwuaye mututume.” Muntu yonsu wa kunudi kuangata bia mvita, bualu nuvua bele meji ne: mbitekete bua kukuata mikuna eyi.[8]

⁴²Diba adi, Maweja-Nangila kungambila ne: “Ubakandike, kabayi ku mvita, bualu tshiena munkatshi muabu to. Baluishi nebabatshimune.”

⁴³Meme kunuambila bionsu abi. Kadi nuenu kubenga, ditambisha kunuenza. Nuenu kutombokela Maweja-Nangila, kuya anu ku mikuna ayi.

⁴⁴Bena Amore, bavua base ku mikuna ya Seyire aku, kutuluka bua kunuluisha. Kunutshimunabu, kunujingilabu bu mbulubulu, kunulonda too ne ku Orma.[9]

⁴⁵Nuenu kupingana mu mitanda kudi Maweja-Nangila, kumudidila. Kadi kena mubumvue, nansha munuteleje to.

⁴⁶Ke munudi bashale mu Kadeshe-Barneya matuku mapite bungi nanku.