Read Tshiluba Dielulula 10 Bible Online

Dielulula 10 - Tshiluba bible

Dielulula 10

¹Pashishe Maweja-Nangila kungambila ne: “Usonge mabue abidi, mafuanangane ne a kumpala. Wenze kabidi mushete wa mabaya. Ubande ku mukuna kundi eku.

²Nemfundulule pa mabue apu mikenji ya mushindu umue ne ivua pa mabue auvua munyange. Uteke mabue awu mu mushete.”

³Meme kuenza mushete wa mabaya a ndunga, kusonga mabue abidi mafuanangane ne a kumpala. Meme kubanda nabi ku mukuna.

⁴Maweja-Nangila kufundulula mikenji dikumi pa mabue mapiamapia, bu muvuaye mufunde pa mabue a kumpala. Mikenji eyi, ke ivuaye munumanyishe munkatshi mua kapia, dituku dinuvua basangile kuinshi kua mukuna. Pashishe kumpeshaye mabue awu.

⁵Meme kutuluka kabidi ku mukuna, kuteka mabue awu mu mushete umvua muenze, bu muvua Maweja-Nangila mungambile. Kutuadija musangu awu, mabue adi amu mu mushete amu.

⁶(Bena Izrayele kumuka ku mpokolu ya mayi a Bene-Yakane, kuya ku Moshera. Muaba awu ke uvua Arone mufuile. Kumujikabu. Muanende Elazare kumupingana ku mudimu wa butuangaji.[71]

⁷Bena Izrayele kumuka muaba awu, kuyabu ku Ngudengoda. Bumuka aku, kuyabu ku Yotbata, muaba udi misulu mishilangane.

⁸Tshikondu atshi Maweja-Nangila kupesha bena Levi midimu mishilangane eyi: kuambula mushete wa ndondu wa Maweja-Nangila, kuenzela Maweja-Nangila mudimu, kuela bantu lupemba mu dina dia Maweja-Nangila. Midimu eyi, ke itshidibu benza too ne mpindiewu.[72]

⁹Ke pavua bena Levi kabayi bapeta wabu muaba wa bumpianyi bu bisamba bikuabu. Tshiabu tshidibu natshi, mbua kuenzela Maweja-Nangila Mvidi Mukulu wenu mudimu, bu muvuaye mumane kubambila.)

¹⁰Meme kushala ku mukuna matuku makumi anayi a munya ne butuku, bu musangu mukuabu.[73] Musangu ewu kabidi, Maweja-Nangila kuitaba dilomba dianyi. Kena munubutule to.

¹¹Kungambilaye kabidi ne: “Bangayi luendu! Wikale wenda kumpala kua bantu. Baye kukuata ditunga dimvua muditshipe bua kupesha bankambua babu!”

¹²Bena Izrayele, tshidi Maweja-Nangila Mvidi Mukulu wenu utekemena kunudi ntshinyi? Mbua numunemeke, numutumikile, mununange, numuenzele mudimu ne muoyi wenu mujima, kabidi ne bukole buenu buonsu.

¹³Maweja-Nangila udi ujinga bua nukumbaje meyi ne mikenji biende, bindi nnuambila lelu ebi, bua nuikale bena diakalenga.

¹⁴Diulu dijima, buloba ne bionsu bidipu, mbintu bia Maweja-Nangila Mvidi Mukulu wenu.

¹⁵Kale Maweja-Nangila uvua umvuangana amu ne bankambua benu, mubanange anu bobu. Kadi mpindiewu, mmunusungule nuenu, ndelanganyi yabu, munkatshi mua bisamba bionsu, munudi bamone emu.

¹⁶Nudifile muenu muonsu kudi Maweja-Nangila Mvidi Mukulu wenu.[74] Kanumutombokedi kabidi to.

¹⁷Numanye ne: Maweja-Nangila udi mfumu wa mvidie yonsu, ne mukalenga wa bakalenga. Yeye ke Mvidi Mukulu munene ne wa bukole bonsu, udi bantu bonsu batshina. Kena ne kansungansunga to.[75] Kena witaba mabuejilu to.

¹⁸Maweja-Nangila udi wakuila bakaji bakamba ne bana ba nshiya. Udi unanga bantu benyi badi munkatshi muenu, ubapesha bilamba ne biakudia.

¹⁹Nanku nuenu bena Izrayele, nunange bantu benyi badi munkatshi muenu. Bualu nuvua penu benyi mu ditunga dia Ejipitu.

²⁰Nunemeke Maweja-Nangila Mvidi Mukulu wenu, numulamate amu yeye. Nuntendelele, nuditshipe anu mu dina diende.

²¹Numutumbishe, bualu yeye nkayende ke Mvidi Mukulu wenu. Udi munuenzele malu manene a kukema, adi akuatshisha bowa, anudi bamone.[76]

²²Pafikile bankambua benu mu Ejipitu, kabavua bapite ku makumi muanda mutekete to. Kadi mpindiewu, Maweja-Nangila Mvidi Mukulu wenu mmunuvudije bu mitotu ya mulu.[77]