Read Tshiluba Dielulula 12 Bible Online

Dielulula 12 - Tshiluba bible

Dielulula 12

¹Meyi ne mikenji binudi ne bua kukumbaja matuku onsu mu ditunga, didi Maweja-Nangila, Mvidi Mukulu wa bankambua benu, munupe bua kusomba kashidi, bidi nunku:

²Nunyangakaje miaba ya tshijila yonsu, idibu base pa nsongu ya mikuna minene ne mikese, munkathi mua mitshi ya dileji, muaba udibu batendelela mvidie kudi bisamba binuanyenga matunga abi.

³Nunyangakaje bilambuilu biabu. Nupule mabue adibu bimanyike. Nuoshe makunji a tshijila. Nushimbule mpingu ya mvidie yabu. Nukuate mudimu bua bantu kabavuluki kabidi nansha mena mene a mvidie ayi miaba yonsu ivuabu bayitendelela.[89]

⁴Panudi nutendelela Maweja-Nangila Mvidi Mukulu wenu, kanulondi bibidilu bia bisamba abi to.

⁵Mu buloba bua bisamba bienu, Maweja-Nangila neasungule muaba anu umue, muaba udiye musue kusomba bua numonangane nende, numutendelelemu.

⁶Muaba awu, ke unudi mua kulambuila bintu bionsu binudi nabi: milambu ya kuosha, ya bobumue, tshia dikumi tshia bintu bia mu madimi, milambu ya budisuile, milambu ya mapiku, too ne ya banabute ba bimuna bienu: ngombe, mikoku ne mbuji.

⁷Mu nzubu wa tshijila wa Maweja-Nangila, ke munudi mua kudila biakudia bia tshijila, pamue ne bena meku enu bonsu. Nuenu nenusanke bua bilenga bionsu bidi Maweja-Nangila, Mvidi Mukulu wenu, munupe mu bionsu binudi nuenza.

⁸Nanku kanuena mua kutendelela kabidi Maweja-Nangila munudi nuenza mpindiewu to, muntu yonsu utendelela wende mushindu.

⁹Nuenu kanuena banji kufika mu ditunga didi Maweja-Nangila ne bua kunupa, bua nusombemu talala.

¹⁰Kadi nenusabuke musulu wa Yardene, bua kusomba mu ditunga adi ne ditalala. Yeye neanulame bimpe. Baluishi benu bonsu, bena mutumba, kabakunuenzela bualu.

¹¹Diba adi, muaba wikala Maweja-Nangila Mvidi Mukulu wenu musungule bua kusomba, nenumutuadile milambu eyi mishilangane, imvua munuambile: ya kuosha, ya bobumue, ya tshia dikumi tshia bintu bia mu madimi, ya budisuile, ne ya mapiku, inuvua bamulaye.

¹²Muaba wa Maweja-Nangila Mvidi Mukulu wenu awu, nenusanke bonsu, nuenu, bana benu ne bena mudimu benu. Kabidi bena Levi, badi basa mu bimenga bienu, kabayi ne wabu muaba wa kuasa munkatshi muenu, nebasanke pabu.[90]

¹³Nuenu bena Izrayele, dimukayi: kanuena mua kulambula milambu yenu miaba yonsu ya tshijila inudi numona to.

¹⁴Milambu ayi, nuyilambuile anu muaba wa tshijila wikale Maweja-Nangila musungule mu buloba bua tshisamba tshimue tshia ku bisamba bienu. Muaba awu, ke unudi mua kukumbajila bionsu bindi nnuambila.

¹⁵Bimuna bionsu bikale Maweja-Nangila munupe mu ditunga dinuasomba, muntu yonsu udi ne mikiya nansha udi kayi nayi, udi mua kubishipa, kudia munyinyi wabi bu mudiye musue, ne muaba udiye musue, anu bu munutu nudia munyinyi wa kabuluku, nansha wa ngulungu.[91]

¹⁶Kadi kanuena mua kudia mashi a nyama to.[92] Nualekele, apueke panshi bu mayi.

¹⁷Milambu yonsu inudi nulambula Maweja-Nangila: ya ntete ya kuenza bukula, ya maluvu, ya mafuta, ya bamuanabute ba bimuna bienu, ngombe, mikoku, mbuji, milambu ya budisuile ne ya mapiku, kanuena mua kudila bintu bia ku milambu ayi mu nzubu yenu to.

¹⁸Bintu bia tshijila abi, nuenu, bana benu, bena mudimu benu, ne bena Levi, badi mu bimenga bienu, nenubidile amu muaba wa tshijila, wikale Maweja-Nangila Mvidi Mukulu wenu musungule. Nanku muaba awu nenuikale ne disanka dia bungi, bua bionsu binuikala bakumbaje.

¹⁹Numanye ne: matuku onsu anudi mu ditunga dienu, kanuena mua kulengulula bena Levi to.

²⁰Pikala Maweja-Nangila wenu mudiundishe ditunga dienu bu muvuaye mulaye, nenuikale nudia munyinyi munudi basue.

²¹Panuikala kanuyi pabuipi ne muaba wikale Maweja-Nangila Mvidi Mukulu wenu musungule bua yeye kusomba, nudi mua kushipa bimuna bidiye munupe: ngombe, mikoku, mbuji, kudia munyinyi miaba yonsu inudi basombe. Kadi mwuluke anu mikenji indi mumane kunuambila.

²²Nanku muntu yonsu udi ne mikiya, nansha udi kayi nayi, udi mua kudia munyinyi awu, mudiye musue, bu munudi nudia munyinyi wa kabuluku, nansha wa ngulungu.

²³Kadi numanye ne: Kanuena mua kudia mashi a nyama to. Bualu mu mashi ke mudi muoyi.[93] Nanku kanuena mua kudia munyinyi, kudia kabidi ne muoyi to.

²⁴Kadi nulekele mashi, amate panshi bu mayi.

²⁵Nuenu benze nanku, nenuikale bena diakalenga, nuenu pamue ne ndelanganyi yenu, bualu binudi nuenza nebilengelele Maweja-Nangila.

²⁶Kadi nyama ya tshijila, nansha ya mulambu wa mapiku, nuyilambuile anu muaba wikale Maweja-Nangila musungule.

²⁷Pikala mulambu awu wa kuosha, nulambule munyinyi ne mashi pa tshilambuilu tshia Maweja-Nangila Mvidi Mukulu wenu. Kadi pikalawu wa bobumue, nuele mashi pa tshilambuilu tshia Maweja-Nangila, pashishe nudie munyinyi.

²⁸Nuenu bena Izrayele nuteleje bionsu bindi nnuambila, nubikumbaje. Nanku, misangu yonsu nenuikale bena diakalenga, nuenu ne ndelanganyi yenu. Bualu nenuenze bidi bimpe, bisankisha Maweja-Nangila Mvidi Mukulu wenu.

²⁹Panuafika mu ditunga, Maweja-Nangila Mvidi Mukulu wenu neabutule bisamba bionsu bidi mu ditunga adi. Nanku nenubinyenge ditunga adi bua nusombemu.

³⁰Pikala Maweja-Nangila mumane kubutula bantu abu, kanulondi bibidilu biabu to. Kanutendeledi mvidie yabu. Kanuidikiji mushindu uvuabu bayitendelela.

³¹Nanku panudi nutendelela Maweja-Nangila Mvidi Mukulu wenu, kanuenji muvua bena ditunga benza to. Bualu mu ditendelela diabu, bavua benza bivua Maweja-Nangila mubenge. Bavua balambula mvidie yabu too ne bana babu ba balume ne ba bakaji!