Read Tshiluba Dielulula 13 Bible Online

Dielulula 13 - Tshiluba bible

Dielulula 13

¹Nukumbaje mikenji yonsu indi munuambile eyi. Kanusakididi bualu, kanumbushi bualu.[94]

²Dituku dikuabu, pikala muambi nansha muntu udi Mvidi Mukulu uleja malu[95] munumuenekela, nnumanyisha tshishima,

³tshishima atshi tshienzeka bu muvuaye munuambile, muntu awu unuambila bua kutendelela mvidie inudi kanuyi bamanye, kuyenzela mudimu,

⁴kanumuitabi to. Bualu Maweja-Nangila Mvidi Mukulu wenu, udi unuteta bua kujadika ne: nudi bamunange ne bukole buenu buonsu, kabidi ne muoyi wenu mujima anyi?

⁵Nutendelele amu Maweja-Nangila Mvidi Mukulu wenu. Numunemeke, nutumikile mikenji yende, numulamate, numuenzele mudimu.

⁶Muambi yonsu, nansha muntu udi Mvidi Mukulu uleja malu, padiye unumusha kudi Maweja-Nangila Mvidi Mukulu wenu, uvua munupatule ku bupika mu Ejipitu, numushipe. Bualu uvua musue kunumusha mu njila uvua Maweja-Nangila Mvidi Mukulu wenu munuambile bua kulonda. Nanku numushe bubi buonsu munkatshi muenu.

⁷Dituku dikuabu pikala muntu wa kunudi, bamubikila mu musokoku kudi muanabu wa balume, kudi muanabu wa bakaji, kudi mukajende mene, nansha kudi mulunda wende udiye mupite kunanga, bua kutendelela mvidie mikuabu, inuvua kanuyi bamanye, nansha nuenu nansha bankambua benu, kanuena mua kumuitaba to.

⁸Mvidie eyi ke idibu batendelela kudi bantu ba bisamba bikuabu, bidi pabuipi nenu, nansha bidi kule, pa buloba bujima.

⁹Kanuena mua kuitaba bionsu ebi, nansha kuteleja mene bidibu banuambila to. Muntu udi utendelela mvidie eyi, mmuena tshibawu. Kanuena mua kumufuila luse, kanuena mua kumuakuila.

¹⁰Muntu yonsu udi unuambila bua kutendelela mvidie, bamushipe. Muntu uvuaye wambila bua kutendelela mvidie, ke udi udianjila kumuasa dibue. Bantu bakuabu, kushisha kumuambuluisha bua kumushipa.

¹¹Muena tshibawu awu, bamushipe anu ne mabue. Bualu uvua musue kumusha muntu mukuabu kudi Maweja-Nangila Mvidi Mukulu wenu, uvua munupatula ku bupika mu Ejipitu.

¹²Nanku pikala bena Izrayele bonsu bumvua bualu ebu, nebatshine. Kabakuenza kabidi malu mabi a nanku to.

¹³Dituku dikuabu, nudi mua kumvua ne: mu tshimue tshia ku bimenga, bidi Maweja-Nangila Mvidi Mukulu wenu munupe bua kusomba,

¹⁴mudi bantu babi badi bambila bena Izrayele bua kutendelela mvidie inudi kanuyi bamanye mpindiewu.

¹⁵Diba adi, nuebejangane, nulondakajangane bimpe bua kujadika ne: bualu ebu mbulelela anyi? Nuenu bajadika menemene ne: mbenze nanku,

¹⁶nushipe bantu bonsu ba mu tshimenga atshi ne bimuna biabu. Pashishe nubutule tshimenga atshi tshijima, kabidi ne bionsu bidimu.

¹⁷Nukungule bubanji buonsu bua mu tshimenga atshi muaba umue, muaba udi bantu bambilangane malu. Nubioshe musangu umue ne tshimenga atshi, bua bikale bu mulambu wa kuoshila Maweja-Nangila Mvidi Mukulu wenu. Tshimenga atshi nutshiupule bua kashidi, kabayi mua kutshiasulula kabidi to.

¹⁸Kanuena mua kuangata tshintu nansha tshimue tshia bidibu ne bua kuosha, bua Maweja-Nangila Mvidi Mukulu wenu amone mua kutuyisha tshiji tshiende. Diba adi, neanufuile luse. Nenuvulangane, bu muvuaye mulaye bankambua benu.

¹⁹Panuikala numuitaba, nukumbaja meyi ne mikenji bindi nnuambila lelu ebi, nuenza bidi bimulengelela, nenupete diakalenga kudiye, nupangane.