Read Tshiluba Dielulula 2 Bible Online

Dielulula 2 - Tshiluba bible

Dielulula 2

¹Pashishe tuetu kualuka, kupingana mu tshipela, batangile ku Mayi manene makunze,[10] bu muvua Maweja-Nangila mungambile. Tuetu kushala ku mikuna ya Seyire matuku mapite bungi.

²Dituku dikuabu, Maweja-Nangila kungambila ne:

³“Pitshilayi luseke lua ku mutu wa ditunga, bualu nudi bashale mu mikuna eyi matuku mapite bungi.”

⁴Maweja-Nangila kuntuma bua kunumanyisha ne: “Nupitshile ku mikuna ya Seyire, muaba udibu basombe kudi bana benu, ndelanganyi ya Esawu.[11] Nebanutshine. Kadi nuikale badimuke.

⁵Kanubabundi to. Tshiakunupesha kantu ka mu ditunga diabu to, nansha katupa ka buloba kakese. Bualu ndi mumane kupesha ndelanganyi ya Esawu mikuna ya Seyire.

⁶Nanku biakudia bionsu, too ne mayi a kunua, nuikale anu misumba.”

⁷— Bualu Maweja-Nangila Mvidi Mukulu wenu mmunuendeshe diakalenga mu bionsu binuvua nuenza. Uvua nenu, munulame bimpe mu luendu mu tshipela tshinene atshi, bidimu makumi anayi, kanuyi nukengela tshintu.

⁸Nanku tuvua babenge kupitshila ku mikuna ya Seyire, muaba uvuabu basombe kudi bana betu, ndelanganyi ya Esawu. Tuvua babenge kabidi kupitshila mu njila wa kuinshi wa mu tshibanda, ne mu misoku ya Elate, ne Eshiyone-Ngebere. Tuetu kubenda, bua kupitshila mu tshipela tshia Mowabe.[12]

⁹Maweja-Nangila kunkandika ne: “Kanubundi bena Mowabe, kanuluanganyi nabu to. Tshiakunupesha kantu nansha kamue ka mu ditunga edi to. Bualu ditunga edi dia Are, ndi mumane kudipesha ndelanganyi ya Lote.[13]”

¹⁰(Bena Emi ke bavua badianjila kuasa mu ditunga dia Are. Bavua bantu ba bukole. Bavua ba bungi, kabidi banene bale, bu ndelanganyi ya Anake.[14]

¹¹Bantu bakuabu badi babikila bena Emi ne: mbena Refayime,[15] bu mudibu babikila kabidi bena Anake. Kadi bena Mowabe badi bababikila anu ne: mbena Emi.

¹²Bena Ori ke bavua badianjila kuasa mu ditunga dia Seyire. Kadi ndelanganyi ya Esawu kubashipa, kubanyenga ditunga adi, kusombamu. Ke mushindu uvua bena Izrayele benza bua kukuata ditunga, divua Maweja-Nangila mubapeshe.)

¹³Pashishe tuetu kusabuka musulu wa Zerede[16] wa muenji mukole, bu muvua Maweja-Nangila mutuambile.

¹⁴Kadi bua kumuka ku Kadeshe-Barneya, kufika ku musulu ewu, tuvua banenge mu njila bidimu makumi asatu ne muanda mukulu. Tshikondu atshi, bantu bonsu bathivua ne bukole bua kuluangana mvita papatukilabu mu Ejipitu, bakafua bamane kubutuka, bu muvua Maweja-Nangila mumane kuditshipa.[17]

¹⁵Nanku anu Maweja-Nangila nkayende kubanyoka, kubabutula bonsu nkong.

¹⁶Bonsu abu bamane kufua,

¹⁷Maweja-Nangila kushisha kungambila meme Moshe ne:

¹⁸“Mpindiewu nupitshile ku mikalu ya ditunga dia Mowabe, nukosoluele mu ditunga dia Are.

¹⁹Nenufike pabuipi ne ditunga dia bena Amone. Kadi kanubedi diyi, kanubabundi to, bualu bobu kabidi nndelanganyi ya Lote. Tshiakunupesha kantu nansha kamue ka mu ditunga diabu. Ndi mumane kubapesha ditunga edi.[18]”

²⁰(Bantu bavua bamba ne: muaba ewu ngua bena Refayime, bualu bobu ke bavua basemu bangabanga. Kadi bena Amone bavua babikila bena Refayime ne: mbena Zamzumi.

²¹Bena Refayime bavua bantu ba bukole. Bavua ba bungi, kabidi banene bale, bu muvua ndelanganyi ya Anake. Kadi Maweja-Nangila kubabutula bonsu, pakafika bena Amone. Nanku bena Amone kukuata ditunga adi, kuasamu.

²²Ke muvua Maweja-Nangila muenzele kabidi ndelanganyi ya Esawu, ivua misombe mu Seyire nanku. Uvua mubutule bena Ori bonsu kumpala kuabu. Nanku ndelanganyi ya Esawu kukuata ditunga adi, kuasamu. Batshidimu too ne ku lelu.

²³Kadi bena Avi, bavua basombe mu misoku ya mu ditunga dia Ngaza, bavua bababutula kudi baluishi bafumine ku Kaftore.[19] Baluishi aba kuasa mu ditunga adi.)

²⁴Ke Maweja-Nangila kutuambila ne: “Mpindiewu bangayi luendu. Sabukayi musulu wa Amone. Nennupe Sihone, muena Amore, mukalenga wa mu Eshebone, ne ditunga diende. Mubundayi, nukuate ditunga diende!

²⁵Kutuadija lelu, nenkuatshishe bisamba bionsu bia pa buloba bowa. Bobu bumvue lumu luenu, nebazakale, banutshina.”

²⁶Patuvua mu tshipela tshia Kedemote,[20] mvua mutume bantu bua kusengelela Sihone, mukalenga wa mu Eshebone, ne:

²⁷“Tudi basue kupitshilaku mu ditunga diebe. Netupite anu ne njila, katuyi tuapuka nansha ku dia balume nansha ku dia bakaji.

²⁸Utulekele tupite. Patuikala dijinga ne biakudia, nansha ne mayi a kunua, netusumbe.

²⁹Ndelanganyi ya Esawu, idi misombe mu mikuna ya Seyire, ne bena Mowabe, badi basombe mu Are, mbamane kuitaba bua tupitshile muabu.[21] Pashishe netusabuke musulu wa Yardene, bua tufike mu ditunga, didibu batupe kudi Maweja-Nangila Mvidi Mukulu wetu.”

³⁰Kadi mukalenga Sihone ewu kubenga bua tuetu kupitshila mu ditunga diende. Maweja-Nangila kumupesha muoyi wa tshitunu, bua numone mua kumunyenga ditunga dinudi mpindiewu.

³¹Maweja-Nangila kungambila ne: “Bituadije ku lelu, ndi mumane kufila mukalenga Sihone ne bantu bende mu bianza bienu. Kuatayi ditunga diende, nuasemu!”

³²Nanku Sihone ne tshikulu tshiende, kutubunda pabuipi ne tshimenga tshia Yahase.

³³Maweja-Nangila Mvidi Mukulu wetu kutuambuluisha. Tuetu kutshimuna Sihone, bana bende ba balume, ne tshiluilu tshiende tshionsu.

³⁴Tuetu kushisha kunyenga bimenga biende bionsu, kubibutuilamu, kushipa balume, bakaji ne bana. Katuena bashiye muntu ne muoyi to.

³⁵Tuetu kukuata bimuna, ne bintu bionsu bituvua basangane mu bimenga abi.

³⁶Maweja-Nangila Mvidi Mukulu wetu, uvua mutuambuluishe bua kukuata bimenga bionsu bivua pankatshi pa tshimenga tshia Aroyere, tshidi pabuipi ne musulu wa Amone, ne tshimenga tshikuabu tshidi mu tshibandabanda tshine atshi, too ne ku ditunga dia Ngilaade. Tshimenga nansha tshimue tshia mu bimenga ebi, katshivua ne bukole bua kutuluisha.

³⁷Nanku katuena bafike mu ditunga dia bena Amone, ne mu misoku yonsu idi ku luseke ludi diba dipatukila lua musulu wa Yaboke, ne mu bimenga bionsu bidi pa mikuna, ne miaba ivua Maweja-Nangila Mvidi Mukulu wetu munkandike bua katufikimu.