Read Tshiluba Dielulula 22 Bible Online

Dielulula 22 - Tshiluba bible

Dielulula 22

¹Nuenu basangane tshimuna tshia muanenu tshijimine: ngombe, mukoku nansha mbuji, kanutshilekedi tshipita to. Nutshipingaje kudi muenatshi.

²Pikala muena tshimuna atshi kule, nansha panuikala kanuyi bamumanye, nulame amu tshimuna atshi ku nzubu kuenu, too ne pafika muenatshi bua kutshiangata. Diba adi, numupeshetshi.

³Nuenu basangane kabidi mpunde wa muanenu, tshivualu tshiende, nansha tshintu tshikuabu tshimujimine, kanuena mua kulengulula tshintu atshi to. Nutshiangate, numupeshetshi.

⁴Nuenu basangane muanenu utata ne ngombe, nansha mpunde wende, mudishinde mutshibukile panshi mu njila, kanumulekedi utata nkayende. Numuambuluishe bua kujula nyama awu panshi.[143]

⁵Mukaji kena mua kuvuala bilamba bia mulume. Mulume kena mua kuvuala bilamba bia mukaji. Maweja-Nangila Mvidi Mukulu wenu kena musue bantu badi benza malu a mushindu ewu to.

⁶Nuenu bapite mu njila, basangane disua dia nyunyi kulu kua mutshi nansha panshi, pikala nyunyi awu muladile, nansha mumane kutoya, kanumukuatshi musangu umue ne bana bende to.

⁷Nulekele nyunyi awu aye. Nuambule amu bana bende. Nanku nenuikale bena diakalenga, nushale ne muoyi panu matuku a bungi.

⁸Panudi nuasa nzubu mupiamupia, nuenze bimana binyungulule musaka wa nzubu awu. Bualu bu muntu mukuluke ku musaka mufue, nenupete tshilumbu.

⁹Kanukunyi bintu bia mushindu mukuabu mu budimi bua mitshi ya maluvu a mvinyo. Bualu nuenu benze nanku, bintu bionsu binudi nunowa mu budimi abu, tumuma tua mvinyo ne bikunyibua bikuabu, nebishale bia tshijila bia Maweja-Nangila.

¹⁰Kanusuikakaji mpunde ne ngombe ku ditempu dimue bua kudima to.

¹¹Kanuvuadi bilamba bibidi bilamakaja: etshi tshia miosa ya nyama, tshikuabu tshia buanda bua ndanda.[144]

¹²Nuteleshe malenda ku ntengu inayi ya bilamba binudi nuvuala.[145]

¹³Pikala muntu mumane kusela mukaji, umubuelela mu nzubu, pashishe umubenga, kumushiminyina ne:

¹⁴Ngasedi mukaji ewu, kadi mbamusanganyi mumane kumanyangana ne balume”,

¹⁵baledi ba mukaji awu nebaleje bakulu ba mu tshimenga tshimanyinu tshidi tshijadika muvua muanabu wa bakaji kayi mumanyangane ne mulume.[146]

¹⁶Tatuende wa mukaji neambile bakulu abu ne: “Nsongalume ewu uvua musele muananyi wa bakaji. Kadi katshiena mumunange to.

¹⁷Udi umushiminyina, ungambila ne: mmumane kumanyangana ne balume. Tshimanyinu tshidi tshijadika ne: kavua mumanyangane ne balume ntshietshi.” Baledi ba mukaji, nebaleje bakulu ba mu tshimenga tshilamba tshia bulalu, tshidi ne makeji a mashi a dituku dia kumpala, divua mulume mubuelele mukaji awu mu nzubu.

¹⁸Pikala tshilamba atshi ne mashi, bakulu ba mu tshimenga nebakuate mulume awu, bamunyoke.

¹⁹Pashishe mulume neafute tatuende wa mukaji awu tshibawu tshia nkanu lukama ya tshiamu tshitoke tshia mushinga mukole. Bualu uvua munyange lumu lua nsongakaji wa bena Izrayele. Neashale anu ne mukajende kashidi too ne muafuaye. Matuku ende onsu a panu kena mua kumubenga to.

²⁰Kadi pikala mulume wamba bulelela, baledi ba mukaji kabayi ne tshimanyinu,

²¹bakulu ba mu tshimenga nebimanyike mukaji ewu mu mushiku wa mbelu wa nzubu wa tatuende. Bantu balume ba mu tshimenga nebamuase mabue, bamushipe. Bualu mmuenze bualu bua dikamakama, patshivuaye ku nzubu kua baledi bende. Ke munudi mua kujikija buenzayi bua mushindu ewu munkatshi mua bena Izrayele nanku.

²²Pikalabu bakuate muntu mubuelele mukaji wa bende mu nzubu, babajikile, babashipe bonsu babidi. Ke munudi mua kujikija buenzayi munkatshi mua bena Izrayele nanku.

²³Mu tshimenga tshienu, pikalamu nsongakaji mumane kubangila, bamubuelele mu nzubu kudi mulume mukuabu,

²⁴nubimanyike bonsu babidi ku tshiibi tshia tshimenga,[147] nubase mabue, nubashipe. Bualu mbenze bualu ebu mu tshimenga, kadi nsongakaji kena muele mbila, kena mubikile bantu. Nsongalume pende mmukuate nsongakaji, mumane kubangila awu, ku bukole, mumubuelele mu nzubu. Ke munudi mua kujikija buenzayi munkatshi muenu nanku.

²⁵Kadi pikala mulume wenza bualu bua mushindu ewu, mukuate ku bukole mu tshisuku mukaji mumane kubangila, nushipe anu mulume nkayende.

²⁶Nulekele nsongakaji ne muoyi. Bualu kena muenze tshilema tshidi tshikumbanyine dinyoka dia lufu. (Bidi bifuanangana ne muntu udi muntu mukuabu ubunda kakuyi bualu, ushipa.)

²⁷Bualu mu thisuku amu, nansha nsongakaji muele mbila, muntu kavua mua kumueneka bua kumusungidila to.

²⁸Kadi pikalabu bajikile mulume, ne nsongakaji udi kayi mubangile, mulume umukuata ku bukole,

²⁹mulume neafute tatuende wa nsongakaji tshibawu tshia nkanu makumi atanu ya tshiamu tshitoke tshia mushinga mukole. Pashishe neangate mukaji kashidi, too ne muafuaye, kayi mua kumubenga[148] musangu nansha umue to. Bualu uvua mumubuelele mu nzubu ku bukole.