Read Tshiluba Dielulula 24 Bible Online

Dielulula 24 - Tshiluba bible

Dielulula 24

¹Pikala muntu musele mukaji, mukaji awu katshiyi umulengelela, mulume umudiwula bua bualu kampande, amufundile mukanda wa dishipa nawu dibaka,[158] amupewu, amuipate.

²Kadi pikala mulume mukuabu musele mukaji awu,

³mulume awu mumubenge kabidi, mumufundile mukanda mukuabu bua kushipa dibaka, mumupeshewu, mumuipate, nansha pikala mulume muibidi awu mufue,

⁴mulume wa kumpala kena mua kuangata kabidi mukaji awu to. Bualu mukaji awu kudi mulume ewu udi ne mikiya. Maweja-Nangila Mvidi Mukulu wenu, kena musue bua mulume awu amuangate tshiakabidi. Kanuena mua kunyanga ditunga didiye munupe, ne buenzayi bua mushindu ewu.

⁵Patshidi muntu uselelaku mukaji, kena mua kuya ku mvita. Kabena mua kumuenzeja mudimu mukuabu wa ditunga. Ashale anu ku nzubu kuende tshidimu tshijima bua kusankisha mukajende.

⁶Dibue didi muntu upela nadi biakudia, nansha mpelu wa dibue adi, kanuena mua kubikuata lukole to. Bualu nudi numupangisha mushindu wa kupetaye biakudia.

⁷Pikala muena Izrayele mukuate muanabu, mumulame bu mupika, nansha mumupane, mbimpe kushipa mukuatshianganyi awu. Ke munudi mua kujikija buenzayi munkatshi mua bena Izrayele nanku.[159]

⁸Nudimuke bua disama dia nsudi kadinukuatshi. Nukumbaje bionsu bindi mumane kuambila batuangaji ba bena Levi[160] bua kunumanyisha.

⁹Nuvuluke muvua Maweja-Nangila Mvidi Mukulu wenu, mumeneshe Miriyame disama dia nsudi, panuvua nufuma ku Ejipitu.[161]

¹⁰Nuenu basombeshe muanenu tshintu, kanubuedi mu nzubu muende bua kudiangatshila tshintu tshia tshieya to.

¹¹Nuimanyine amu pambelu, bua muanenu awu anutuadile tshintu tshia tshieya nkayende.

¹²Kadi pikala unudi basombeshe awu mupele, yeye munueyeke tshinkutu tshiende, numupingajiletshi dituku dionsu, butuku kabuyi buanji kuila.

¹³Bualu ke tshidiye udibuikila butuku. Nanku mupele awu, neanuele tuasakidila. Kabidi Maweja-Nangila Mvidi Mukulu wenu neajadike munudi nuenzelangana bimpe.[162]

¹⁴Pikala muena mudimu mupela nansha muena dikenga, nansha yeye muanenu nansha muenyi udi musombe mu tshimenga tshia mu ditunga dienu, kanumutatshishi to.

¹⁵Nufute difutu diende matuku onsu, diba kadiyi dianji kubuela to. Bualu mmupete, kabidi mmutekemene amu ku difutu adi. Nuenu kanuyi bamufute, yeye mudidile Maweja-Nangila, nenuikale bena tshibawu.[163]

¹⁶Kanuena mua kushipa batedi bua buenzayi bua bana babu. Kanuena mua kushipa bana bua buenzayi bua batedi babu. Nudi mua kushipa muntu anu bua buenzayi buende yeye nkayende.[164]

¹⁷Kanunyangi tshilumbu tshia muenyi nansha tshia muana nshiya, kanumukengeshi. Tshilamba tshia mukaji mukamba kanutshikuatshi lukole to.

¹⁸Nuvuluke munu vua bapika mu Ejipitu. Maweja-Nangila Mvidi Mukulu wenu kunupatulamu.[165] Ke pandi nnuambila ne: nukumbaje mikenji eyi.

¹⁹Panudi nunowa biakudia, kanuena mua kuangulula binuvua bapue muoyi to. Bishale bua bakaji bakamba, bana ba nshiya, ne benyi badi munkatshi muenu. Nanku Maweja-Nangila Mvidi Mukulu wenu, neanuele lupemba mu midimu yenu yonsu.

²⁰Panudi nupola tumuma tua olive, kanupinganyi tshiakabidi mu madimi enu bua kuangulula tumuma tunuvua bapue muoyi. Kadi tushale bua bakaji bakamba, bana ba nshiya, ne benyi badi munkatshi muenu.

²¹Panudi nupola tumuma tua mvinyo, kanupinganyi mu madimi enu, bua kuangulula tunuvua bapue muoyi to. Kadi tushale bua bakaji bakamba,[166] bana ba nshiya, ne benyi badi munkatshi muenu.

²²Nuvuluke munuvua bapika mu Ejipitu. Ke pandi nnuambila ne: nukumbaje mikenji eyi.