Read Tshiluba Dielulula 27 Bible Online

Dielulula 27 - Tshiluba bible

Dielulula 27

¹Moshe, pamue ne bakulu ba ditunga, kuya kudi bena Izrayele, kubambila ne: — Nukumbaje mikenji yonsu indi nnumanyisha lelu.

²Dituku dinuasabuka musulu wa Yardene, bua kubuela mu ditunga didi Maweja-Nangila Mvidi Mukulu wenu munupe, nuimanyike mabue manene, nualabe lupemba.

³Nanku panuafika mu ditunga adi didi ne biakudia bia bungi,[179] divua Maweja-Nangila Mvidi Mukulu wenu mulaye bankambua benu, nufunde mikenji yonsu indi unumanyishe eyi ku mabue awu, anu dituku adi.

⁴Eyowa, nuenu bamane kusabuka musulu wa Yardene, nuimanyike mabue andi nnuambila aa pa mukuna wa Ebale.[180] Nualabe lupemba.

⁵Pashishe nuashile Maweja-Nangila wenu tshilambuilu pa mukuna apu ne mabue majima kaayi masonga ne tshiamu to.

⁶Bua kuibaka[181] tshilambuilu atshi, mabue ikale anu kaayi masonga to. Pa tshilambuilu apu, nulambuilepu Maweja-Nangila milambu ya kuosha.

⁷Numulambule kabidi milambu ya bobumue, nuyidile muaba awu ne disanka kumpala kua Maweja-Nangila Mvidi Mukulu wenu.

⁸Mikenji ayi, nuyifunde yonsu bimpe ku mabue anuvua bimanyike bua bayibale kakuyi lutatu.[182]

⁹Pashishe Moshe, pamue ne batuangaji ba bena Levi,[183] kuya kudi bantu, kubambila ne: — Nuenu bena Izrayele, lekelayi mutoyi, telejayi. Biangatshile lelu, nuashadi tshisamba tshia Maweja-Nangila Mvidi Mukulu wenu.

¹⁰Numutumikile, nukumbaje meyi ende ne mikenji yende, bindi nnumanyisha lelu ebi.

¹¹Anu dituku adi, Moshe kuambila bena Izrayele ne:

¹²— Panuasabuka musulu wa Yardene: bena tshisamba tshia Shimeyone, tshia Levi, tshia Yuda, tshia Isakare, tshia Yozefe, ne tshia Binyamine, bimanyine pa mukuna wa Ngarizime,[184] bua kuela bena Izrayele lupemba.

¹³Kadi bena tshisamba tshia Rubene, tshia Ngade, tshia Ashere, tshia Zebulone, tshia Dane, ne tshia Naftali, bimanyine pa mukuna wa Ebale, bua kutshipa bantu.

¹⁴Nanku bena Levi, nebamanyishe bena Izrayele bonsu ne diyi dikole, mitshipu eyi ne:

¹⁵“Muntu yonsu udi wenza lupingu lua mvidie, nansha lua dibue, lua mutshi, nansha lua tshiamu, kutendelela mu musokoku,[185] mmuena diakabi. Bualu Maweja-Nangila Mvidi Mukulu wenu kena musue bintu bia mushindu ewu, bienza kudi bantu. Muntu ewu asangane muena tshibawu kuenza anyi?” Bena Izrayele nebandamune bonsu ne: “Enze!”

¹⁶“Muntu yonsu udi kayi unemeka tatuende[186] ne mamuende, asangane muena tshibawu kuenza anyi?” Bantu bonsu ne: “Enze!”

¹⁷“Muntu yonsu udi udiundisha lupangu luende,[187] utentamuna mikalu ne muena mutumba, asangane muena tshibawu kuenza anyi?” Bonsu ne: “Enze!”

¹⁸“Muntu yonsu udi uleja mpofu njila mubi,[188] asangane muena tshibawu kuenza anyi?” Bonsu ne: “Enze!”

¹⁹“Muntu yonsu udi unyangakaja tshilumbu tshia muana nshiya, tshia mukaji mukamba,[189] nansha tshia muenyi udi munkatshi muenu, asangane muena tshibawu kuenza anyi?” Bonsu ne: “Enze!”

²⁰“Muntu yonsu udi ubuelela mukaji kampande wa tatuende mu nzubu, ufuisha tatuende bundu,[190] asangane muena tshibawu kuenza anyi?” Bonsu ne: “Enze!”

²¹“Muntu yonsu udi ulala ne nyama,[191] asangane muena tshibawu kuenza anyi?” Bonsu ne: “Enze!”

²²“Muntu yonsu udi ubuelela muanabu wa bakaji wa tatuende, nansha wa mamuende, mu nzubu,[192] asangane muena tshibawu kuenza anyi?” Bonsu ne: “Enze!”

²³“Muntu yonsu udi ubuelela mamuenende mu nzubu,[193] asangane muena tshibawu kuenza anyi?” Bonsu ne: “Enze!”

²⁴“Muntu yonsu udi ushipangana mu musokoku, asangane muena tshibawu kuenza anyi?” Bonsu ne: “Enze!”

²⁵“Muntu yonsu udi wangata makuta a mabuejila bua kushipa muntu udi kayi ne bualu, asangane muena tshibawu kuenza anyi?” Bonsu ne: “Enze!”

²⁶“Muntu yonsu udi kayi witaba meyi ne mikenji bia Mvidi Mukulu, kayi ubikumbaja,[194] asangane muena tshibawu kuenza anyi?” Bonsu ne: “Enze!”