Read Tshiluba Dielulula 30 Bible Online

Dielulula 30 - Tshiluba bible

Dielulula 30

¹Malu onsu andi munufundile, diakalenga nansha diakabi,[210] neakumbane. Pikala Maweja-Nangila Mvidi Mukulu wetu munutangalaje munkatshi mua bisamba bia bantu benyi, nenushishe kudikonka pa malu aa.

²Nuenu ne ndelanganyi yenu, nenupingane kabidi kudi Maweja-Nangila, bua kukumbaja meyi ende ne mikenji yende, bindi nnumanyisha lelu ebi. Nenubitumikile ne muoyi mujima, ne bukole buenu bonsu.

³Maweja-Nangila Mvidi Mukulu wenu neandamune malu enu.[211] Neamuenzele bimpe, neanumushe mu matunga onsu avuaye munutangalaje. Neanupingaje mu ditunga dienu.

⁴Nansha nuenu bikale diba adi mu bupika ku ndekelu kua buloba, neanukebeku. Neanusangishe,

⁵bua kunupingaja mu ditunga dia bankambua benu. Nenusombemu. Maweja-Nangila neanuenzele bimpe bipite bivuaye muenzele bankambua benu. Nenubapite ku bungi.

⁶Maweja-Nangila Mvidi Mukulu wenu nkayende nealengeje mioyi yenu, ne ya ndelanganyi yenu, bua numunange ne muoyi mujima, ne bukole buenu buonsu, bua nuenu kushala ne muoyi.

⁷Nanku makenga onsu amvua munumanyishe, Maweja-Nangila neaatumine anu baluishi benu ne bantu badi banukina.

⁸Kadi nuenu nenumutumikile tshiakabidi, nukumbaje mikenji yende yonsu indi nnumanyisha lelu eyi mu dina diende.

⁹Maweja-Nangila Mvidi Mukulu wenu neatungunuke midimu yenu; ne anupe bana bavule. Nyama yenu neivulangane, biakudia bitshiompoka. Bualu bivua Maweja-Nangila muenzele bankambua benu, neanuenzelebi nuenu.

¹⁰Bionsu ebi nebinuenzekele panudi nuitaba Maweja-Nangila, nukumbaja mikenji yende, idi mu mukanda ewu, nupingana kudiye muenu muonsu, kabidi ne muoyi mujima.

¹¹Mikenji indi nnumanyisha lelu eyi, kayena minupite lungenyi, kayena kule.

¹²Kayena mu diulu,[212] bua nuambe ne: “Muntu wabanda mu diulu, bua kutuangatshilayi bua tuetu kuyimanya, kuyikumbaja nnganyi?”

¹³Mikenji eyi kayena dishiya dia Mayi manene, bua nuenu kuamba ne: “Muntu wasabuka mayi bua kutuangatshilayi bua tuetu kuyimanya, kuyikumbaja nnganyi?”

¹⁴Kayena kule nansha kakese. Mikenji ya Mvidi Mukulu idi pabuipi nenu, idi mukana muenu, ne munda muenu. Nudi mua kuyikumbaja.

¹⁵Bena Izrayele, tangilayi: lelu ndi nteka kumpala kuenu, luseke elu muoyi ne diakalenga, luseke lualua lufu ne diakabi.

¹⁶Nudimuke, nukumbaje mikenji indi nnuambila lelu eyi: nunange[213] Maweja-Nangila Mvidi Mukulu wenu, nulonde njila idiye unuleja, nutumikile meyi ende ne mikenji yende. Nanku nenushale ne muoyi; nenuvulangane. Maweja-Nangila neanuenzele bimpe mu ditunga dinuakuata.

¹⁷Kadi panuabenga kutumikila Maweja-Nangila, panuikala basue kutendelela mvidie, kuyenzela mudimu,

¹⁸nenubutuke bonsu. Ndi ndianza kunuambila lelu ne: nuenu benze nanku, panuafika dishiya dia musulu wa Yardene, kanuakushala ne muoyi matuku a bungi mu ditunga dinuakuata adi to.

¹⁹Nanku ndi nnujadikila lelu kumpala kua diulu ne buloba ne: nusungule tshinudi basue: ndi nteka muoyi ne diakalenga luseke, lufu ne diakabi lukuabu. Mbimpe nusungule muoyi, bua nushale bena diakalenga, nuenu ne ndelanganyi yenu.

²⁰Nangayi Maweja-Nangila Mvidi Mukulu wenu, numutumikile, numuitabe ne muoyi umue. Nanku nenushale ne muoyi bidimu bia bungi mu ditunga di-vuaye mulaye bankambua benu, Abrahame, Izake ne Yakobe.[214]