Read Tshiluba Dielulula 33 Bible Online

Dielulula 33 - Tshiluba bible

Dielulula 33

¹Moshe, muntu wa Mvidi Mukulu kayi muanji kufua, kuelaye bisamba dikumi ne bibidi bia Izrayele lupemba, wamba ne:

²Maweja-Nangila mmufume ku mukuna wa Sinayi, mmujuke mu ditunga dia Seyire, bu diba, mmubande pa mukuna wa Parane, bua kuleja bantu butumbi buende. Batumibue binunu badi benda nende. Mmufike kudi bena diende, mukuate ku bianza mikenji idi ikenka bu kapia.[239]

³Maweja-Nangila mmunange bisamba bia bena Izrayele. Udi ukuba bonsu badi bamuitaba, bimane ku makasa ende bua kumvua mibelu yende.

⁴Mikenji idi Moshe mutupe, ke tshiuma tshia ndelanganyi ya Yakobe.

⁵Pavua bamfumu ba bena Izrayele badisangishe, pamue ne bisamba biabu bionsu, kumanyabu ne: Maweja-Nangila ke mukalenga wa bena Yeshurune.[240]

⁶Moshe kubela lupemba wamba ne: “Tshisamba tshia bena Rubene tshishale ne muoyi! Nansha tshiotshi ne bantu bakese, katshijiminyi kashidi tshiendelele.”

⁷Moshe kuela ndelanganyi ya bena Yuda lupemba, wamba ne: “Maweja-Nangila, bena Yuda badi bakubikila, ubateleje! Ubambuluishe, bua bumvuangane ne bana babu! Bavua badiluila mvita ne bukitu. Ubakuatshishe, batshimune baluishi babu.”

⁸Moshe kuela ndelanganyi ya bena Levi lupemba, wamba ne: “Maweja-Nangila, udi mupeshe batuangaji, ndelanganyi ya Levi, Urime ne Tumime, bintu bia tshijila, bualu badi bakuitaba muabu muonsu. Uvua mubatete ku Masa, mubabingishe ku mayi a Meriba.[241]

⁹Bena levi mbakunange wewe Maweja-Nangila, bipite mudibu bananga baledi babu, bena meku abu, nansha bana babu badibu balele. Ke muvuabu bakumbaje mikenji yebe, banemeke nanku ndondu webe.[242]

¹⁰Bena Levi badi balongesha bena Izrayele mikenji yebe. Badi balambula pa tshilambuilu tshiebe milambu ya manananshi, ne ya kuosha.[243]

¹¹Maweja-Nangila, upeshe bena Levi bukole, ubele lupemba mu midimu yabu yonsu. Babutule baluishi babu bonsu nkong, bapanga bukole kashidi.”

¹²Moshe kuela ndelanganyi ya Binyamine lupemba, wamba ne: “Binyamine ntshisamba tshidi Maweja-Nangila mupite kunanga. Badi basomba talala pabuipi ne Mvidi Mukulu wabu. Maweja-Nangila udi ubalama matuku onsu, usomba munkatshi muabu.[244]”

¹³Moshe kuela ndelanganyi ya Yozefe lupemba, wamba ne: “Maweja-Nangila mmuele ditunga dia Yozefe lupemba. Buloba buabu budi bupeta tshitalela tshia mu diulu, bupeta kabidi mayi adi afuma muinshi mua buloba.

¹⁴Munya udi umenesha biakudia pa madimi abu. Badi banowa bipiabipia ku ngondu ku ngondu.

¹⁵Ditunga diabu didi ne mikuna minene ne mikese, idi ipatula biakudia, ku kale ne ku lelu.

¹⁶Bubanji buonsu bua mu ditunga dimpe edi, diakalenga dia Mvidi Mukulu udi mu tshipuka, bipueke pa tshisamba tshia Yozefe, udi Mvidi Mukulu musungule mfumu wa bana babu.[245]

¹⁷Yozefe apete lumu! Udi mukole bu ngombe mulume, udi ne nsengu ibidi bu ya nyama wa mbowa, ya kutshimuna nayi bisamba bikuabu, kubipata too ne ku ndekelu wa buloba. Lusengu lumue ke bantu binunu ne binunu ba bena Efrayime, lukuabu ke bantu nkama ne nkama ba bena Menashe.”

¹⁸Moshe kuela ndelanganyi ya Zebulone ne Isakare lupemba, wamba ne: “Bena Zebulone, bangenda-mushinga, basanke mu ngendu yabu! Bena Isakare, basombe talala mu ntenta yabu!

¹⁹Nubikile bena mutumba nenu pa mukuna wa tshijila, bua kulambulamu milambu bu mudi mikenji yamba. Bubanji buenu mbufume mu Mayi manene, ne mu biuma bisokome mu lusenga.[246]”

²⁰Moshe kuela ndelanganyi ya Ngade lupemba, wamba ne: “Maweja-Nangila atumbe! Ke Yeye udi mupeshe bena Ngade ditunga dinene! Bena Ngade mbalale bu nyama wa ntambue, ukeba mua kukuata nyama, kumudia mujima, ne maboku ne mutu!

²¹Ngade mmudisunguile mu ditunga, maloba mimpe makumbanyine bukalenga. Udi mudisangishe ne bamfumu ba bisamba, bua kukumbaja bidi Maweja-Nangila musue, bua kukuatshila bena Izrayele bakuabu mudimu mu dina diende.[247]”

²²Moshe kuela Dane lupemba, wamba ne: “Dane udi utupika bu muana wa ntambue, ufuma ku mikuna ya mu Bashane.[248]”

²³Moshe kuela ndelanganyi ya Naftali lupemba, wamba ne: “Maweja-Nangila mmuele Naftali lupemba, mumusankishe ne bintu bivule. Ditunga diende nedialabale, diye kuinshi muditunga,[249] diye kabidi luseke ludi diba dibuelela!”

²⁴Moshe kuela ndelanganyi ya Ashere lupemba, wamba ne: “Bena Ashere mbena diakalenga munkatshi mua bana ba Yakobe. Bana babu bonsu nebabanange. Mitshi yabu neyipatule mafuta a bungi. Neboweshe makasa abu mu mafuta.

²⁵Tshiibi tshia mu tshimenga tshia bena Ashere, nebatshikange ne milonda ya tshiamu tshikunze. Bena Ashere badi basombamu bimpe, ne bukole[250]matuku onsu atshidibu ne muoyi panu.”

²⁶Pashishe Moshe kuamba ne: “Nuenu bena Yeshurune,[251] numanye ne: kakuena mvidie udi ufuana Mvidi Mukulu wenu. Udi upitshila mu diulu, upueka, wenda pa mavuba, anu bua kuvua kunuambuluisha.

²⁷Matuku onsu Maweja-Nangila udi unulama, udi ne bukole bunene pa buloba bujima,[252] uvua nabu kale, udi nabu lelu. Udi unuipatshila baluishi benu, nuenu batangile, unuamba bua kubabutula.

²⁸“Bena Izrayele badi basomba talala. Ndelanganyi ya Yakobe mmisombe bimpe, mu ditunga didi ne ntete ya kuenza bukula, kabidi ne mitshi ya maluvu a mvinyo. Bualu badi bapeta tshitalela tshifuma mu diulu.

²⁹“Nuenu bena Izrayele, nudi bena diakalenga, bualu Maweja-Nangila mmunupandishe amu nuenu nkayenu! Maweja-Nangila udi ngabu wenu, unulama. Udi muele wa mvita, unuambuluisha bua kutshimuna. Baluishi benu nebanulombe luse, nenudiate ditambisha diabu mu makasa.”