Read Tshiluba Dielulula 7 Bible Online

Dielulula 7 - Tshiluba bible

Dielulula 7

¹Maweja-Nangila Mvidi Mukulu wenu, neanufikishe mu ditunga dinudi ne bua kukuata. Neanuipatshile bisamba ebi muanda mutekete: bena Iti, bena Ngirgashi, bena Amore, bena Kenaane, bena Perizi, bena Ivi ne bena Yebusa,[55] bidi binupita bungi ne bukole.

²Neabafile kunudi, bua mbatshimune bonsu, nubabutule. Kanuena mua kutua nabu ndondu, kanuena mua kubafuila luse.

³Kanusedianganyi nabu. Kanuseleshi bana benu ba bakaji kudi bana babu ba balume. Bana benu ba balume kabasedi bana babu ba bakaji.

⁴Bualu bantu ba bisamba bikuabu aba, badi mua kutombola ndelanganyi yenu, bua nubenge Maweja-Nangila, nutendelele mvidie mikuabu. Diba adi, Maweja-Nangila neanufuile munda, anubutule musangu umue.

⁵Nanku nunyangakaje bilambuilu biabu, nupule tshibumba tshia mabue tshidibu benze, nupule makunji a kutendelela mvidie adibu base, nuoshe kabidi ne mpingu yabu.[56]

⁶Nuenu bena Izrayele nudi tshisamba tshijidila Maweja-Nangila Mvidi Mukulu wenu. Nuenu ke badi Maweja-Nangila musungule, bua nuikale tshisamba tshiende tshisunguluke[57] munkatshi mua bisamba bikuabu bionsu bia pa buloba.

⁷Maweja-Nangila mmununange, munusungule, ki mbua ne: nudi nupita bisamba bionsu ku bungi to. Nudi bakese, bashadile kudi bisamba bikuabu.

⁸Kadi Maweja-Nangila mmununange. Mmunukumbajile bionsu bivuaye mulaye bankambua benu. Ke padiye munupatule ku bupika, mununyenge ku bianza bia mukalenga wa bena Ejipitu anu ku bukole buende.

⁹Nuenu bena Izrayele, numanye ne: Maweja-Nangila Mvidi Mukulu wenu nkayende ke Mvidi Mukulu wa bushiwa. Yeye udi ulama ndondu wende too ne ku ndelanganyi tshinunu. Udi unanga amu kunanga bantu bonsu badi bamunanga, bamutumikila.[58]

¹⁰Kadi badi bamubenga, udi ubanyoka lukasa, ubabutula.[59]

¹¹Nanku, meyi ne mikenji bindi nnuambila lelu, nubilame bimpe, nubikumbaje.

¹²Nuenu bateleje mikenji eyi, bayikumbaje, Maweja-Nangila Mvidi Mukulu wenu, nealame ndondu uvuaye mutue ne bankambua benu, bua nuenu kuikala bena diakalenga.

¹³Nanku panuafika mu ditunga didi Maweja-Nangila munupe, divuaye mulaye bankambua benu, bu mudiye mununange, Yeye neanusankishe. Nenulele bana ba bungi. Nenuikale ne bintu bipite bungi: ntete ya kuenza bukula, mvinyo, mafuta, ngombe, mikoku ne mbuji.

¹⁴Maweja-Nangila neanuambuluishe, nupangane, nupite bisamba bionsu ku bubanji. Nanku muntu yonsu wa kunudi, mulume nansha mukaji, kakuikala nkumba, too ne ku bimuna bienu.

¹⁵Maweja-Nangila neanuepule ku masama onsu, ne ku bipupu bikole bionsu, bivua bikuata bena Ejipitu, munudi bamanye. Bipupu abi, nebikuate anu bantu badi banukina.

¹⁶Nanku nenubutule bantu bonsu bikala Maweja-Nangila Mvidi Mukulu wenu munupeshe. Kanubafuidi luse to. Kanutendeledi mvidie[60] yabu, bualu mbuteyi budi mua kunufikisha ku lulu.

¹⁷Misangu mikuabu nudi nuela meji ne: “Bisamba abi mbitupite bukole! Katuena ne mushindu wa kubinyenga bidibu nabi to!”

¹⁸Kanubitshinyi! Nuvuluke muvua Maweja-Nangila Mvidi Mukulu wenu muenze ne mukalenga wa bena Ejipitu, ne bantu bende bonsu.

¹⁹Nuvua badimuene muvua Maweja-Nangila mukengeshe bena Ejipitu, nuwuaye muenze malu a kukema, muleje bukole buende bua kunupatula mu ditunga adi. Numanye ne: Maweja-Nangila Mvidi Mukulu wenu, neakengeshe bisamba bionsu binudi nutshina ebi anu mushindu awu.

²⁰Nanku bantu bonsu nebikale banunyema, baye kusokoma. Maweja-Nangila neabatumine mangulungu bua kubabutula.[61]

²¹Kanutshinyi bisamba ebi to. Maweja-Nangila Mvidi Mukulu wenu udi nenu. Kakuena muntu udi mua kuambangana nende to.

²²Panuasemena pabuipi, yeye neipate bantu aba ku kakese ku kakese. Bualu nuenu babutule bonsu musangu umue, nyama ya tshisuku neyivulangane bua kunuluisha.

²³Maweja-Nangila Mvidi Mukulu wenu neanuambuluishe bua nutekeshe bisamba ebi. Nebikale ne bowa bunene, babutuke.

²⁴Maweja-Nangila neafile bakalenga babu kunudi. Nenubabutule bonsu, kabayi babavuluke kabidi pa buloba. Muntu nansha umue kakunutuila nkanana. Nebabutuke bonsu.

²⁵Nuoshe mpingu ya mvidie yabu yonsu. Kanualakanyi biamu bia mpawungi ne biamu bitoke bia mushinga mukole bidibu balamike ku mpingu aku to. Kamuangatshi to. Bualu Maweja-Nangila udi ukina bintu ebi. Bidi mua kunukebela diakabi.

²⁶Kanuteki lupingu nansha lumue luleja mvidie wa mushindu ewu mu nzubu yenu. Nuenu benze nanku, nebanubutule musangu umue ne mpingu ayi. Mpingu ya mushindu ewu idi ne bua kubutuka yonsu. Nuyibenge, nuyimanshe.