Read Tshiluba Dielulula 8 Bible Online

Dielulula 8 - Tshiluba bible

Dielulula 8

¹Nuenu batumikile mikenji indi nnuambila lelu eyi, neyinuambuluishe bua kusomba bimpe. Nemwulangane. Nenukuate ditunga, divua Maweja-Nangila mulaye bankambua benu.

²Nuvuluke luendu lule luvua Maweja-Nangila Mvidi Mukulu munuendeshe mu tshipela bidimu makumi anayi. Uvua munukengeshe bua kunuteta, bua ajadike meji adi munda muenu, ne mushindu unudi basue kukumbaja mikenji yende.

³Yeye mumane kunukengesha ne nzala, kumupeshaye mana, biakudia binuvua kanuyi banji kumanya, nansha nuenu nansha bankambua benu. Bionsu ebi, anu bua kunulongesha ne: muntu kena ne muoyi anu bua biakudia nkayabi to, kadi bua meyi onsu adi apatuka[62] mukana mua Mvidi Mukulu.

⁴Bidimu ebi makumi anayi, bilamba bienu kabiena bisunsuke, makasa enu kaena muwule to.

⁵Numanye ne: Maweja-Nangila Mvidi Mukulu wenu, mmusue kunulongesha, bu mudi tatu ulongesha muanende.

⁶Nutumikile mikenji ya Maweja-Nangila Mvidi Mukulu wenu, numunemeke, nuenze mudiye musue.

⁷Maweja-Nangila Mvidi Mukulu wenu, neanufikishe mu ditunga dimpe, didi ne tshitalela tshia mayi a misulu ne a mpokolu mivule, adi apatuka mu tshibandabanda, nansha mu mukuna.

⁸Mu ditunga adi, mudi biakudia bia bungi: ntete mishilangane ya kuenza bukula, mitshi ya mfiku, maluvu a mvinyo, mitshi ya grenade, mafuta a olive ne buitshi.

⁹Nanku nenuikale ne mampa mapite bungi. Kanuakukengelamu tshintu to. Badi bumbulamu tshiamu tshifike mu mbuebue, tshiamu tshia kabanda mu mikuna.

¹⁰Nenudie nukute. Nenuele Maweja-Nangila Mvidi Mukulu wenu tuasakidila, bua padiye munufikishe mu ditunga edi dimpe.

¹¹Nuvuluke Maweja-Nangila Mvidi Mukulu wenu, nukumbaje meyi ne mikenji biende, bindi nnuambila lelu ebi.

¹²Nanku panuikala ne biakudia bia bungi, nusomba mu nzubu mimpe,

¹³nupeta bintu bia bungi: ngombe, mikoku, mbuji, biamu bitoke bia mushinga mukole, ne bia mpawungi, ne bintu bikuabu bia mishindu yonsu,

¹⁴kanuditambishi to. Nuvuluke Maweja-Nangila Mvidi Mukulu wenu, uvua munupatule ku bupika mu Ejipitu.

¹⁵Kunupitshishaye mu tshipela tshinene tshidi tshikuata bowa, tshiena ne nyoka ya lulengu,[63] ne tuminyiminyi, kamuyi mayi. Kunupatuilaye mayi mu lubuebue luvua lupite bukole.

¹⁶Amu mu tshipela amu, Maweja-Nangila kunupa mana, biakudia bivua bankambua benu kabayi banji kumanya. Uvua munukengeshe, kadi amu bua kunuteta, kabidi bua kunulongoluela diakalenga[64] matuku adi kumpala.

¹⁷Kadi kanuedi meji ne: nudi badipetele diakalenga ku bukole buenu nkayenu to.

¹⁸Numanye ne: Maweja-Nangila Mvidi Mukulu wenu ke udi unuambuluisha, bua nupete diakalenga. Udi wenza nanku, bualu too ne lelu utshidi ulama ndondu wende, uvua-ye mutue ne bankambua benu.

¹⁹Nanku ndi nnuvuluija lelu ne: panudi nutendelela mvidie mikuabu, nuyenzela mudimu, kanuyi nuvuluka Maweja-Nangila, nenubutuke bonsu.

²⁰Eyowa, panudi kanuyi nutumikila Maweja-Nangila Mvidi Mukulu wenu, neanubutule mushindu wabutulaye bisamba bidi pabuipi nenu.