Read Tshiluba Yowanane 12 Bible Online

Yowanane 12 - Tshiluba bible

Yowanane 12

¹Matuku asambombu kumpala kua tshibilu tshia Dipita dia Maweja-Nangila, Yezu kuya ku Betanya[125] kuvua Lazare, uvuabu babishe ku lufu awu, musombe.

²Muaba awu, Marte uvua mumulambile biakudia. Lazare uvua umue wa ku bantu bavua ku mesa ne Yezu.

³Mariya kuangata tshia bibidi tshia litre wa manananshi a mushinga mukole, avuabu kabayi basambakaja ne tshintu tshikuabu to. Kuelaye Yezu ku makasa. Pashishe kuakupulaye ne nsuki yende.[126] Nzubu mujima kuwula ne mupuya wa manananshi.

⁴Umue wa ku balongi ba Yezu, diende Yudase Iskariyote — ke uvua ne bua kumuelela tshitungu, — kuambaye ne:

⁵— Kabavua mua kupana manananshi aa ku mushinga wa nkanu mitoke ya mushinga mukole nkama isatu, bua kuyipesha bapele bua tshinyi?[127]

⁶Yudase kavua wamba nanku bualu uvua usumpakena bapele to. Kadi uvua muivi. Uvua mulami wa tshibutshilu, wiba bivuabu batekamu.

⁷Kadi Yezu kuamba ne: — Mulekelayi! Enze tshidibu ne bua kuenza dituku dia kunjikabu.

⁸Nenuikale ne bapele matuku onsu pamue nenu,[128] kadi meme kanuakuikala nanyi matuku onsu.

⁹Bena Yuda bavule kumvua lumu ne: Yezu udi ku Betanya. Kuyabu muaba awu, kabayi baya amu bualu bua Yezu nkayende to, kadi kabidi bua kumona Lazare uvua Yezu mubishe ku lufu.

¹⁰Ke bamfumu ba batuangaji kumyuangana bua kushipesha Lazare kabidi.

¹¹Bualu bena Yuda ba bungi bavua bumuke kudibu bualu buende, bitabe Yezu.

¹²Butshia, bantu bavule bavua bavuile tshibilu tshia Dipita dia Maweja-Nangila, kumvuabu ne: Yezu mmufike ku Yerushalayime.

¹³Kuangatabu malala a mabue, kuyabu kumuakidila, bela mbila ne: — Tutumbishayi Mvidi Mukulu! Mvidi Mukulu ele muntu udi ulua mu dina dia Maweja-Nangila lupemba! Mvidi Mukulu ele mukalenga wa Izrayele lupemba![129]

¹⁴Yezu kusangana muana wa nyama wa mpunde, kubandapu! Mudibu bafunde mu Mukanda wa tshijila ne:

¹⁵“Bena Siyone, kanutshinyi! Tangilayi, ke mukalenga wenu udi ufika! Mmusombe pa muana wa nyama wa mpunde.[130]”

¹⁶Balongi bende kabavua banji kujingulula bionsu abi to. Kadi Yezu mumane kupeta butumbi buende, ke kushishabu kuvuluka ne: mu Mukanda wa tshijila mbamane kufunda malu aa bualu buende. Nanku malu aa nunemeke umvua mukanda muambe bualu buende.

¹⁷Bantu bonsu bavua ne Yezu pavuaye mubishe Lazare ku lufu, mumupatule mu lukita bavua balonda bivuabu bamone.

¹⁸Ke pavua bantu ba bungi balue kuakidila Yezu. Bualu bavua bamane kumvua muvuaye muenze bualu ebu bua dikema.

¹⁹Ke Baparushe kuambilangana ne: — Nudi numona ne: kanuakupeta tshipeta tshimpe to. Bantu bonsu bakadi bamulonda!

²⁰Bamue bena Ngreke[131] bavua munkatshi mua bantu bavua baye kutendelela ku Yerushalayime mu tshibilu.

²¹Kuyabu kudi Filipe (uvua wa mu Betsayida mu Ngalileya), bamuambila ne: — Mukalenga, tudi basue kumona Yezu.

²²Filipe kuya kuambila Andre, pashishe bonsu babidi kuya kuambila Yezu.

²³Yezu kubandamuna ne: — Diba ndimane kukumbana mpindiewu didi bantu ne bua kutumbisha Muana wa muntu.

²⁴Ndi nnujadikila bulelela ne: lutete kaluyi lumata mu buloba, lufila, ludi lushala nkayalu. Kadi lolu lutue, ludi lumenesha ntete ya bungi.

²⁵Muntu udi unanga muoyi wende neaujimije. Kadi muntu udi kayi unanga amu muoyi wende, neaulame too ne ku muoyi wa tshiendelele.[132]

²⁶Pikala muntu musue kungenzela mudimu, udi ne bua kundonda. Nanku muena mudimu wanyi neikale kabidi muaba undi. Tatu wanyi udi utumbisha muntu udi ungenzela mudimu.

²⁷— Mpindiewu muoyi udi undubakana. Nengambe tshinyi? Nengambe ne: Tatu unsungidile ku bidi ne bua kuenzeka diba edi anyi? Kadi tshindi mufikile panu tshidi nangananga bua kupitshila mu diba edi dia makenga.

²⁸Tatu, tumbisha dina diebe! Kumvuabu diyi difumina mu diulu ne: — Ndi mumane kuditumbisha, nenditambishe tshiakabidi.

²⁹Bantu bavule bavua muaba awu bumvua diyi adi, kuambabu ne: — Ndikubakuba dia mvula! Bakuabu bavua bamba ne: — Mutumibue wa Mvidi Mukulu uvua uyukila nende!

³⁰Kadi Yezu kubambila ne: — Diyi edi kadiena diamba nanku bualu buanyi to, kadi bualu buenu.

³¹Mpindiewu ke diba dialumbuluishabu bantu. Mpindiewu nebipate mfumu wa panuapa.

³²Kadi meme, pangelabu kulu, nenkoke bantu bonsu kundi.[133]

³³(Yezu uvua muambe nanku, bualu uvua musue kuleja bantu lufu luvuaye ne bua kufua.)

³⁴Bantu bavule kumuandamuna ne: — Tudi balonge mu Mikanda ya mikenji yetu ne: Meshiya neashale ne muoyi tshiendelele.[134] Nanku muudi mua kuamba ne: Muana wa muntu nebamuele kulu mbishi? Awu Muana wa muntu nnganyi?

³⁵Yezu kubandamuna ne: — Butoke butshidi munkatshi muenu, kadi mbua katupa kipi. Endayi panutshidi ne butoke, bua miidima kuyinujikididi. Bualu muntu udi wenda mu miidima kena mumanye kudiye uya.

³⁶Itabayi butoke panutshidi nabu, bua nuikale bana ba butoke. Yezu mumane kuamba nanku: kumukaye, kuyaye kubasokoma.

³⁷Nansha muvuaye muenze bishima bia bungi bobu batangila, kabavua bamuitaba to.

³⁸Ke muvua miaku ya muambi Yeshaya ikumbana ne: “Maweja-Nangila, udi muitabe bituvua bambe nnganyi? Uvua Maweja-Nangila muleje bivuaye musue kuenza nnganyi.[135]”

³⁹Kabavua mua kuitaba to, bualu Yeshaya uvua muambe kabidi ne:

⁴⁰“Mvidi Mukulu uvua mubafofamije mesu, mututubije lungenyi luabu, bua mesu abu kaamonyi, lungenyi luabu kalujinguludi bualu, bua kabapinganyi kundi, bua meme kubasungidila.[136]”

⁴¹Yeshaya mmuambe nanku bualu uvua mumone butumbi bua Yezu, muambe kabidi bualu buende.

⁴²Kadi nansha munkatshi mua bamfumu ba bena Yuda, ba bungi kuitaba Yezu. Kadi kabavua badileja patoke. Bualu bavua batshina Baparushe bavua mua kubipata mu nzubu wa kutendelela.[137]

⁴³Bavua basue nangananga bua bantu babanyishe, pa mutu pa kukeba bua Mvidi Mukulu abanyishe.

⁴⁴Yezu kuela diyi dikole ne: — Muntu udi ungitaba, kena ungitaba nkayanyi, kadi udi witaba kabidi uvua muntume.

⁴⁵Muntu udi ummona, udi umona kabidi uvua muntume.

⁴⁶Meme ndi mufike pa buloba bu butoke, bua muntu yonsu udi ungitaba kashadi mu miidima.

⁴⁷Padi muntu umvua miaku yanyi, kayi uyikumbaja, meme tshiena mua kumupisha ku tshilumbu to. Bualu meme ndi mufike bua kusungidila bantu. Tshiena muvue kubapisha to.

⁴⁸Muntu udi umbenga, kayi wanyisha miaku yanyi, udi ne mumuluishi: muaku undi mulongeshe neumupishe dituku dia nshikidilu.

⁴⁹Bualu tshiena muakule ku bumfumu buanyi nkayanyi to, kadi Tatu uvua muntume ke uvua mumfundile tshimvua ne bua kuamba, nansha kulongesha.

⁵⁰Ndi mumanye ne: tshidi Mvidi Mukulu ufundila muntu tshidi tshipetesha muoyi wa kashidi. Nanku tshindi ngamba, ndi ntshiamba muvua Tatu wanyi mungambile.