Read Tshiluba Yowanane 13 Bible Online

Yowanane 13 - Tshiluba bible

Yowanane 13

¹Dituku dimue kumpala kua tshibilu tshia Dipita dia Maweja-Nangila, Yezu mumanye muvua diba dimane kufika dia kumuka panu bua kupingana kua Tatu, bu muvuaye munange bantu bende ba pa buloba matuku onsu, kubanangaye too ne ku ndekelu.

²Yezu ne balongi bende bavua mu didia dia dilolu. Diabolu ukavua mumane kuitabijija Yudase muana wa Simone Iskariyote, bua elele Yezu tshitungu.[138]

³Yezu uvua mumanye muvuaye mutumine kudi Mvidi Mukulu, kabidi muvuaye ne bua kupingana kudi Mvidi Mukulu. Uvua mumanye kabidi nunua Mvidi Mukulu muteke bionsu ku bumfumu buende.

⁴Kujukaye ku mesa, kukulaye tshilamba tshivuaye mutenteke pa mutu; kuangataye tshilamba tshikuabu kudijingila mu tshimonu.

⁵Pashishe kuelaye mayi mu dilongu, kubanga kuowesha balongi bende mayi ku makasa, wakupula ne tshilamba tshivuaye mudijingile mu tshimonu.

⁶Yezu ufika kudi Simone Petro, awu kumukonka ne: — Mfumu, udi ukeba kungowesha mayi ku makasa anyi?

⁷Yezu kumuandamuna ne: — Tshindi ngenza etshi, kuena mutshimanye mpindiewu to. Kadi neutshijingulule pashishe.

⁸Petro kumuamba ne: — To, katshia kuena mua kungowesha mayi ku makasa nansha! Yezu kumuandamuna ne: — Meme tshiyi mukuoweshe mayi ku makasa, kuena mua kupeta kabidi tshintu nansha tshimue kundi.

⁹Simone Petro kumuandamuna ne: — Nanku, Mfumu, kungoweshi anu ku makasa nkayaku to! Ungoweshe kabidi ku bianza ne ku mutu!

¹⁰Yezu kumuamba ne: — Muntu mumane kuowa mayi mubidi mujima, kena ukengela kuowa tshiakabidi. Udi ne bua kuowa amu ku makasa, bualu kena ne manyanu nansha makese pambidi. Nuenu kabidi kanuena ne manyanu, kadi ki nnuenu bonsu to.[139]

¹¹(Yezu uvua mumane kumanya muntu uvua ne bua kumuelela tshitungu. Ke pavuaye wamba ne: “Kanuena bonsu badi kabayi ne manyanu.”)

¹²Yezu mumane kubowesha mayi ku makasa, kuvualaye bilamba biende tshiakabidi, kupinganaye ku mesa. Kubakonkaye ne: — Nudi bajingulule tshindi munuenzele anyi?

¹³Nudi numbikila “Mulongeshi,” kabidi “Mfumu.” Nudi nuamba bimpe. Ke mundi.

¹⁴Pangikala meme Mulongeshi kabidi Mfumu munoweshe mayi ku makasa, nuenu kabidi nudi ne bua kuoweshangana mayi ku makasa.

¹⁵Ndi munuleje tshilejilu bua nuenze mundi munuenzele.

¹⁶Ndi nnujadikila ne: muena mudimu kena mua kuikala ku mutu kua mfumuende. Kabidi mutumibue kena mua kuikala ku mutu kua uvua mumutume nansha.[140]

¹⁷Mpindiewu nudi bamanye bualu ebu. Nuenu benze nanku, nenuikale ne disanka.

¹⁸Tshiena ngamba buenu bonsu to. Ndi mumanye bandi musungule. Kadi mbimpe ikumbane miaku ivuabu bafunde mu Mukanda wa tshijila ne: “Muntu utuvua tudia nende diampa, ukadi unduisha.[141]”

¹⁹Ndi udianjila kunuambila bualu ebu mpindiewu kabuyi buanji kuenzeka, bua penzekabu nuitabe ne: “Meme ndi mundi.”

²⁰Ndi nnujadikila ne: muntu wakidila muntu undi ntuma, udi ungakidila meme. Muntu udi ungakidila udi wakidila uvua muntume.

²¹Yezu mumane kuamba nanku, kulubakanaye bikole. Kuambilaye balongi bende ne: — Ndi nnujadikila ne: umue wa kunudi neantungile tshitungu.

²²Balongi kutangilangana, kabayi mua kumanya uvuaye wamba.

²³Umue wa ku balongi, mulongi uvua Yezu munange, uvua musombe ku luseke lua Yezu.

²⁴Simone Petro kumulomba ne tshianza bua ebeje Yezu ne: udiye wamba nnganyi?

²⁵Mulongi awu kueyemena Yezu, kumukonka ne: — Mfumu, nnganyi mene awu?

²⁶Yezu kuandamuna ne: — Nenzabike tshipese tshia diampa mu nsupu. Muntu ungatshipesha awu nyeye. Yezu kuangata tshipese tshia diampa, kutshizabikaye mu nsupu, kutshipesha Yudase muana wa Simone Iskariyote.

²⁷Diakamue Yudase mumane kuangata tshipese tshia diampa, diabolu kubuela munda muende. Ke Yezu kuambila Yudase ne: — Tshiudi musue kuenza, utshienze lukasa!

²⁸(Ku bonsu bavua ku mesa, muntu nansha umue kavua mujingulule tshivua Yezu muambile nanku.

²⁹Bu muvua Yudase ulama tshibutshilu, bakuabu bavua bela meji ne: Yezu udi umuambila bua kuyaye kusumba bintu bivuabu bakengela bua kuenza nabi tshibilu, nansha utua umuambila bua kuambuluishaye bapele.)

³⁰Yudase kuangata tshipese tshia diampa, kupatukaye diakamue. Butuku buvua bumane kuila.

³¹Yudase mumane kupatuka, Yezu kuamba ne: — Mpindiewu butumbi bua Muana wa muntu budi bumueneka patoke. Butumbi kabidi bua Mvidi Mukulu nebudileje kudiye.

³²Padi butumbi bua Mvidi Mukulu budileja kudiye, Mvidi Mukulu nealeje kabidi butumbi bua Muana wa muntu. Neabuleje lukasa.

³³Bana banyi, ntshidi nenu kabidi amu bua meba makese. Nenunkebe. Kadi ndi nnuambila mpindiewu bimvua muambile bena Yuda ne: kanuena mua kuya kundi nya.[142]

³⁴Ndi nnupesha mukenji mupiamupia ne: Nunangangane. Nudi ne bua kunangangana mundi mununange.

³⁵Panuikala banangangane, nenku bantu bonsu nebanumanye ne: nudi balongi banyi.

³⁶Simone Petro kumukonka ne: — Mfumu, udi uya penyi? Yezu kumuandamuna ne: — Kuena mua kundonda mpindiewu muaba undi nya to. Kadi neundonde pashishe.

³⁷Petro kumukonka ne: — Mfumu, tshiena mua kukulonda mpindiewu bua tshinyi? Ndi mumane kudilongolola bua kufila muoyi wanyi bualu buebe.

³⁸Yezu kumukonka ne: — Petro, udi mumane kudilongolola menemene bua kufila muoyi webe bualu buanyi anyi? Ndi nkujadikila ne: tshitala katshiyi tshianji kusama, newikale mumane kujadika misangu isatu ne: tshiena mumumanye to.