Read Tshiluba Yowanane 14 Bible Online

Yowanane 14 - Tshiluba bible

Yowanane 14

¹Yezu kuambila balongi bende ne: — Kanupampakanyi. Itabayi[143] Mvidi Mukulu, nungitabe ne meme kabidi.

²Mu nzubu mua Tatu wanyi mudi miaba ya bungi ya kusomba. Ndi nya kunulongoluela muaba. Bu bualu ebu kabuyi bulelela, tshivua mua kumuambilabu nansha.[144]

³Meme mumane kuya kunulongoluela muaba, nempingane bua kunuangata, bua nuikale nuenu kabidi muaba undi.

⁴Nudi bamanye njila wa kundi nya.

⁵Tomase kumuamba ne: — Mfumu, katuena bamanye kuudi uya to. Mutudi mua kumanya njila mbishi?

⁶Yezu kumuandamuna ne: — Ndi njila, ndi bulelela, ndi muoyi. Muntu nansha umue kena mua kuya kudi Tatu kayi mupitshile kundi.

⁷Panudi bammanye meme, nenumanye[145] kabidi Tatu wanyi. Mpindiewu nukadi bamumanye, kabidi nukadi bamumone.

⁸Filipe kumuamba ne: — Mfumu, utuleje Tatu. Ke tshionsu tshitudi tujinga.

⁹Yezu kumuandamuna ne: — Filipe, kudi matuku mulongulongu andi mushale nenu, kuena muanji kummanya anyi? Muntu mumane kummona, mmumane kumona Tatu. Muudi wamba ne: “Utuleje Tatu” mbishi?

¹⁰Kuena witaba ne: ndi munda mua Tatu, kabidi Tatu udi munda muanyi anyi? Miaku indi nnuambila buonsu buenu kayena ifuma kundi. Kadi Tatu udi ushala munda muanyi, ke udi ukumbaja midimu yende.

¹¹Pandi nnuambila ne: ndi munda mua Tatu, kabidi Tatu udi munda muanyi, nungitabe. Nuitabile nansha bua malu aa andi ngenza.

¹²Ndi nnujadikila bulelela ne: muntu udi ungitaba neenze kabidi midimu indi ngenza. Neenze mikuabu mipite bunene, bualu ndi nya kudi Tatu.

¹³Nengenze bionsu binualomba mu dina dianyi, bua Muana amueneshe butumbi bua Tatu.

¹⁴Panudi nundomba[146] tshintu mu dina dianyi, nentshienze.

¹⁵— Panudi nunnanga, nenutumikile mikenji yanyi.

¹⁶Nendombe Tatu bua anupe udi mua kunuambuluisha, Mueyelu wa bulelela bua wikale nenu kashidi.

¹⁷Ba pa buloba kabena mua kuwakidila, bualu kabena mua kuumona nansha kuumanya. Kadi nuenu nudi baumanye. Bualu udi ushala nenu, udi kabidi munda muenu.[147]

¹⁸Tshiena mua kunushiya nkayenu to. Nempingane tshiakabidi kunudi.

¹⁹Kunyima kua katupa, ba panu kabakummona kabidi to. Kadi nuenu nenummone, bualu ndi ne muoyi, nuenu kabidi nenuikale ne muoyi.

²⁰Dituku adi, nenujingulule ne: ndi munda mua Tatu wanyi, nuenu kabidi nudi munda muanyi, meme munda muenu.

²¹Muntu udi ulama mikenji yanyi, uyitumikila, ke udi munnange. Muntu udi munnange, Tatu wanyi neamunange. Meme kabidi nemmunange, nendileje kudiye.

²²Yuda (ki nYudase Iskariyote to) kumukonka ne: — Mfumu, mmunyi muudi mua kudileja kutudi, kuyi udileja kudi ba pa buloba?

²³Yezu kumuandamuna ne: — Muntu udi munnange, neakumbaje bindi ngamba. Tatu wanyi neamunange. Tatu wanyi ne meme netuye kudiye, netusombe munda muende.

²⁴Muntu udi kayi munnange, kena utumikila miaku yanyi. Binudi nungumvua ngamba, ki mbianyi to. Kadi mbifumina kudi Tatu uvua muntume.

²⁵Ndi munuambile malu aa pantshidi nenu.

²⁶Udi ne bua kunuambuluisha, Mueyelu wa Tshijila watumabu kudi Tatu mu dina dianyi, neunulongeshe bionsu. Neunuvuluije bionsu bimvua munuambile.

²⁷Ndi nnushila ditalala. Ndi nnupesha ditalala dianyi.[148] Tshiena nnupeshadi bu mudi ba pa buloba badipeshangana. Kanupampakanyi. Kanutshinyi.

²⁸Nuvua bumvue nnuambila ne: “Nkadi ngumuka, kadi nempingane kunudi.” Panuikala bannange, nenusanke panudi numanya ne: ndi nya kudi Tatu. Bualu Tatu udi mumpite ku bunene.

²⁹Ndi mumane kunuambilabi mpindiewu kabiyi bianji kuenzeka, bua padibi bienzeka, nuitabe.

³⁰Tshiena mua kuyukila nenu kabidi bia bungi to. Bualu mfumu wa pa buloba ebu udi ulua. Kena mua kuntumina diyi to.

³¹Kadi bidi bimpe bua ba pa buloba bamanye ne: ndi munange Tatu, kabidi ndi ngenza mudi Tatu untumina diyi. Jukayi, tumukayi apa!