Read Tshiluba Yowanane 21 Bible Online

Yowanane 21 - Tshiluba bible

Yowanane 21

¹Kunyima kua matuku, Yezu kumuenekela balongi bende tshiakabidi ku dijiba dia Tiberiyade. Telejayi muvuaye mubamuenekele:

²Simone Petro, Tomase (udibu binyika ne: wa Dipasa), Natanayele (uvua wa mu Kana mu Ngalileya), bana ba Zebede ne balongi bakuabu babidi ba Yezu bavua pamue.

³Simone Petro kubambila ne: — Ndi nya kuloba mishipa. Bobu kumuandamuna ne: — Tuetu kabidi, tuyaya nebe. Nanku kuyabu, kubanda mu buatu. Kadi butuku abu kabavua bakuata tshintu nansha tshimue.

⁴Pakavua butuku butshia, Yezu kubamuenekela ku muelelu wa mayi, kadi balongi kabavua bamanye ne: nYezu to.

⁵Yezu kubakonka ne: — Bana banyi, nudi bakuate mishipa anyi? Bobu kumuandamuna ne: — To.

⁶Yeye kubambila ne: — Elayi bukondu ku dia balume dia buatu, nenukuate mishipa. Nanku bobu kuela bukondu. Kabavua mua kubupatula mu mayi bualu buvua buwule tente ne mishipa.[190]

⁷Mulongi uvua Yezu munange, kuambila Petro ne: — Ke Mfumu! Petro umvua ne: “mMfumu,” kuvualaye tshilamba tshiende (bualu kavua ne bilamba pambidi to.) Kudielaye mu mayi.

⁸Balongi bakuabu kufika ne buatu, benda bakoka bukondu buwule tente ne mishipa. Bavua pabuipi ne muelelu wa mayi, mutantshi bu wa metre lukama.

⁹Bamane kupatuka mu mayi, kumonabu muaba awu kapia katema ne mishipa mitentekapu, kabidi ne diampa.

¹⁰Yezu kubambila ne: — Luayi ne mishipa ya ku inudi bakuate.

¹¹Simone Petro kubuela mu buatu, kukokela bukondu ku muelelu wa mayi, buwule tente ne mishipa minene, yonsu misanga ivua lukama makumi atanu ne isatu. Nansha muvuayi bungi nanku, bukondu kabuvua bupandike to.

¹²Yezu kubambila ne: — Luayi nudie. Mulongi nansha umue kavua mupete dikima dia kumukonka ne: “Wewe udi nganyi?” Bualu bavua bamanye ne: mMfumu.

¹³Yezu kusemena, kuangata diampa, kubabanyina, kubapesha kabidi ne mishipa.

¹⁴Ke musangu muisatu[191] uvua Yezu mumuenekele balongi bende katshia wabika ku lufu.

¹⁵Bobu bamane kudia, Yezu kukonka Simone Petro ne: — Simone, muana wa Yowanane, udi munnange mupite mudi bakuabu aba bannange anyi? Petro kuandamuna ne: — Eyowa, Mfumu, udi mumanye mundi mukunange. Yezu kumuambila ne: — Ukube bana banyi ba mikoku.

¹⁶Pashishe kumukonkaye tshiakabidi ne: — Simone, muana wa Yowanane, udi munnange anyi? Petro kumuandamuna ne: — Eyowa, Mfumu, udi mumanye mundi mukunange. Yezu kumuambila ne: — Ukube mikoku yanyi.

¹⁷Pashishe kumukonkaye tshiakasatu ne: — Simone, muana wa Yowanane, udi munnange anyi? Petro kubungama, bualu Yezu uvua umukonka tshiakasatu ne: “Udi munnange anyi?” Ke kumuandamunaye ne: — Mfumu, udi mumanye bionsu, udi mumanye mundi mukunange! Yezu kumuambila ne: — Ukube mikoku yanyi.[192]

¹⁸Ndi nkujadikila ne: pautshivua nsongalume, uvua udisuika mukaba wewe nkayebe, uya kuuvua musue, kadi pawashala mukulakaje, newolole maboku, mukuabu neakusuike mukaba webe, neakufile kuudi kuyi musue kuya.

¹⁹(Pavua Yezu wamba nanku, uvua musue kumvuija mushindu uvua Petro ne bua kufua bua kutumbisha Mvidi Mukulu.) Pashishe Yezu kumuamba ne: — Undonde!

²⁰Petro ukudimuka, kumonaye mulongi uvua Yezu munange, ubalonda. (Yeye awu ke uvua mueyemene Yezu pavuabu badia, kabidi uvua mumukonke ne: “Mfumu wakutungidi tshitungu nnganyi?[193]”)

²¹Petro umumona, kukonkaye Yezu ne: — Mfumu, kadi yeye tshidi mua kumuenzekela ntshinyi?

²²Yezu kumuandamuna ne: — Meme musue bua ashale ne muoyi too ne pangapingana tshiakabidi, mbualu buebe anyi? Wewe, undonde!

²³Lumu kutangalaka kudi bavua balonda Yezu ne: mulongi awu kakufua to. Kadi Yezu kavua muambile Petro ne: “Mulongi awu kena ufua to,” kadi uvua muambe ne: “Meme musue bua ashale ne muoyi too ne pangapingana tshiakabidi, mbualu buebe anyi?[194]”

²⁴Mulongi awu ke udi ulonda malu aa, uvua muafunde kabidi. Tudi bamanye ne: bidiye ujadika mbilelela.[195]

²⁵Yezu uvua muenze kabidi malu makuabu a bungi. Bu bantu baafunde mu mukanda ku bumue ku bumue, ndi ngela meji ne: mu buloba bujima kabavua mua kupeta muaba wa kulamina mikanda ivuabu mua kufunda.[196]