Read Tshiluba Yowanane 4 Bible Online

Yowanane 4 - Tshiluba bible

Yowanane 4

¹Yezu uvua mumvue muvua Baparushe bumvue lumu ne: Yezu udi utua bantu mu mayi, mmupete kabidi balongi ba bungi bapite ba Yowanane.

²Yezu kavua mutue mene muntu nansha umue mu mayi to, amu balongi bende ke bavua batua bantu mu mayi.

³Ke Yezu kumuka mu Yudeya bua kupingana mu Ngalileya.

⁴Ke muvuaye ne bua kupitshila mu ditunga dia Samariya.

⁵Kufikaye pabuipi ne musoku wa mu Samariya, dina diawu Sikare, uvua pabuipi ne budimi buvua Yakobe mupeshe muanende Yozefe.[44]

⁶Mu musoku awu muvua tshiina tshia mayi tshia Yakobe. Yezu uvua mupungile ne luendu. Kusombaye ku muelelu wa tshiina etshi. Diba dikavua bu pa dikumi ne ibidi ya munda munya.

⁷Mukaji wa mu Samariya kufika bua kusuna mayi. Yezu kumulomba ne: — Mpeshaku mayi a kunua.

⁸(Balongi bende bavua baye mu tshimenga bua kusumba biakudia.)

⁹Mukaji muena Samariya kuandamuna Yezu ne: — Kadi, wewe udi muena Yuda! Muudi ukimina kundomba mayi a kunua, meme muena Samariya mbishi? (Bualu bena Yuda kabena bumvuangana ne bena Samariya[45] to.)

¹⁰Yezu kumuandamuna ne: — Bu wewe mumanye bidi Mvidi Mukulu upeshangana, mumanye kabidi muntu udi ukulomba mayi a kunua, wewe ke uvua mua kumulomba mayi, yeye kukupesha mayi a muoyi.[46]

¹¹Mukaji kumuambila ne: — Mulongeshi, kuena ne mbeketshi, kabidi tshiina tshidi tshiondoke. Kadi mayi a muoyi udi mua kuapeta bishi?

¹²Nkambua wetu Yakobe ke uvua mutupeshe tshiina etshi. Yeye mene uvua munue mayi a mu tshiina atshi ne bana bende, kabidi ne bimuna biende. Wewe udi mupite Yakobe anyi?

¹³Yezu kumuandamuna ne: — Muntu yonsu udi unua mayi aa neumvue kabidi nyota.

¹⁴Kadi wanua mayi andi mmupesha meme, kakumvua kabidi nyota tshiendelele. Bualu mayi andi umupesha, neenze munda muende mpokolu wa muoyi wa tshiendelele.[47]

¹⁵Mukaji kumuamba ne: — Mulongeshi, umpeshe mayi awu, bua tshikadi kabidi ne nyota, tshikadi kabidi ne dikenga dia kusuna mayi muaba ewu.

¹⁶Yezu kumuamba ne: — Uye kubikila bayebe, nufike nende apa.

¹⁷Mukaji kumuandamuna ne: — Tshiena ne bayanyi. Ke Yezu kumuambila ne: — Udi muambilemu bushiwa ne: tshiena ne bayanyi.

¹⁸Bualu uvua ne balume batanu. Mulume uudi nende mpindiewu ki mbayebe to. Uvua mungambidilemu bulelela.

¹⁹Ke mukaji kumuamba ne: — Mulongeshi, ndi mmona ne: udi muambi.

²⁰Bankambua betu ba bena Samariya bavua batendelela Mvidi Mukulu pa mukuna ewu. Kadi nuenu bena Yuda, nudi nuamba ne: muaba udibu mua kutendelela Mvidi Mukulu udi amu mu Yerushalayime.[48]

²¹Yezu kumuandamuna ne: — Ungitabe, tshikondu netshifike tshinuikala kanuyi nutendelela Tatu pa mukuna ewu, nansha ku Yerushalayime.

²²Nuenu, bena Samariya kanuena bamanye tshinudi nutendelela. Tuetu, bena Yuda tudi bamanye tshitudi tutendelela. Bualu lupandu ludi lufumina kudi bena Yuda.[49]

²³Kadi tshikondu netshifike, ntshimane kufika mene, tshidi batendeledi balelela batendelela Tatu mu mueyelu ne mu bulelela. Bualu Tatu udi musue bantu badi bamutendelela mushindu ewu.

²⁴Mvidi Mukulu udi Mueyelu. Badi bamutendelela badi ne bua kumutendelela mu mueyelu ne mu bulelela.

²⁵Mukaji kumuamba ne: — Ndi mumanye ne: Meshiya (mmomumue ne Kristu) nealue. Pafikaye, neatujinguluile malu onsu.

²⁶Yezu kumuandamuna ne: — Ke meme udi wakula nebe ewu.

²⁷Diba adi balongi ba Yezu kufika. Kukemabu pavuabu bamusangana uyukila ne mukaji. Kadi muntu wa kudibu nansha umue kavua mukimine kumukonka ne: “Tshiudi ujinga kudi mukaji ewu ntshinyi?” nansha ne: “Udi uyukila nende bualu kaayi?”

²⁸Ke mukaji kushiya mulondu wende wa mayi muaba awu. Kupinganaye mu tshimenga muvuaye musombele, wambila bantu ne:

²⁹— Luayi numone muntu uvua mungambile malu onsu amvua muenze. Bumue udi mua kuikala Meshiya anyi?

³⁰Nanku bantu kumuka mu tshimenga, kuya kudi Yezu.

³¹Diba mene adi balongi kusengelela Yezu bua kudiaye, bamuambila ne: — Mulongeshi, anji ela kantu munda.

³²Kadi Yezu kubandamuna ne: — Ndi ne biakudia binuvua kanuyi bamanye.

³³Balongi kukonkangana ne: — Muntu uvua mumutuadile biakudia anyi?

³⁴Yezu kubambila ne: — Tshianyi tshiakudia nkukumbaja dijinga dia uvua muntume, kabidi nkujikija mudimu uvuaye mumfundile bua kuenza.

³⁵Nuenu nudi nuamba ne: “Kutshidi kushala ngondu inayi bua tshikondu tshia kunowa biakudia kukumbanatshi.” Kadi meme ndi nnuambila ne: tangilayi mu madimi; ntete mmimane kuboba, tshikondu tshia kuyinowa ntshimane kufika!

³⁶Muntu udi unowa ukadi upeta diende difutu. Udi usangisha ntete bua muoyi wa tshiendelele. Nanku udi ukuna ne udi unowa badi basanka popamue.

³⁷Bualu lusumuinu elu ludi luamba malu malelela ne: “Muntu umue udi ukuna, mukuabu udi unowa.”

³⁸Mvua munutume bua kunowa ntete mu budimi bunuvua kanuyi bakuatshile mudimu. Bantu bakuabu ke bavua babukuatshile mudimu. Nuenu nudi bapete bintu bia ku mudimu wabu.

³⁹Bena Samariya ba bungi ba mu tshimenga etshi kuitaba Yezu bualu mukaji uvua mubambile ne: “Muntu ewu mmungambile bionsu bimvua muenze.”

⁴⁰Ke muvua bena Samariya baye kudi Yezu bamusengelela bua ashale nabu. Yezu kushala muaba awu matuku abidi.

⁴¹Bantu bakuabu bapite bungi kabidi kuitaba Yezu, bua malu avuaye yeye mene ubambila.

⁴²Ke bantu kuambila mukaji ne: — Mpindiewu katuena tuitaba amu bua biuvua mutulondele. Kadi tuvua badiumvuile nkayetu. Nanku tudi bamanye ne: Yeye ke Musungidi menemene wa bantu.

⁴³Yezu mumane kushala matuku abidi muaba awu, kumukaye bua kuya mu Ngalileya.

⁴⁴Bualu yeye mene uvua muambe ne: “Muambi kabena bamunemeka mu ditunga diabu.[50]”

⁴⁵Yeye mumane kufika mu Ngalileya, bena ditunga kumuakidila bimpe. Bualu bobu kabidi bavua baye bua tshibilu tshia Dipita dia Maweja-Nangila ku Yerushalayime, kabidi bavua bamone bionsu bivuaye muenzemu.[51]

⁴⁶Nanku Yezu kupingana mu Kana ka Ngalileya muvuaye muandamuine mayi menze nwinyo. Mu musoku awu muvua muena mudimu munene wa mbulamatadi.[52] Uvua ne muanende wa balume usama ku musoku wa Kefamawume.

⁴⁷Yeye mumane kumvua ne: Yezu mmufike mu Ngalileya ufumine ku Yudeya, kuyaye kudiye. Kumusengelelaye bua aye kujikija disama dia muanende uvua upunga ne lufu ku Kefamawume.

⁴⁸Yezu kumuamba ne: — Nuenu, kanuena ne mushindu wa kuitaba panudi kanuyi numona bishima ne malu a kukema.

⁴⁹Muena mudimu munene wa mu mbulamatadi awu kumuandamuna ne: — Mulongeshi, tuye kuanyi patshidi muananyi kayi muanji kufua.

⁵⁰Yezu kumuambila ne: — Pingana kuebe, muanebe udi ne muoyi. Muntu awu kuitaba muvua Yezu mumuambile. Kuyaye.

⁵¹Patshivuaye uya kuende, bena mudimu bende kuvua kumuakidila, bamuambila ne: — Muanebe udi ne muoyi!

⁵²Yeye kubakonka diba divua muanende musanguluke. Bobu kumuandamuna ne: — Disama ndimushile muaba makelela pa diba umue wa ku dilolu.

⁵³Ke tatuende wa muana kuvuluka ne: diba adi mene ke divua Yezu mumuambile ne: “Muanebe udi ne muoyi”. Yeye ne bena mu nzubu wende mujima kuitaba Yezu.[53]

⁵⁴Ke bualu bua dikema buibidi buvua Yezu muenze pavuaye mumane kufika mu Ngalileya, utumina ku Yudeya.[54]