Read Tshiluba Yowanane 8 Bible Online

Yowanane 8 - Tshiluba bible

Yowanane 8

²Butshia dinda dionsu, kupinganaye mu nzubu wa Mvidi Mukulu. Bantu bavule kutantshila kudiye. Yezu usomba kubangaye kubalongesha.

³Balongeshi ba mikenji ne Baparushe kumutuadila mukaji uvuabu bajikidile wenda buendenda. Kumutekabu kumpala kua bantu bonsu.

⁴Kuambilabu Yezu ne: — Mulongeshi, tuvua bajikidile mukaji ewu wenda buendenda.

⁵Kadi Moshe uvua mutuelele mukenji bua kushipa ne mabue[92] bakaji ba mushindu ewu. Kadi wewe pa tshilumbu etshi, udi wamba bishi?

⁶Bavua bamba nanku bua kumuteta, bua kumonabu mua kumusonguela. Kadi Yezu kuzonzama, kubanga kufunda ne munu panshi.

⁷Pavuabu batungunuka amu ne dimukonka, kubandulukaye, kubambila ne: — Muntu wa kunudi udi kayi muanji kuenza bualu bubi, adianjile kumuasa dibue.

⁸Pashishe Yezu kuzonzama tshiakabidi, kutungunuka ne difunda panshi.

⁹Bobu bamane kumvua miaku ayi, kulamukabu ku muntu ku muntu, bituadije ku bakulumpe. Yezu kushala nkayende pamue ne mukaji. Mukaji awu utshivua anu muimane kumpala kuende.

¹⁰Yezu kubanduluka, kumukonka ne: — Kadi badi penyi? Kakuena muntu udi mukupishe anyi?

¹¹Mukaji kuandamuna ne: — Mulongeshi, kakuena muntu uvua mumpishe. Ke Yezu kumuambila ne: — Nansha meme kabidi tshiena nkupisha to. Udi mua kumuka, kadi kuenji kabidi bualu bubi to.]

¹²Yezu kulongesha kabidi bantu, ubambila ne: — Meme ndi butoke bua badi pa buloba.[93] Muntu udi undonda katshia kena wenda mu miidima, kadi neikale ne butoke bua muoyi.

¹³Baparushe kumuamba ne: — Udi udijadikila malu ebe nkayebe. Nenku malu audi wamba kaena malu a nsongu to.

¹⁴Yezu kuandamuna ne: — Nansha meme ndijadikila malu anyi, bindi ngamba bidi bilelela. Bualu ndi mumanye kundi mufume, nansha kundi nya. Kadi nuenu kanuena bamanye kundi mufume, nansha kundi nya.

¹⁵Nudi nukosa nsambu mudi bantu bakosa. Kadi meme tshiena nkosa nsambu ya muntu nansha umue to.

¹⁶Kadi nansha meme mukose nsambu, ndi nyikosa amu pa yoyi, bualu tshiena nkayanyi bua kukosa nsambu to, kadi Tatu uvua muntume udi pamue nanyi.

¹⁷Mu mukanda wenu wa mikenji mbafunde ne: padi bantu babidi bajadika mushindu umue bualu, tshidibu bamba tshidi tshilelela.[94]

¹⁸Ndi ndijadikila bualu buanyi, kabidi Tatu uvua muntume udi ujadika bualu buanyi.

¹⁹Bobu kumukonka ne: — Tatu webe udi penyi? Yezu kubandamuna ne: — Kanuena bamanye nansha meme, nansha Tatu. Bu nuenu bammanye meme, nuvua mua kumanya kabidi Tatu wanyi.

²⁰Yezu uvua muambile bantu miaku eyi, pavuaye ulongesha mu nzubu wa Mvidi Mukulu, mu tshibambalu tshiyuabu balamina mishete ya kuela makuta a kulambula Mvidi Mukulu. Muntu nansha umue kavua mumukuate, bualu diba diende kadivua dianji kukumbana.

²¹Yezu kubambila kabidi ne: — Meme nengumuke. Nenunkebe. Kadi nenufuile mu malu enu mabi. Kanuena mua kuya kundi nya.

²²Bena Yuda kukonkangana ne: — Neadishipe anyi? Bualu udi wamba ne: “Kanuena mua kuya kundi nya!”

²³Yezu kubandamuna ne: — Nuenu nudi bafume panshi pa buloba. Kadi meme ndi mfuma mulu. Nuenu nudi ba pa buloba ebu, kadi meme tshiena wa pa buloba ebu nansha.

²⁴Ke pandi munuambile ne: nenufuile mu malu enu mabi. Bualu panuikala kanuyi nuitaba ne: “Meme ndi mundi,[95]” nenufue mu malu enu mabi.

²⁵Kumukonkabu ne: — Wewe udi nganyi? Yezu kubandamuna ne: — Amu mumvua munuambile biangatshile ku tshibangidilu, [96] ke mundi.

²⁶Ndi ne malu a bungi a kuamba, kabidi a kunudiwula nawu. Kadi uvua muntume udi wamba malu malelela. Meme ndi ngambila bantu amu malu andi mumvue kudiye.

²⁷Kabatua bajingulula ne: utua utela Tatu.

²⁸Ke Yezu kubambila ne: — Nuenu bamane kuela Muana wa muntu kulu,[97] nenumanye ne: “ndi mundi.” Nenujingulule ne: tshiena ndienzela bualu nansha bumue nkayanyi. Kadi ndi ngamba amu malu adi Tatu mundongeshe.

²⁹Utua muntume udi pamue nanyi. Kavua mundekelele nkayanyi nansha, bualu ndi ngenza matuku onsu malu adi amusankisha.

³⁰Yezu mumane kuamba nanku, bantu ba bungi kumuitababu.

³¹Ke Yezu kuambila bena Yuda batua bamuitaba ne: — Panudi nuitaba muenu muonsu dilongesha dianyi, nenuikale bulelela balongi banyi.

³²Nanku nenumanye bulelela. Bulelela nebunuenze bantu badikadile.

³³Bobu kumuandamuna ne: — Tuetu tudi ndelanganyi ya Abrahame.[98] Katuena banji kuikala bapika ba muntu nansha. Mmunyi muudi utuamba ne: Nenuikale bantu badikadile?

³⁴Yezu kubandamuna ne: — Ndi nnujadikila ne: muntu yonsu udi wenza bualu bubi udi mupika wa bubi.

³⁵Mupika kena ushala kashidi mu diku to. Kadi muana udi ushalamu kashidi.

³⁶Padi Muana unupikula, nenuikale bantu badikadile bulelela.

³⁷Ndi mumanye ne: nudi ndelanganyi ya Abrahame. Kadi nudi nukeba kunshipa, bualu kanuena banyishe dilongesha dianyi.

³⁸Ndi ngamba bi-vua Tatu wanyi mundeje. Kadi nuenu nudi nuenza bivua tatuenu munuambile.

³⁹Kumuandamunabu ne: — Tatuetu ke Abrahame. Yezu kubambila ne: — Bu nuenu bikale bana ba Abrahame, nuvua mua kukuata midimu ivuaye mukuate.[99]

⁴⁰Kadi mpindiewu nansha mundi mumane kunuambila malu malelela andi mupete kudi Mvidi Mukulu, nudi nukeba kunshipa. Abrahame kavua muenze bualu bua mushindu ewu to.

⁴¹Nudi nuenza midimu ya momumue ne idi tatuenu wenza. Bobu kumuandamuna ne: — Katuena bana balela mu buendenda to. Tudi amu ne Tatu umue, ke Mvidi Mukulu.

⁴²Yezu kubandamuna ne: — Bu Mvidi Mukulu muikale Tatuenu bulelela, nuvua mua kunnanga. Bualu meme ndi mutumine kudi Mvidi Mukulu. Ndi panuapa mu dina diende. Tshiena mudivuile mu dina dianyi to. Kadi yeye ke uvua muntume.

⁴³Tshinudi kanuyi numvuila bindi nnuambila ntshinyi? Bualu kanuena ne mushindu wa kuteleja miaku yanyi.

⁴⁴Diabolu ke tatuenu. Nudi basue kuenza bidi tatuenu ujinga. Biangatshile ku tshibangidilu uvua mushipianganyi. Katshia ki mmuanji kushala mu bulelela, bualu bulelela kabuena munda muende. Padiye wamba malu a dishima, malu awu ke adi munda muende, bualu udi mudingianganyi, kabidi tatuende wa dishima.

⁴⁵Kadi meme ndi ngamba malu malelela. Ke panudi kanuyi nungitaba.

⁴⁶Wa munkatshi muenu udi mua kuntuisha ne: Uvua muenze bibi, nnganyi? Pandi ngamba bulelela, kanuena nungitaba bua tshinyi?

⁴⁷Muntu wa Mvidi Mukulu udi uteleja miaku ya Mvidi Mukulu. Kadi nuenu kanuena ba Mvidi Mukulu to. Ke panudi kanuyi nunteleja.

⁴⁸Bena Yuda kuandamuna Yezu ne: — Tuvua tuambilamu ne: udi muena Samariya, kabidi ne: udi ne mukishi mubi munda muebe.

⁴⁹Yezu kubandamuna ne: — Meme tshiena ne mukishi mubi munda to. Kadi meme ndi nnemeka Tatu wanyi. Nuenu kanuena nunnemeka to.

⁵⁰Tshiena ndikebela butumbi nansha. Kadi kudi mukuabu udi ubunkebela, ukosa kabidi nsambu.

⁵¹Ndi nnujadikila ne: muntu udi utumikila miaku yanyi, katshia kena ufua to.

⁵²Bena Yuda kumuandamuna ne: — Mpindiewu tudi tujadika ne: udi ne mukishi mubi munda! Abrahame kufua, bambi kabidi. Kadi wewe udi wamba ne: “Muntu udi ukumbaja bindi ngamba katshia kena ufua to.”

⁵³Tatu wetu Abrahame ukadi mumane kufua. Wewe udi wela meji ne: udi mumupite anyi? Bambi kabidi mbamane kufua. Kadi wewe udi udimona bu nganyi?

⁵⁴Yezu kubandamuna ne: — Bu meme nditumbisha nkayanyi, butumbi buanyi kabuvua mua kuikala ne mushinga to. Udi untumbisha nTatu wanyi, Yeye unudi nuamba ne: “Udi Mvidi Mukulu wetu.”

⁵⁵Kadi kanuena bamumanye. Meme ndi mumumanye. Bu meme muambe ne: Tshiena mumumanye, mvua kuikala muena dishima munudi nuenu. Kadi ndi mumumanye. Ndi ntumikila miaku yende.

⁵⁶Tatu wenu Abrahame uvua musanke, ujinga dituku dianyi. Wakadimona, wasanka kabidi.

⁵⁷Bena Yuda kumuamba ne: — Kuena muanji kukumbaja bidimu makumi atanu, muudi mumane kumona Abrahame mbishi?[100]

⁵⁸Yezu kubandamuna ne: — Ndi nnujadikila ne: kabayi banji kulela Abrahame, meme “ndi mundi[101]”.

⁵⁹Kuambulabu mabue bua kumuasa. Kadi Yezu kusokoma, kupatuka mu nzubu wa Mvidi Mukulu.