Read Tshiluba Malu Menza 1 Bible Online

Malu Menza 1 - Tshiluba bible

Malu Menza 1

¹Teyofile musuibue, Mu mukanda wanyi wa kumpala,[1] mvua mulonde malu onsu avua Yezu muenze, kabidi mulongeshe, biangatshile ku mbangilu,

²too ne ku dituku divuabu bamuambule mu diulu. Bangabanga ne kubandamu, uvua mumanyishe bapostolu, bavuaye musungule ku bukole bua Mueyelu wa Tshijila,[2] bivuabu ne bua kuenza.

³Kunyima kua lufu luende, uvua mumuenekele bapostolu misangu ne misangu, bua kubajadikila ne: ndi ne muoyi. Uvua mudileje kudibu matuku makumi anayi, ubambila malu a pa Bukalenga bua Mvidi Mukulu.

⁴Dituku dikuabu, pavuaye usomba nabu ku mesa, kubakandikaye ne: — Kanumuki mu Yerushalayime. Kadi nuindile dipa dimvua munumanyishe, divua Tatu mulaye.[3]

⁵Yowanane uvua utua bantu mu mayi. Kadi matuku makese aa, nebanutue nuenu munda mua Mueyelu wa Tshijila.[4]

⁶Bantu bavua bunguile pavua Yezu, kumukonkabu ne: — Mfumu, newenzulule bukalenga bua Izrayele mpindiewu anyi?[5]

⁷Yezu kubandamuna ne: — Tatu ke udi ujadika meba ne bikondu ku bumfumu buende. Nuenu kanuena ne bua kubimanya to.[6]

⁸Kadi nenupete bukole, diba dianupuekela Mueyelu wa Tshijila. Nanku nenumone mua kujadika malu anyi mu Yerushalayime, mu ditunga dijima dia Yudeya ne dia Samariya, kabidi too ne ku ndekelu wa buloba.[7]

⁹Yezu mumane kuamba nanku, kubandaye mu diulu, bobu batangile. Ke divuba kujika Yezu, kabayi bamumone kabidi to.[8]

¹⁰Batshivua batangile muvua Yezu ubanda mu diulu, ke bantu babidi bavuala bilamba bitoke[9] kubamuenekela diakamue,

¹¹kubakonka ne: — Bena Ngalileya, munudi bimane apa batangile mulu nanku mbishi? Yezu ewu, udibu bumushe kunudi, bambule mu diulu, neapingane kabidi, mushindu unudi bamumone ubandamu.

¹²Ke bapostolu kumuka ku mukuna wa mitshi ya Olive, kupingana ku Yerushalayime. Mukuna awu uvua mushilangane ne Yerushalayime mutantshi wa kilometre amu bu umue.[10]

¹³Bamane kufika ku Yerushalayime, kubandabu mu tshibambalu tshia nzubu tshia kulu, muaba muabu basomba misangu mivule. Bobu abu ke Petro, Yowanane, Yakobe ne Andre, Filipe ne Tomase, Bartolmayi ne Matayi, Yakobe muana wa Alfayi, Simone muluidi wa ditunga, ne Yuda muana wa Yakobe.[11]

¹⁴Bonsu bavua muoyi umue, bananukila mu ditendelela, pamue ne bakaji bakuabu, kabidi ne Mariya, mamuende wa Yezu, ne bana babu ne Yezu.

¹⁵Matuku makese apita, bena ditaba bamane kusangila bu lukama ne makumi abidi, ke Petro kujuka, kubambila ne:

¹⁶— Bana betu, miaku idibu bafunde mu Mikanda ya tshijila ivua ne bua kukumbana. Mueyelu wa Tshijila uvua mudianjile kumanyisha mukana mua Davide malu a Yudase,[12] muludiki wa bantu bavua bakuate Yezu.

¹⁷Yudase uvua wa mu tshisumbu tshietu, ukuata netu mudimu wa mushindu umue.

¹⁸(Muntu awu uvua musumbe budimi ne makuta avuabu bamufute bua bualu bubi buvuaye muenze. Kuponaye mu budimi amu, mutu panshi. Mubidi wende kutayika, bia munda bionsu kuya panshi.

¹⁹Bena Yerushalayime bonsu kumvua bualu ebu. Ke kuinyikabu budimi abu mu muakulu wabu ne: “Akeldama,” mmomumue ne: “Budimi bua mashi.[13]”)

²⁰Ke mudibu bafunde mu mukanda wa misambu ne: “Nzubu wende ashale munda mutupu, muntu kasombimu.” mBafundemu kabidi ne: “Muntu mukuabu apingane pa muaba wende.[14]

²¹Nanku mbimpe muntu umue adisange netu bua kujadika ne: Mfumu Yezu mmubiike ku bafue. Muntu awu ikale umue wa ku bantu batuvua nabu diba dionsu, pavua Mfumu Yezu wendakana netu, bituadija katshia Yowanane wamutua mu mayi, too ne ku dituku divuabu bamumushe kutudi, baye nende mu diulu.[15]

²³Nanku kufilabu mena abidi: Yozefe, uvuabu binyike ne: Barsabase, nansha ne: Muakane; kabidi ne Matiyase.

²⁴Ke bonsu pamue kutendelela, bamba ne: — Mfumu, wewe udi mumanye muoyi wa muntu yonsu. Nanku ku babidi aba utuleje uudi musungule.

²⁵Apingane Yudase mu mudimu wa bupostolu. Bualu Yudase mmuushiye, muye ku wende muaba.

²⁶Kutshinkabu bua kupeta muntu umue ku babidi aba. Kupetabu Matiyase. Kumusakidilabu ku bapostolu dikumi ne umue.