Read Tshiluba Malu Menza 13 Bible Online

Malu Menza 13 - Tshiluba bible

Malu Menza 13

¹Mu Tshisumbu tshia bena ditaba ba mu Antiyokiya muvua bambi ne balongeshi. Mena abu adi nunku: Barnabase, Shimeyone (udibu binyika ne: Mufiike), Lusiyuse wa mu Sirene, Manayene (uvua mukole pamue ne Erode, mulombodi wa ditunga[107]), ne Shawule.

²Dituku dikuabu, bobu bamane kujila biakudia amue matuku, pavuabu batendelela Mfumu, Mueyelu wa Tshijila kubambila ne: — Kanupeshi Barnabase ne Shawule mudimu mukuabu to. Baye amu kuenza mudimu undi mubabikidile.

³Bena ditaba kujila kabidi biakudia matuku makuabu, kutendelela Mvidi Mukulu. Pashishe kutentekabu Barnabase ne Shawule bianza, kubatuma ku mudimu wabu awu.

⁴Nanku Mueyelu wa Tshijila kutuma Barnabase ne Shawule ku mudimu. Kufikabu mu Selekiya.[108] Muaba awu kubuelabu mu majuwa, batangile ku tshidila tshia Shipre.

⁵Kufikabu mu Salamine. Kulongeshabu muaku wa Mvidi Mukulu mu nzubu ya kutendelela ya bena Yuda. Yowanane Marke uvua nabu, ubambuluisha.

⁶Kukosololabu tshidila tshijima, too ne ku tshimenga tshia Pafose. Mu tshimenga atshi kusanganabu muena dialu, diende dina Bar-Yezu. Uvua muena Yuda, udiamba mudiye muambi wa Mvidi Mukulu.

⁷Uvua usomba kua Serjiyuse Polu, muntu wa lungenyi, uvua ulombola tshidila atshi. Serjiyuse kubikidisha Barnabase ne Polu, bualu uvua ujinga kumvua muaku wa Mvidi Mukulu.

⁸Kadi Elimase (ke mudibu bandamuna dina diende mu tshiena ngreke nanku), muena dialu awu, uvua uluisha Barnabase ne Polu, ukeba bua mulombodi kafiki ku ditaba.

⁹Ke Shawule, udibu binyika kabidi ne: Polu,[109] muwule ne Mueyelu wa Tshijila, kumujooja,

¹⁰wamba ne: — Wewe udi muntu mubi, muena dishima, muana wa diabolu, mubengi wa malu mimpe onsu. Neulekele kujikila Mvidi Mukulu njila diba kaayi?

¹¹Mpindiewu, teleja: Mfumu neakunyoke. Neushale mpofu, kuyi umona diba amue matuku. Diakamue mesu a Elimase kufofama. Ukadi udimona butuku, unyunguluka nseke yonsu, ukeba muntu udi mua kumulombola, mumukuate ku tshianza.

¹²Mulombodi wa tshidila umona bivua bienzeka abi, kuitabaye. Bivuabu bamulongesha bualu bua Mfumu, bivua bimutua ku muoyi bikole.

¹³Polu ne binende kubuela mu majuwa mu Pafose, kuya mu Perje wa mu Pamfiliya. Yowanane Marke[110] kubashiya muaba awu, kupingana ku Yerushalayime.

¹⁴Polu ne binende kutungunuka ne luendu, kumuka mu Perje, kufika mu Antiyokiya wa mu Pisidiya. Dituku dia Dikisha, kubuelabu mu nzubu wa kutendelela wa bena Yuda, kusombabu.

¹⁵Bantu bamane kubala mukanda wa Mikenji ne wa Bambi, bamfumu ba nzubu wa kutendelela kubalomba ne: — Bana betu, panuikala ne imue miaku ya kukolesha nayi bantu ku muoyi, nudi mua kuakula mpindiewu.

¹⁶Polu kujuka, kupuwisha bantu ne tshianza, wamba ne: — Nuenu bena Izrayele, nuenu kabidi bena bisamba bikuabu badi batendelela Mvidi Mukulu, ntelejayi:

¹⁷Mvidi Mukulu wa tshisamba etshi, Mvidi Mukulu wa Izrayele, mmusungule bankambua betu. Uvua muvu-dije tshisamba etshi, pavuatshi kua bende mu ditunga dia Ejipitu. Pashishe kubapatulaye mu Ejipitu ku bukole buende.

¹⁸Uvua mubalame bidimu bu makumi anayi mu tshipela.[111]

¹⁹Kubutulaye bisamba muanda mutekete mu buloba bua Kenaane. Kufilaye buloba buabi kudi bantu bende ne: mbuenu.[112]

²⁰Bionsu abi bivua bienzeka munkatshi mua bidimu bu nkama inayi ne makumi atanu. Pashishe kupeshaye bankambua betu balombodi, too ne ku tshikondu tshia muambi Samuwele.[113]

²¹Kadi bankambua betu kulomba mukalenga kudi Mvidi Mukulu. Yeye kubapesha Shawule, muana wa Kishe, wa mu tshisamba tshia Binyamine. Kushalaye mu bukalenga bidimu makumi anayi.

²²Mvidi Mukulu mumane kubenga Shawule, kutekaye Davide, bua ikale mukalenga wabu. Mvidi Mukulu kuamba ne: “Ndi musungule Davide, muana wa Ishayi, muntu wa pa muoyi wanyi. Neakumbaje bionsu bindi musue.[114]”

²³Ku ndelanganyi ya Davide, ke kudi Mvidi Mukulu mupatuile bena Izrayele Yezu, Musungidi wabu, amu muvuaye mulaye.

²⁴Yezu kayi muanji kufika, Yowanane kubela bantu bonsu bua badilengeje, babatue mu mayi.[115]

²⁵Pavua Yowanane mumane kufika ku matuku ende a ndekelu panu, uvua ukonka bantu ne: “Nudi nuela meji ne: meme ndi nganyi? Tshiena unudi bindile awu to! Kadi unudi batekemene udi ufika munyima muanyi. Tshiena muakanyine nansha mua kukopola bisabata bia ku makasa ende.[116]”

²⁶Bana betu, nuenu ndelanganyi ya Abrahame, kabidi ne nuenu bena bisamba bikuabu bitabi ba Mvidi Mukulu, mbatutumine tuetu bonsu mukenji wa lupandu ewu.

²⁷Bualu bena mu Yerushalayime, ne bamfumu babu, kabavua bamanye ne: Yezu udi nganyi. Nanku kabavua bajingulule miaku ya bambi, ivuabu bababadila dituku dionsu dia Dikisha. Kadi bavua bakumbaje miaku eyi pa kufundila Yezu tshibawu tshia lufu.

²⁸Nansha muvuabu kabayi basangana bualu bua kunufundila lufu, kulombabu Pilate bua amushipeshe.

²⁹Bobu bamane kukumbaja bionsu bivua Mikanda ya tshijila midianjila kuamba bualu buende, kumutululabu ku mutshi mutshiamakane, kumuteka mu lukita.[117]

³⁰Kadi Mvidi Mukulu kumubisha ku bafue.

³¹Matuku mavule Yezu kumuenekela bavuaye mufume nabu ku Ngalileya, muye nabu ku Yerushalayime. Bobu abu ke badi bajadikila bena Izrayele mpindiewu malu ende.[118]

³²Tuetu kabidi tudi tunumanyisha Lumu lua Disanka elu ne: bivua Mvidi Mukulu mulaye bankambua betu,

³³ke bidiye mutukumbajile tuetu, ndelanganyi yabu, mpindiewu. Bualu mmubishe Yezu ku bafue, amu mudibu bafunde mu musambu muibidi ne: “Wewe ke Muananyi, biangatshile lelu, meme ndi Tatuebe.”

³⁴Mvidi Mukulu uvua ne bua kubisha Yezu ku bafue, bua mubidi wende kaubodi. Ke bivuaye mudianze kumanyisha bantu ne: “Nennupe mapa a tshijila adi kaayi anyanguka, amvua mulaye Davide.”

³⁵Ke padi Mvidi Mukulu ujadika kabidi muaba mukuabu ne: “Kuakulekela mukuitabi webe abolele mu lukita.[119]

³⁶Mu tshikondu tshiende, Davide mmukumbaje bivua Mvidi Mukulu musue. Pashishe kufuaye. Kumujikabu pabuipi ne bankambua bende, kubolaye.[120]

³⁷Kadi udi Mvidi Mukulu mubishe ku bafue, ki mmubole to.

³⁸Nenku, bana betu, tudi tunumanyisha se: Yezu ke udi ujimija mibi yenu.

³⁹Muntu yonsu udi umuitaba, neapete dijimija dia mibi yonsu, dinuvua kanuyi mua kupeta kudi mikenji ya Moshe.

⁴⁰Nanku dimukayi, bua bivua bambi bambe kabinuenzekedi.[121] Bavua bambe ne:

⁴¹“Nuenu bena kapeja, tangilayi! Zakalayi ne bowa, nubutuke! Bualu mu tshikondu tshienu etshi nkadi pa kuenza tshishima, tshidi muntu mua kunulondela, kanuyi mua kuitaba.[122]”

⁴²Polu ne Barnabase bapatuka mu nzubu wa kutendelela, bantu kubalomba bua bapingane Dituku dia dikisha didi kumpala, bua kuyukila kabidi nabu pa bualu ebu.

⁴³Ditendelela dimane kujika, bena Yuda bavule, ne bantu ba bisamba bikuabu bavua bamane kubuela mu Tshisumbu tshia bena ditaba ba bena Yuda, kulondabu Polu ne Barnabase. Bobu abu bavua bayukila nabu, babakolesha ku muoyi, bua bashindame mu ditaba divuabu bapete kudi Mvidi Mukulu.

⁴⁴Dituku dia dikisha di vua kumpala, bena mu tshimenga bu bonsu kusangila bua ku-mvua muaku wa Mfumu.

⁴⁵Kadi bena Yuda bamona bungi bua bantu abu, kupetabu lubabu, babenga bivua Polu wamba, bamupenda kabidi.

⁴⁶Kadi Polu ne Barnabase bavua babambila patoke ne: — Nuenu ke batuvua ne bua kudianza kumanyisha muaku wa Mvidi Mukulu. Kadi bu munudi nuubenga, nudimona ne: katuena bualu ne muoyi wa kashidi, nanku tuetu tudi tuya kudi bantu badi kabayi bena Yuda.

⁴⁷Bualu Mfumu mmutuleje bua kuenza nunku, pavuaye wamba ne: “Ndi mukuteke butoke bua bantu ba bisamba bikuabu, bua ufikishe lupandu ne ku ntengu ya buloba.[123]”

⁴⁸Bavua kabayi bena Yuda bumvua nanku, kusankabu bikole, bela Mfumu tuasakidila bua muaku wende. Bantu bonsu bavuabu basungula bua kupeta muoyi wa kashidi, kubuelabu mu Tshisumbu tshia bena ditaba.

⁴⁹Muaku wa Mfumu kutangalaka mu ditunga dijima.

⁵⁰Kadi bena Yuda kusonsola bakaji ba baneme bavua bamane kubuela mu Tshisumbu tshia bena ditaba ba bena Yuda, ne balombodi ba tshimenga, bua bakebele Polu ne Barnabase mvita. Nanku kubipatabu mu ditunga diabu.

⁵¹Polu ne Barnabase kubatutuila lupuishi lua ku makasa,[124] kuya mu Ikoniyume.

⁵²Kadi bena ditaba ba mu Antiyokiya bavua ne disanka, buwule ne Mueyelu wa Tshijila.