Read Tshiluba Malu Menza 14 Bible Online

Malu Menza 14 - Tshiluba bible

Malu Menza 14

¹Mu Ikoniyume Polu ne Barnabase kubuela kabidi mu nzubu wa kutendelela wa bena Yuda. Bu muvuabu balongesha bimpe, bena Yuda bavule, ne bantu ba bisamba bikuabu, kubuela mu Tshisumbu tshia bena ditaba.

²Kadi bena Yuda bakuabu bavua babenga kuitaba, kusonsolabu bantu ba bisamba bikuabu, bua baluishe bana betu abu.

³Kadi Polu ne Barnabase bavua amu mua kushala matuku makumbane mu Ikoniyume. Bavua batekemena kudi Mfumu, balongesha bantu ne: Mfumu ke udi utupa bumfumu bua kuenza bishima ne malu a dikema. Ke mudiye unuleja ne: bitudi tunulongesha pa dinanga didi Mvidi Mukulu utunanga nadi mbilelela.

⁴Ke bena mu tshimenga kuabulukangana: bamue banyisha bena Yuda, bakuabu bitaba bapostolu.

⁵Bena Yuda, bantu ba bisamba bikuabu, ne bamfumu babu, bavua bajula tshimvundu, bakeba kukengesha Polu ne Barnabase, kubasa mabue, kubashipa.

⁶Polu ne Barnabase bamanya bualu ebu, kunyemabu mu Listra ne mu Derbe, bimenga bia mu Likawoniya.

⁷Kuine aku, ne mu misoku ya pa mpenga, kulongeshabu Lumu lua Disanka.

⁸Mu Listra muvua muntu ne bulema ku makasa, biangatshile ku buana buende. Katshi bamutela, kavua wenda to.

⁹Uvua muteleje muvua Polu wakula. Polu kumujooja, kumona ne: uvua ne ditaba, utekemena kuenda.

¹⁰Kumuambilaye ne diyi dikole ne: — Juka, imana mululame bimpe. Muntu kutupika, kuimana, kuenda bimpe.

¹¹Bantu bavule bavua bamona tshivua Polu muenze atshi, kuelabu mbila mu tshiena Likawoniya, bamba ne: — Mvidie mmituluke muetu munu bu bantu![125]

¹²Bavua binyika Barnabase ne: Zewuse, Polu ne: Ermese,[126] bualu Polu ke uvua wakula.

¹³Mutuangaji wa mu nzubu wa nwidie Zewuse uvua ku tshibuelelu tshia tshimenga, kufikaye ku tshibuelelu atshi ne ngombe milume milengeja ne bilongu. Bualu yeye ne bantu bavua basue kuyilambula Barnabase ne Polu.

¹⁴Kadi bapostolu babidi kumanya bualu abu. Kupandabu bilamba biabu, kuya lubilu kudi bantu, benda bela mbila ne:

¹⁵— Bana betu, tshinudi nuenza nunku ntshinyi? Tudi amu bantu bu nuenu. Tudi tunumanyisha Lumu lua Disanka, bua nulekele nwidie yonsu ya tshianana eyi, nupingane kudi Mvidi Mukulu wa muoyi, udi mufuke diulu, buloba, mayi manene, ne bionsu bidimu.[127]

¹⁶Ku kale Mvidi Mukulu uvua muanyishe bua bantu ba bisamba bikuabu balonde wabu njila.

¹⁷Kadi uvua udimanyisha matuku onsu mu malu mimpe avuaye wenza: udi unulokeshila mvula, ubobesha bikunyibua mu tshikondu tshiabi,[128] unupa biakudia, usankisha mioyi yenu.

¹⁸Kadi nansha bapostolu bakula nanku, bivua bikole bua kukandika bantu, bua kababalambudi milambu.

¹⁹Bena Yuda ba mu Antiyokiya wa mu Pisidiya, ne ba mu Ikoniyume, kufika. Kuenzejabu bantu, bua batue ku tshiabu. Nanku bantu kuasa Polu mabue, kukeba kumushipa. Pashishe kumupulumunabu, kupatuka nende mu tshimenga, bamanye ne: mmufue.

²⁰Kadi bena ditaba kuvua kunyungulukila Polu. Yeye kujuka, kupingana nabu mu tshimenga. Butshia, Polu ne Barnabase kuya mu Derbe.

²¹Polu ne Barnabase kulongesha Lumu lua Disanka mu tshimenga tshia Derbe. Kupetabu bena ditaba bavule muaba awu. Pashishe kupitshilabu mu Listra, ne mu Ikoniyume, bua kupingana mu Antiyokiya wa mu Pisidiya.

²²Bavua bakolesha balongi ku muoyi, bua bananukile mu ditaba, babambila ne: — Tudinebua kumvua makenga mavule, bua tuetu kubuela mu Bukalenga bua Mvidi Mukulu.

²³Bavua bateka bakulu mu Tshisumbu tshionsu tshia bena ditaba.[129] Bamane kujila biakudia, kutendelelabu Mvidi Mukulu amue matuku. Pashishe kubatekabu mu bianza bia Mfumu, uvuabu bitabe.

²⁴Pashishe bapostolu kupitshila mu ditunga dia Pisidiya, bua kufika mu ditunga dia Pamfiliya.[130]

²⁵Kumanyishabu muaku wa Mvidi Mukulu mu Perje. Pashishe kuyabu mu Ataliya.

²⁶Bumuka mu Ataliya, kuyabu ne majuwa mu Antiyokiya. Ke muaba uvua bena ditaba badianze kubateka mu bianza bia Mvidi Mukulu, muena dinanga, bua mudimu uvuabu bakumbaje mpindiewu.

²⁷Bafika ku Antiyokiya, kusangishabu Tshisumbu tshia bena ditaba. Kubalondelabu bionsu bivua Mvidi Mukulu wenza nabu, ne muvuaye munzuluile bantu ba bisamba bikuabu kabidi tshiibi, bua bafike ku ditaba.

²⁸Polu ne Barnabase kushala ne bena ditaba matuku mavule muaba awu.