Read Tshiluba Malu Menza 19 Bible Online

Malu Menza 19 - Tshiluba bible

Malu Menza 19

¹Patshivua Apolose mu Korente, Polu kupitshila mu matunga a munkatshi mua Aziya mukese, kufika mu Efeze. Kusanganayemu bamue bena ditaba.

²Kubakonkaye ne: — Nuvua bapete Mueyelu wa Tshijila, diba dinuvua batuadije kuitaba Yezu anyi? Kumuandamunabu ne: — Katuena nansha banji kumvua batela ne: Mueyelu wa Tshijila udiku to!

³Ke Polu kubebeja kabidi ne: — Bavua banutua mu mayi mushindu kaayi? Ke bobu kuandamuna ne: — Bavua batutua mu mayi, muvua Yowanane utua bantu amu.

⁴Polu kubambila ne: — Yowanane uvua utua bantu bavua banyisha bua kudilengeja. Kadi uvua wambila kabidi bena Izrayele, bua bitabe muntu uvua ne bua kufika panyima pende, mmomumue ne: Yezu.[168]

⁵Bantu bumvua miaku ayi, kuanyishabu bua babatue mu mayi mu dina dia Mfumu Yezu.

⁶Polu kubatenteka bianza. Mueyelu wa Tshijila kubatulukila. Kutuadijabu kuakula miakulu ivuabu kabayi bamanye, bambila bantu malu avua Mvidi Mukulu mubamanyishe.

⁷Bantu abu bavua bu dikumi ne babidi.

⁸Polu kuya mu nzubu wa kutendelela. Ngondu isatu uvua uyukila ne dikima ne bena Yuda. Uvua ubalongesha malu adi atangila Bukalenga bua Mvidi Mukulu, ukeba kuitabijija.

⁹Kadi bamue ba kudibu bavua ne muoyi mupape, babenga kuitaba, bakula ne kapeja bua njila wa Mfumu, bantu bonsu bumvue. Nanku Polu kubashiya, kupatuka mu nzubu amu pamue ne bena ditaba. Kutuadija dituku adi, uvua ubalongesha mu tshilongelu tshia Tiranuse ku dituku ku dituku.[169]

¹⁰Kuenzaye nanku bidimu bibidi. Nenku bena Yuda ne bena Ngreke bonsu bavua mu buloba bua Aziya abu kumvuabu muaku wa Mfumu.

¹¹Mvidi Mukulu uvua wenzeja Polu bishima bia dikema.

¹²Bavua bateka pambidi pa babeedi bilamba, nansha tulamba, bivua bilenga mubidi wa Polu. Babeedi kumvua amu bilenga, mikishi mibi kumuka kudibu.

¹³Bamue bena Yuda, bavua baya miaba yonsu bua kuipata mikishi mibi munda mua babeedi, bavua bidikija mua kutela dina dia Mfumu Yezu bua kuyipata. Bavua bambila mikishi mibi ne: — Mu dina dia Yezu, udi Polu ulongesha, ndi nnutumina diyi: patukayi!

¹⁴(Bavua benza nanku kudi bana ba balume muanda mutekete ba Skeva, mutuangaji munene wa bena Yuda.)

¹⁵Kadi mukishi mubi kubandamuna ne: — Ndi mumanye Yezu, mumanye kabidi ne Polu. Kadi nuenu nudi banganyi?

¹⁶Ke muntu uvua ne mukishi mubi awu, kudiela kudibu, kubapita bonsu bukole. Kubakengeshaye bikole bipite. Bobu kunyema ku nzubu kua muntu awu, kabayi bilamba, mputa mubidi mujima.

¹⁷Bena mu Efeze bonsu, bena Yuda ne bena Ngreke, kumanyabu bualu abu. Kukuatshikabu buowa, kutumbisha dina dia Mfumu Yezu.

¹⁸Bantu ba bungi ba ku bavua bitabe, kutondabu patoke malu mabi avuabu benze.

¹⁹Bantu bavule bavua benza malu a majimbu, kufika ne mikanda yabu, kuyosha, bantu bonsu bamone. Bavua batshinka mushinga wa mikanda ayi, bapeta nkanu ya tshiamu tshitoke tshia mushinga mukole binunu makumi atanu.[170]

²⁰Ke muvua muaku wa Mfumu wenda utanta, uleja bukole buawu.[171]

²¹Malu onsu aa mamane kupita, Polu kupangadika[172] mua kupitshila mu Masedoniya ne mu Akaya, bua kuya mu Yerushalayime, wamba ne: — Pangafika ku Yerushalayime, nenye kabidi ne ku Rome.

²²Kutumaye bamuambuluishi bende babidi, Timote ne Eraste, mu Masedoniya. Kadi yeye uvua muanji kushala kabidi amue matuku mu Aziya.

²³Ke tshikondu tshivua tshimvundu tshinene tshijuka mu Efeze bualu bua njila wa muoyi wa Mfumu.

²⁴Muntu kampanda, dina diende Demetriyuse, nsenda wa biamu, uvua wenza tuzubu tua tshiamu tshitoke tshia mushinga mukole, utentula bimfuanyi bia nzubu wa kutendelela wa nwidie mukaji Artemise.[173] Ke muvuaye upetesha bena mudimu bende makuta a bungi.

²⁵Demetriyuse kusangisha bansenda bende aba, ne bantu bakuabu bavua benza mudimu wa momumue. Kubambilaye ne: — Bakalenga, nudi bamanye ne: buetu bubanji budi amu ku mudimu wetu ewu.

²⁶Kadi nudi bamone, badiumvuile kabidi tshidi muntu ewu Polu wenza. Udi ujadika ne: nwidie idi bantu benza ki mmvidie menemene to. Ukadi muitabijije bantu ba bungi, ki amu munu mu Efeze, kadi ne miaba kana yonsu ya mu Aziya.

²⁷Ebi bidi bifuana kunyanga mudimu wetu, bifuana kabidi kumuenesha nzubu wa nwidie mukaji munene Artemise bu tshintu tshia tshianana. Nanku nwidie mukaji ewu, udi bantu bonsu ba mu Aziya ne ba mu buloba bujima bakukuila, kakuikala kabidi ne lumu to!

²⁸Bantu bumvua miaku ayi, kupetabu tshiiji tshikole, bela bibingu, bamba ne: — Artemise wa bena Efeze ke udi munene!

²⁹Tshimyundu kutampakana mu tshimenga tshijima. Bantu kukuata Ngayuse ne Aristarke, bena Masedoniya babidi bavua mu luendu ne Polu. Kubapulumunabu, kuya nabu mu lupangu lua manaya,[174] muvua bantu bonsu bafuilakana bua kubuela.

³⁰Polu uvua musue kumueneka kudi bantu. Kadi bena ditaba kumukandika.

³¹Bamue balombodi ba mbulamatadi ba mu Aziya, bavua balunda bende, kumutuminabu bantu, bamuambila bua kayi muaba wa manaya awu.

³²Diba adi bantu bavua basangile kuakula kupangakana, bamue bela mbila, bakuabu bela bibingu. Ba bungi kabavua nansha bamanye tshine tshiyuabu bavuile muaba awu.

³³Ke bena Yuda kumvuija Aleksandre bualu, kumupatula munkatshi mua bantu, kumuimanyika kumpala kuabu, bua abakuile. Aleksandre kupuwisha bantu bonsu ne tshianza, ukeba kuakuila bena Yuda.

³⁴Kadi bajingulula ne: mmuena Yuda, bonsu kuela bibingu diyi dimue bu meba abidi majima, bamba amu ne: — Artemise wa bena Efeze ke udi munene!

³⁵Ku ndekelu mufundi mukuabu wa malu a mu tshimenga, kupetaye mushindu wa kupuwisha bantu, ubambila ne: — Nuenu bena Efeze, telejayi! Bantu bonsu mbamanye ne: tshimenga tshia Efeze tshidi ne bukokeshi bua kulama bimpe nzubu wa nwidie mukaji munene Artemise, kabidi ne lupingu luende luvua lukuluke mu diulu.

³⁶Muntu nansha umue kena mua kubenga bualu ebu to. Nanku shalayi ne lutulu, kanuenji bibi nansha kakese.

³⁷Nudi bavue ne bantu aba: ki mbapawule nzubu yetu ya nwidie, kabena nansha bapepeja nwidie mukaji wetu.

³⁸Pikala Demetriyuse ne bansenda bende tshilumbu ne muntu mukuabu, tudi ne bandumbulula, tudi ne matuku adibu bakosa nsambu. Baye kudibu!

³⁹Kadi panuikala ne majinga makuabu, nebaatangile mu tshisangilu tshia bena ditunga. Ke mudi mikenji yamba.

⁴⁰Kadi bua bidi bienzeka lelu, bantu bakuabu mbafuane kutufunda ne: tudi bantomboji. Kakuena bualu nansha bumue budi buleja tshitudi basangile muaba ewu bantu bungi nanku. Bobu batuebeja, netupange tshia kuamba.

⁴¹Mufundi mumane kuamba nanku, kutangalajaye bantu.