Read Tshiluba Malu Menza 2 Bible Online

Malu Menza 2 - Tshiluba bible

Malu Menza 2

¹Dituku dia Pentekostese[16] bena ditaba bonsu bavua basangile muaba umue.

²Bu mpindiewu tshiona tshikole kufuma mu diulu, bu tshipepele tshikole tshituuta. Kumvui-katshi mu nzubu mujima uvuabu basombe.

³Kumonabu ndimi imueneka bu ya kapia, yabulukangana iya kuikila ku lumue ku lumue pa mitu yabu.

⁴Bonsu kuwula ne Mueyelu wa Tshijila. Kutuadijabu kuakula miakulu mikuabu, bilondeshile muvua Mueyelu wa Tshijila ubakuisha.

⁵Mu Yerushalayime amu muvua bena ditaba ba bena Yuda, bafume ku matunga onsu a pa buloba bujima.

⁶Bantu kunguila pavuabu bumvua tshiona atshi. Bavua bakema bikole, bualu muntu yonsu uvua umvua balongi ba Yezu bakula muakulu wa kuabu kudiye ufuma.

⁷Bavua bakatshila bikole, bamba ne: — Badi bakula bonsu aba ki mbena Ngalileya anyi?[17]

⁸Kadi mutudi tubumvua bakula muakulu wa kuetu kutudi bafume mmunyi?

⁹Munkatshi muetu emu se mudi bena Parte, bena Madayi, bena Elame, bantu ba mu Mezopotamiya, ba mu Yudeya, ba mu Kapadokiya, ba mu Pontuse, ba mu buloba bua Aziya,

¹⁰ba mu Frijiya, ba mu Pamfiliya, ba mu Ejipitu, ne ba mu buloba bua Sirene budi mu ditunga dia Libiya. Bakuabu mene badi bafume ku Rome.

¹¹Mudi bena Yuda, ne benyi batshidi bakeba kubuela mu tshisumbu tshia bena Yuda. Mudi bantu ba mu Kreta, kabidi ne Ba Arabe. Kadi bonsu tudi tubumvua balonda mu miakulu yetu mishilangane malu a kukema adi Mvidi Mukulu muenze.

¹²Bantu bonsu aba bavua bakema, balubakana, bakonkangana ne: — Bionsu bidi bienzeka ebi bidi bileja tshinyi?

¹³Kadi bantu bakuabu bavua baseka bena ditaba, bamba ne: — mBakuatshike maluvu menemene!

¹⁴Ke Petro kujuka kulu, pamue ne bapostolu bakuabu dikumi ne umue, kuambilaye bantu ne diyi dikole ne: — Nuenu bena Yuda, nuenu bonsu kabidi badi basomba mu Yerushalayime, ntelejayi bimpe, bua nnumvuije bidi bienzeka ebi.

¹⁵Bantu aba ki mbakuatshike maluvu, munudi nuela meji amu to. Tutshidi amu pa diba dia tshitema wa dinda.

¹⁶Kadi bidi bienzeka lelu ebi, ke bivuamuambi Yowele mumane kumanyisha ne:

¹⁷“Mvidi Mukulu udi wamba ne: matuku a nshikidilu, nentumine muntu yonsu Mueyelu wanyi. Bana benu ba balume ne ba bakaji nebambe malu anyi. Nendeje bansonga benu malu. Banunu benu nebalote ndota.

¹⁸Eyowa, matuku awu nentumine bonsu badi bangenzela mudimu, balume ne bakaji, Mueyelu wanyi. Nanku nebambe malu anyi.

¹⁹Nengenze malu a kukema mu diulu muamua, ne bishima pa bupoba apa: nebamone mashi, kapia, ne dibungi dikole dia muinshi.

²⁰Dituku dinene dia Maweja-Nangila, dituku dia butumbi, kadiyi dianji kufika, diba nediandamuke miidima, ngondu neakunze bu mashi.

²¹Kadi muntu yonsu wabila Maweja-Nangila, neapande.[18]”

²²Nuenu bena Izrayele, telejayi tshindi nnuambila: Yezu wa mu Nazarete[19] uvua mufike kunudi mu dina dia Mvidi Mukulu. Mvidi Mukulu kujadika bumfumu buende munkatshi muenu ne bishima bivule, kabidi ne malu a kukema, bivuaye munuenzele kudiye. Bionsu abi, nuenu kabidi nudi babimanye.

²³Bavua bafila muntu ewu kunudi, muvua Mvidi Mukulu mudianze kujadika. Nuenu kumushipa, kumupopeshisha pa mutshi mutshiamakane kudi bena malu mabi.[20]

²⁴Kadi Mvidi Mukulu mmumubishe ku lufu, mumumbushe ku makenga a lufu, bualu kavua mua kushala ku bumfumu bua lufu.[21]

²⁵Ke muvua Davide muambe bualu buende ne: “Mvua mumone Maweja-Nangila diba dionsu kumpala kuanyi, udi pabuipi nanyi bua tshizakadi.

²⁶Ke padi muoyi wanyi ne disanka, ntua tshianga, tshionkomoka. Nansha mubidi wanyi muikale ne butekete, nendale ne ditekemena ne:

²⁷kuakundekela mu kandondu ka bafue, kuakuanyisha bua meme, mulunda webe, mbolele mu lukita.

²⁸Wewe kundeja njila uvua mumfikishe ku muoyi. Paudi pabuipi nanyi, ndi ne disanka divule.[22]”

²⁹Bana betu, ndi mua kunuambila bualu bua nkambua wetu Davide patoke too: ukadi mufue. Bakamujika. Lukita luende ludi munkatshi muetu emu ne lelu.[23]

³⁰Kadi yeye uvua muambi. Uvua mumanye ne: Mvidi Mukulu mmundaye uditshipa ne: nenteke umue wa ku ndelanganyi yebe mu nkuasa webe wa bumfumu.[24]

³¹Nanku Davide uvua mudianze kumona bivua ne bua kuenzeka. Ke muvuaye mumanyishe dibika dia Kristu, pavuaye wamba ne: “Kabavua bamulekele mu kandondu ka bafue. Mubidi wende kauvua mubolele mu lukita.”

³²Yezu undi ntela awu, ke udi Mvidi Mukulu mubishe ku bafue. Tuetu bonsu tudi bajadiki ba bualu ebu.

³³Mpindiewu udi muzanjike ku dia bukole dia Mvidi Mukulu.[25] Kupetaye Mueyelu wa Tshijila uvua Tatu mulaye. Ke yeye kututuminawu: ke binudi numona, numvua kabidi lelu ewu.

³⁴Davide kavua mubande mu diulu. Kadi udi wamba ne: “Maweja-Nangila uvua muambile Mfumu wanyi ne: Somba ku dianyi dia balume,

³⁵too ne pangateka baluishi bebe tshidiatshilu tshia makasa ebe.[26]”

³⁶Nuenu bena Izrayele bonsu, nujadike ne: Yezu ewu, unuvua bapopele pa mutshi mutshiamakane, ke yeye udi Mvidi Mukulu muteke Mfumu ne Kristu!

³⁷Bantu bumvua miaku eyi, kulubakanabu bikole. Kukonkabu Petro ne bapostolu bakuabu ne: — Kadi, bana betu, tshitudi ne bua kuenza ntshinyi?

³⁸Ke Petro kubandamuna ne: — Nudilengeje.[27] Batue yonsu wa kunudi mu mayi mu dina dia Yezu Kristu, bua Mvidi Mukulu anujimijile mibi yenu. Nanku nenupete dipa dia kudi Mvidi Mukulu, ke Mueyelu wa Tshijila.

³⁹Bualu Mvidi Mukulu mmunulaye nuenu ne bana benu, kabidi ne bonsu batshidi kule, bonsu badi Maweja-Nangila Mvidi Mukulu wetu musue kubikila.

⁴⁰Petro uvua ubasaka, ubakolesha ku muoyi, ubambila miaku mikuabu ya bungi ne: — Umbukayi kudi bena buenzayi ba lelu aba. Nanku nenupete lupandu!

⁴¹Bantu ba bungi kuitaba miaku ya Petro ayi. Kubatuabu mu mayi. Dituku adi, bantu bu binunu bisatu kubuela mu tshisumbu tshia bena ditaba.

⁴²Matuku onsu bantu abu bavua basombe kaba kamue: bavua bateleja ne ntema bivua bapostolu babalongesha, badisanga mu buena muntu, badila kaba kamue[28] batendelela bonsu pamue.

⁴³Muntu yonsu uvua ne bowa, bualu bapostolu bavua benza bishima ne malu a kukema mavule.

⁴⁴Bena ditaba bavua bonsu ne muoyi umue, bateka bionsu bivuabu nabi muaba umue, babanyanganabi[29]

⁴⁵Bavua bapana madimi ne bintu biabu, babanyangana bonsu mushinga wabi, bilondeshile dikenga divua muntu yonsu nadi.

⁴⁶Ku dituku ku dituku, bavua basangila mu nzubu wa Mvidi Mukulu ne muoyi umue, bakosolola diampa pamue mu nzubu yabu, badila pamue ne disanka, ne muoyi wa dinanga.

⁴⁷Bavua batumbisha Mvidi Mukulu. Bantu bonsu bavua babanyisha. Dituku dionsu Mfumu uvua usakidila ku tshisumbu tshiabu bantu bavuaye musungile.